លោក Virachai Plasai ឯកអគ្គរដ្ឋទូតរាជាណាចក្រថៃប្រចាំអង្គការសហប្រជាជាតិ បានឱ្យដឹងថាស្ថាប័នពិភពលោកមួយនេះ នឹងធ្វើការជួបជុំគ្នាធំមួយ នៅយប់ថ្ងៃសុក្រ ដើម្បីផ្ដល់កិត្តិយសថ្វាយដល់ព្រះមហាក្សត្រ Bhumibol Adulyadej ដោយការគោរពវិញ្ញាណក្ខន្ធព្រះអង្គ។
ឯកអគ្គរដ្ឋទូតបានបញ្ជាក់ទៀតថា សម័យប្រជុំរបស់អង្គការសហប្រជាជាតិនឹងធ្វើឡើង នៅម៉ោង១០ ថ្ងៃសុក្រនេះ នៅពេលនោះ តំណាងប្រទេសជាច្រើននឹងឡើងថ្លែងពីគុណសម្បត្តិរបស់ព្រះមហាក្សត្រ។
បើតាមឯកអគ្គរដ្ឋទូតថៃរូបនេះ លោកស្រី Samantha Power ឯកអគ្គរដ្ឋទូតអាមេរិកប្រចាំអង្គការសហប្រជាជាតិ ត្រូវគេរំពឹងថា លោកស្រី នឹងឡើងសុរន្ទកថាមុនគេដើម្បីគោរពវិញ្ញាណក្ខន្ធព្រះមហាក្សត្រ។
ព្រះមហាក្សត្រ Bhumibol Adulyadej បានសោយទិវង្គតកាលពីថ្ងៃទី១៣ តុលា ក្នុងព្រះជន្មាយុ៨៨ព្រះវស្សា ដោយរោគាពាធ។
រដ្ឋាភិបាលថៃ បានប្រកាសកាន់ទុក្ខរយៈពេលមួយឆ្នាំ ដោយតម្រូវឱ្យពលរដ្ឋថៃទាំងអស់ ស្ថិតក្នុងស្ថានភាពស្ងប់ស្ងាត់ និងស្លៀកសំលៀកបំពាក់ខ្មៅ។ មរណភាពរបស់ព្រះមហាក្សត្រថៃ បានធ្វើអោយមេដឹកនាំមួយចំនួន បានសម្ដែងការសោកស្ដាយយ៉ាងខ្លាំង ក្នុងនោះ មានលោក អូបាមា ប្រធានាធិបតីអាមេរិក និងព្រះមហាក្សត្រអង់គ្លេសផងដែរ៕
ប្រភព: Bangkok Post
