ភ្នំពេញ៖ នៅក្នុងយុទ្ធនាការ «ថ្ងៃចន្ទពណ៌ខ្មៅ» សប្តាហ៍នេះ សហគមន៍បឹងកក់ បានអះអាងថា នៅថ្ងៃទី ០៣ ខែ វិច្ឆិកា ពួកគាត់នឹងយកញត្តិទៅដាក់នៅខុទ្ទកាល័យនាយករដ្ឋមន្ត្រី សម្ដេច ហ៊ុន សែន ដើម្បីស្នើឲ្យសម្តេចធ្វើជាសាក្សី ករណីអំពើហិង្សា នៅមុខភូមិគ្រឹះសម្តេច កាលពីឆ្នាំ ២០១៣ ដែលនាំឱ្យអ្នកស្រី ទេព វន្នី ត្រូវបានចាប់ខ្លួន។ 
សហគមន៍បឹងកក់ និងសហគមន៍បូរីកីឡា បានអះអាងដូចនេះ នៅក្នុងយុទ្ធនាការ«ថ្ងៃចន្ទពណ៌ខ្មៅ» កាលពីថ្ងៃ ចន្ទ ទី ៣១ តុលា នេះ។
ក្នុងឱកាសនេះ ពួកគាត់ បានប្រមូលផ្ដុំគ្នានៅ សហគមន៍ បឹងកក់ ខាងជើងវិហាឥស្លាមដោយសម្ដែង ការប្រឆាំងនឹងការឃុំខ្លួន អ្នកស្រី ទេព វន្នី ហើយក្នុងនោះពួកគាត់បានទាមទារ ឲ្យតុលាការដោះលែងមន្ត្រីសិទ្ធិមនុស្ស មន្ត្រី គ.ជ.ប និងទម្លាក់ចោលបទចោទប្រឆាំងសកម្មជនបឹងកក់ រួមទាំងរកយុត្តិធម៌ ក្នុងករណីឃាតកម្មលោកបណ្ឌិត កែម ឡី។
អ្នកស្រី បូវ សោភា តំណាងសហគមន៍បឹងកក់ បានឲ្យដឹងថា ជំហររបស់សហគមន៍ របស់អ្នកស្រី នឹងបន្តធ្វើ យុទ្ធនាការ«ថ្ងៃច័ន្ទព័ណ៌ខ្មៅ» រហូតទាល់ អ្នកស្រី ទេព វន្នី ត្រូវបានដោះលែងពីពន្ធនាគារ។
អ្នកស្រីបន្តថា នៅថ្ងៃទី ៣ ខែ វិច្ឆិកា សហគមន៍របស់អ្នកស្រី នឹងយកញត្តិទៅដាក់នៅខុទ្ទកាល័យ របស់សម្តេចនាយករដ្ឋមន្ត្រី ដើម្បីស្នើសុំឲ្យសម្តេចធ្វើជាសាក្សី និងបង្ហាញ កាំម៉ារ៉ាសុវត្តិភាព ក្នុងករណីអំពើហិង្សា នៅមុខភូមិគ្រឹះសម្តេច កាលពីឆ្នាំ ២០១៣ ដែលនាំឲ្យតំណាងសហគមន៍ បឹកកក់ អ្នកស្រី ទេព វន្នី ជាប់ពន្ធនាគារ។
រដ្ឋាភិបាលបានហៅអ្នកដែលស្លៀកពាក់ឈុតពណ៍ខ្មៅនៅថ្ងៃ ចន្ទ ថាគឺជាការផ្ដើមឲ្យមានបដិវត្ដន៍មួយនៅកម្ពុជា ប៉ុន្ដែអ្នកសង្កេតការណ៍ និងអ្នកវិភាគឯករាជ្យ មួយចំនួនរិះគន់ការបង្ក្រាប របស់សមត្ថកិច្ចទៅលើអ្នកធ្វើយុទ្ធនាការ ដោយពួកគាត់ចាត់ទុក ជាការបំបិទសិទ្ធិសេរីភាពធ្ងន់ធ្ងរនៅកម្ពុជា។
អ្នកស្រី ទេព វន្នី កំពុងត្រូវបានឃុំខ្លួន នៅគុកព្រៃសរ ក្រោមបទប្រមាថមន្ត្រីសាធារណៈ ។ ករណីនេះតុលាការរាជធានីភ្នំពេញបាន ផ្តន្ទាទោស សកម្មជនរូបនេះឱ្យមានទោស ៦ខែ៕
