គណៈកម្មាធិការបុណ្យសពអតីតនាយករដ្ឋមន្ត្រី នៃរបបសាធារណរដ្ឋប្រជាមានិតកម្ពុជា បានឱ្យដឹងថានឹងដង្ហែរសពលោក ប៉ែន សុវណ្ណ ពីខេត្ត តាកែវ ឆ្ពោះមកតម្កល់នៅវត្ត នួនមុនីរាម ហៅ វត្តថាន់ រាជធានីភ្នំពេញ ដើម្បីត្រៀមបូជានៅថ្ងៃទី៦ ខែ វិច្ឆិកានៅមុខវត្តបុទុមវតី។
ប្រធានគណៈកម្មាធិការបុណ្យសព លោក ប៉ែន សុវណ្ណ គឺ លោក យ៉ែម ប៉ុញ្ញឬទ្ធិ មានប្រសាសន៍ថា សព លោក ប៉ែន សុវណ្ណ អតីតនាយករដ្ឋមន្ដ្រីដំបូងគេរបស់កម្ពុជា នៅក្នុងរបបសាធារណរដ្ឋប្រជាមានិតកម្ពុជា និងជាអ្នកតំណាងរាស្ត្រគណបក្សសង្គ្រោះជាតិមណ្ឌល កំពង់ស្ពឺ នឹងដង្ហែរមករាជធានីភ្នំពេញ នៅថ្ងៃទី ២ ខែ វិច្ឆិកាឆ្នាំ ២០១៦។
លោក យ៉ែម ប៉ុញ្ញាឬទ្ធិ៖« ជាគោលការណ៍ខាងក្រុមគ្រួសារសព បានកំណត់ថ្ងៃទី ២(វិច្ឆិកា) មកតម្កល់នៅរាជធានីភ្នំពេញ ដើម្បីត្រៀមបូជានៅថ្ងៃទី ៦ ខែ វិច្ឆិកា ឆ្នាំ ២០១៦»។
ជាមួយគ្នានេះ ប្រធានរដ្ឋសភា សម្តេច ហេង សំរិន បានសម្រេចបង្កើតគណៈកម្មាធិការបុណ្យសព លោក ប៉ែន សុវណ្ណ ដើម្បីរៀបចំបុណ្យសពលោកឲ្យបានសមរម្យ។ នេះបើតាមអ្នកនាំពាក្យរដ្ឋសភា លោក ឡេង ប៉េង ឡុង។
លោក ឡេង ប៉េង ឡុង៖«រដ្ឋសភាបានបង្កើតគណៈកម្មាធិការ ដើម្បីរៀបចំពិធី ឈាបនកិច្ច លោក ប៉ែន សុវណ្ណ»។
អតីតនាយករដ្ឋមន្ដ្រីនៅក្នុងរបបសាធារណរដ្ឋប្រជាមានិតកម្ពុជា លោក ប៉ែន សុវណ្ណ បានទទួលមរណភាព កាលពីយប់ថ្ងៃទី ២៩ ខែតុលា ឆ្នាំ ២០១៦។លោក ប៉ែន សុវណ្ណ កើតនៅថ្ងៃទី ១៥ ខែ មេសា ឆ្នាំ ១៩៣៦ នៅ ភូមិចន្ទទៀប ឃុំសំរោង ស្រុកត្រាំកក់ ខេត្តតាកែវ។ លោកគឺជាអតីតនាយករដ្ឋមន្ត្រីទីមួយ នៃរបបសាធារណរដ្ឋប្រជាមានិតកម្ពុជា ដែលរដ្ឋាភិបាលទីក្រុង ហាណូយ លើកបន្ទុប។
លោក ប៉ែន សុវណ្ណ បានធ្វើជានាយករដ្ឋមន្ត្រីនៃព្រះរាជាណាចក្រកម្ពជា ក្នុង ឆ្នាំ១៩៧៩ រហូតដល់ ឆ្នាំ១៩៨១ គឺលោកស្ថិតក្នុងដំណែងនេះ បានត្រឹមតែបីឆ្នាំប៉ុណ្ណោះ ហើយលោកក៏ត្រូវបានទម្លាក់ពីដំណែង ដោយការចាប់ខ្លួនលោកទៅឃុំនៅទីក្រុង ហាណូយ ដោយកងទ័ពវៀតណាម អស់រយៈពេល ១០ឆ្នាំ។
លោក ប៉ែន សុវណ្ណ កាលលោកនៅរស់ តែងតែប្រាប់ប្រព័ន្ធផ្សព្វផ្សាយថា វៀតណាមចាប់ខ្លួន ដោយសារលោក ប្រឆាំងគោលនយោបាយ បញ្ចូនអន្តោប្រវេសន៍វៀតណាម ចូលមករស់នៅក្នុងទឹកដីកម្ពុជា និង គោលនយោបាយព្រំដែន ដែលលោកថា វៀតណាម បានរំលោភបំពាន។ អតីតនាយករដ្ឋមន្ត្រីរូបនេះ ត្រូវបានដោះលែងវិញ បន្ទាប់ពី មានកិច្ចព្រមព្រៀងសន្តិភាព ២៣ តុលា១៩៩១៕
