ភ្នំពេញ៖ នាយករដ្ឋមន្ដ្រី សម្ដេច ហ៊ុន សែន បានផ្ញើសារលើកទឹកចិត្ត និងអំពាវនាវដល់សិស្សានុសិស្សទាំងអស់ ទៅចុះឈ្មោះចូលរៀនអោយបានគ្រប់គ្នា ជាពិសេសឪពុកម្ដាយ និងអាណាព្យាបាលត្រូវនាំកូនចៅទៅចុះឈ្មោះចូលរៀនអោយបានគ្រប់ៗគ្នា។
តាមបណ្ដាញហ្វេសប៊ុក របស់សម្ដេច ហ៊ុន សែន នៅថ្ងៃទី១ ខែវិច្ឆិកា ឆ្នាំ២០១៦នេះ ក្រៅពីសារជម្រុញលើកទឹកចិត្ត ដល់សិស្សានុសិស្ស ឱ្យទៅចុះឈ្មោះចូលរៀនគ្រប់ៗគ្នាហើយនោះ សម្ដេច ក៏បានទូន្មាន ឱ្យសិស្សានុសិស្សទាំងអស់ ត្រូវខិតខំយកចិត្តទុកដាក់ សិក្សារៀនសូត្រ ស្តាប់ដំបូន្មានឪពុកម្តាយ លោកគ្រូ អ្នកគ្រូ និងធ្វើជាកូនល្អ ជាសិស្សល្អ ជាមិត្តល្អ ហើយត្រូវចៀសវាង អោយឆ្ងាយពីអំពើឧបាយមុខគ្រប់យ៉ាង ជាពិសេសសកម្មភាពក្មេងទំនើង និងគ្រឿងញៀនគ្រប់ប្រភេទជាដើម។
ទន្ទឹមនឹងនេះ សម្ដេច ហ៊ុនសែន ក៏បានសំនូមពរ ដល់ លោកនាយកសាលា និងលោកគ្រូ អ្នកគ្រូ ឱ្យយកចិត្តទុកដាក់អប់រំបណ្តុះបណ្តាលសិស្ស ប្រកបដោយស្មារតីមនសិការ វិជ្ជាជីវៈ និងទទួលខុសត្រូវខ្ពស់ដើម្បីអនាគតល្អ របស់ពួកគេសំដៅពង្រឹងគុណភាពវិស័យអប់រំឱ្យបានកាន់តែល្អប្រសើរ៕