ភ្នំពេញ៖ សមាគម និងអង្គការយុវជនចំនួន ១០ នឹងប្រារព្ឋធ្វើ ទិវាយុវជនអន្តរជាតិ ក្រោមប្រធានបទ «ការចូលរួមរបស់យុវជនក្នុងជីវិតនយោបាយនិងជីវិតសាធារណៈ» នៅថ្ងៃទី ៩ ខែសីហា ឆ្នាំ ២០១៥ ខាងមុខនេះ នៅមជ្ឈមណ្ឌលសហប្រតិបត្តិការកម្ពុជា ជប៉ុន (CJCC) ។
ទិវាយុវជនអន្តរជាតិនេះ ធ្វើឡើងក្នុងគោលបំណង លើកទឹកចិត្តយុវជនកម្ពុជាឱ្យប្រើប្រាស់សមត្ថភាព ចំណេះដឹង និងសក្តានុពលរបស់ពួកគេ ដើម្បីចូលរួមចំណែកពេញលេញនៅក្នុងសង្គម ការអភិវឌ្ឍន៍ និងកសាងសន្តិភាព។ យុវជនមកពីបណ្តាខេត្ត ក្រុង ទាំងអស់នៅកម្ពុជាចំនួនជាង ៥០០ នាក់ នឹងចូលរួមក្នុងកម្មវិធីនេះ ។ នេះបើតាមការឱ្យដឹងពីលោក រិន ច័ន្ទរឹទ្ឋិ មន្ត្រីគម្រោងផ្នែកគំនិតផ្តួចផ្តើមយុវជនក្នុងសកម្មភាពសង្គមនិងនយោបាយ នៃអង្គការកម្មវិធីអភិឌ្ឍន៍ធនធានយុវជន ហើយជាសមាជិកនៃគណៈកម្មការចំរុះ រៀបចំទិវាយុវជនអន្តរជាតិ។
ទិវានេះ ចូលរួមបង្កើតឡើងដោយ សមាគមយុវជន អង្គការសង្គមស៊ីវិលជាតិនិងអន្តរជាតិនៅកម្ពុជាចំនួន ១១ ស្របតាមមហាសនិបាតនៃអង្គការសហប្រជាជាតិនៅឆ្នាំ ១៩៩៩ ប្រារព្ធដើម្បីឧទ្ទិសដល់តួនាទីរបស់យុវជន ជាពិសេសលើស្ទួយដល់ស្ត្រីក្នុងការប្រើប្រាស់សិទ្ធិជាពលរដ្ឋដើម្បីការអភិវឌ្ឍន៍ដោយសន្តិភាព។
កម្មវិធីនេះ គាំទ្រដោយអង្គការសហប្រជាជាតិ និងគណៈកម្មការចម្រុះនៃទិវាយុវជនអន្តរជាតិនៅកម្ពុជារួមមាន៖ អង្គការយុវសន្តិភាព អង្គការកម្មវិធីអភិវឌ្ឍន៍ធនធានយុវជន បណ្តាញយុវជនកម្ពុជា បណ្ដាញយុវជន Changemaker កម្ពុជា សមាគមយុវជនខ្មែរ អង្គការយុវជនខ្មែរនិងអភិវឌ្ឍន៍សង្គម សមាគមខ្មែរកម្ពុជាក្រោមដើម្បីសិទ្ធិមនុស្សនិងការអភិវឌ្ឍន៍ អង្គការស្ម័គ្រចិត្តដើម្បីសង្គម សម្ព័ន្ធយុវជនដើម្បីឯកភាពនិងអភិវឌ្ឍន៍ ព្រមទាំងមជ្ឈមណ្ឌលប្រជាពលរដ្ឋដើម្បីអភិរឌ្ឍន៍និងសន្តិភាព។
សូមបញ្ជាក់ថា ទិវាយុវជនអន្តរជាតិ ប្រារព្ធឡើងជារៀងរាល់ឆ្នាំនៅកម្ពុជាក្រោមប្រធានបទផ្សេងៗគ្នា។ ទិវាយុវជនអន្តរជាតិ ត្រូវបានបង្កើតឡើងដោយមហាសនិបាតនៃអង្គការសហប្រជាជាតិនៅឆ្នាំ ១៩៩៩ ហើយទិវានេះត្រូវបានគេរៀបចំឡើង ដើម្បីឧទ្ទិសចំពោះតួនាទីរបស់យុវជន ជាពិសេសស្ត្រីក្នុងការប្រើប្រាស់សិទ្ធិជាពលរដ្ឋ ក្នុងការចូលរួមធ្វើសកម្មភាពជួយសង្គមក្នុង វិស័យនយោបាយ សេដ្ឋកិច្ច និងកិច្ចការផ្សេងៗនៅក្នុងសង្គម៕
