សេអ៊ូល៖ ស្ដ្រីម្នាក់ដែលមានភាពស្និទស្នាលជាមួយប្រធានាធិបតីកូរ៉េខាងត្បូង ប៉ាក គុនហេ គឺលោកស្រី ឆយ ស៊ុនស៊ី ត្រូវបានរដ្ឋាអាជ្ញាក្រុងសេអ៊ូល ចាប់ឃុំខ្លួនភ្លាមៗកាលពីល្ងាចថ្ងៃ ចន្ទ ទី ៣១ តុលា។
តាមបណ្ដាញផ្សាយព័ត៌មាន Channel News Asia លោកស្រី ឆយ ស៊ុនស៊ី ត្រូវបានចាប់ខ្លួនប៉ុន្មានម៉ោងប៉ុណ្ណោះបន្ទាប់ពីលោកស្រី មកបំភ្លឺដោយផ្ទាល់នៅការរិយាល័យរដ្ឋអាជ្ញា ករណីដែលសាធារណជនចោទថា ស្រីវ័យចំណាស់រូបនេះបានប្រើប្រាស់ឥទ្ធិពលរបស់លោកស្រី ប៉ាក គុនហេ ដើម្បីអង្គៀសប្រាក់មូលនិធិមួយដែលគេថាមិនស្របច្បាប់។
រដ្ឋអាជ្ញាក្រុង សេអ៊ូល បានបើកការស៊ើបអង្កេតថែមទៀត ថាតើស្ដ្រីរូបនេះទាញផលប្រយោជន៍ពីលោកស្រី ប៉ាក គុនហេ ដោយរបៀបណា ហើយបើលោកស្រី ប៉ាក់ គុនហេ ពាក់ព័ន្ធក្នុងរឿងនេះដែរ នឹងធ្វើឲ្យស្ដ្រីប្រធានាធិបតីរូបនេះ រងការចោទប្រកាន់ផងដែរ។ ប៉ុន្ដែលោកស្រី ប៉ាក គុនហេ ដែលរងការធ្វើបាតុកម្មឲ្យចាកចេញពីដំណែងកាលពីសប្ដាហ៍មុន បានអះអាងថា លោកស្រីពិតជាមិនបានដឹងថា មិត្ដភក្ដិរបស់ខ្លួន ប្រើប្រាស់ឥទ្ធិពលរបស់ខ្លួនដូចនេះទេ។ តែបែបនេះក្ដីគេបានរកឃើញ សន្ទរកថា របស់លោកស្រី ប៉ាក គុនហេ មួយចំនួនត្រូវបានលោកស្រី ឆយ ស៊ុនស៊ី ជាអ្នកបំពេញបន្ថែម។ មកដល់ពេលនេះស្ថានភាពនៅទីក្រុង សេអ៊ូល ស្ងប់ស្ងាត់បន្ដិចដោយសារតែ ស្ដ្រីវ័យចំណាស់រូបនេះសុខចិត្ដចូលខ្លួនឲ្យគេចាប់ខ្លួនដោយមិនរងចាំដីការចាប់ខ្លួននោះទេ។
អ្នកវិភាគនៅកូរ៉េខាងត្បូងព្រមានពីការបែកបាក់ប្រសិនបើលោកស្រី ប៉ាក គុនហេ អាចផុងខ្លួនដោយសាររឿងអាស្រូវបន្ដិចបន្ដួចនេះ៕ ប្រភព៖CNA
