ភ្នំពេញ៖ សហគមន៍បឹងកក់ និងសហគមន៍បុរីកីឡា នៅថ្ងៃ ចន្ទ ទី ៣១ តុលា នេះប្រកាសប្រមូលផ្ដុំគ្នានៅសហគមន៍បឹងកក់ ខាងជើងវិហាចាមដើម្បីសម្ដែងការប្រឆាំងនឹងតុលាការ អាជ្ញាធរ ដែលបានចាប់ខ្លួនអ្នកស្រី ទេព វន្នី និងសកម្មជនការពារសិទ្ធិមនុស្ស ដែលការប្រមូលផ្ដុំគ្នានេះគឺពួកគេស្លៀកពាក់ខ្មៅ ដូចរាល់ថ្ងៃ ចន្ទ សប្ដាហ៍មុនដែរ។
តាមអ្នករាយការណ៍ព័ត៌មាន ពួកគេបានចាប់ផ្ដើមប្រមូលផ្ដុំគ្នាបណ្ដើរៗហើយ ដោយនៅទីនោះពួកគេមានកាន់បដាព្រោងព្រាត មានរូបថតអ្នកស្រី ទេព វន្នី និងបដាជាច្រើនទៀតទាមទារឲ្យតុលាការ ដោះលែងអ្នកស្រី ទេព វន្នី និងសកម្មជនសិទ្ធិមនុស្សដែលកំពុងជាប់ឃុំខ្លួន ករណីអ្នកនាង ខុម ចាន់តារាទី ហៅ ស្រីមុំ និងការទាមទាររកយុត្ដិធម៌ជូនលោក បណ្ឌិត កែម ឡី ។
ការតវ៉ាថ្ងៃ ចន្ទ ពណ៍ខ្មៅបានធ្វើឡើងតាំងពីមានការចាប់ឃុំខ្លួនសកម្មជនសិទ្ធិមនុស្សនៅថ្ងៃ ២៥ ឧសភា ប៉ុន្ដែ ការតវ៉ាច្រើនតែបំបែកដោយកម្លាំងសមត្ថកិច្ច មិនតែប៉ុណ្ណោះ អ្នកតវ៉ាមួយចំនួនដែលភាគច្រើនជាស្ដ្រី ត្រូវបានសមត្ថកិច្ចនាំខ្លួនទៅកាន់អធិការដ្ឋានខណ្ឌ ហើយបង្ខំឲ្យផ្ដិតមេដៃបញ្ឈប់ការធ្វើសកម្មភាពបែបនេះ។ តែយ៉ាងនេះក្ដីសហគមន៍បូរីកីឡា និងសហគមន៍បឹងកក់ នៅតែនាំគ្នាធ្វើពិធីនេះរៀងរាល់ថ្ងៃ ចន្ទ នៃសប្ដាហ៍នីមួយៗ។ មិនត្រឹមតែពួកសហគមន៍បឹងកក់ និងបូរីកីឡា ដែលប្រមូលផ្ដុំគ្នានោះទេគឺ អ្នកលេងបណ្ដាញសង្គមមួយចំនួនក៏បានបង្ហាញការស្លៀកពាក់ឈុតខ្មៅរបស់ពួកគេ ដើម្បីទាមទាររកយុត្ដិធម៌សម្រាប់អ្នកដែលជាប់ឃុំខ្លួនទាំងអស់នោះផងដែរ។
រដ្ឋាភិបាលបានហៅអ្នកដែលស្លៀកពាក់ឈុតពណ៍ខ្មៅនៅថ្ងៃ ចន្ទ ថាគឺជាការផ្ដើមឲ្យមានបដិវត្ដន៍មួយនៅកម្ពុជា ប៉ុន្ដែអ្នកសង្កេតការណ៍ និងអ្នកវិភាគឯករាជ្យមួយចំនួនរិះគន់ការបង្ក្រាប របស់សមត្ថកិច្ចទៅលើអ្នកធ្វើពិធីថ្ងៃចន្ទពណ៍ខ្មៅនេះ ដោយពួកគាត់ចាត់ទុកការបង្ក្រាបនេះជាការបំបិតសិទ្ធិសេរីភាពធ្ងន់ធ្ងរនៅកម្ពុជា៕
