ភ្នំពេញ៖ អ្នកនាំពាក្យក្រសួងការបរទេសកម្ពុជា លោក ជុំ សន្ទរី បានអះអាងថា ឧបការីរដ្ឋមន្ត្រីការបរទេសអាមេរិក ទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក លោក Daniel Russel បានទទូចឲ្យគណបក្សសង្គ្រោះជាតិចូលប្រជុំសភាវិញ ដើម្បីឲ្យស្ថានការណ៍នយោបាយវិលរកភាពដើមវិញ។
លោក ជុំ សន្ទរី បន្តថា លោក Daniel Russel បានលើកឡើងដូចនេះ នៅក្នុងជំនួបមួយ ជាមួយលោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា និងកិច្ចសហការអន្តរជាតិ នៅថ្ងៃទី២៧ ខែតុលា ឆ្នាំ២០១៦ នេះនៅទីស្ដីការក្រសួងការបរទេស។
តាមអ្នកនាំពាក្យ រូបនេះ លោក ប្រាក់ សុខុន បាន ប្រាប់ទៅ ឧបការីរដ្ឋមន្ត្រីការបរទេសអាមេរិកថា តំណាងរាស្ត្រគណបក្សប្រឆាំងអាច នឹងវិលមកចូលរួមប្រជុំសភាក្នុងសភាក្នុងពេលឆាប់ៗនេះ។ តែយ៉ាងណា ក៏ដោយ នេះគ្រាន់តែជា អះអាងឯកតោភាគីរបស់ អ្នកនាំពាក្យក្រសួងការបរទេសកម្ពុជា ខណៈ លោក Daniel Russel មិនបានឆ្លើយតប ប្រាប់អ្នកសារព័ត៌មាន ពីរឿងនេះទេ ។
ក្នុងបទសម្ភាសន៍ខ្លីមួយជាមួយ វិទ្យុស្ត្រី លោកស្រី មួរ សុខហួរ ប្រធានគណៈកម្មាការកិច្ចការទំនាក់ទំនងសាធារណៈ នៃគណបក្សសង្គ្រោះជាតិបានឱ្យដឹងថា ជំនួប ធ្វើឡើង រវាង លោក Daniel Russel ជាមួយលោក កឹម សុខា នៅស្នាក់ការបក្សកាលពីព្រឹកមិញនេះ លោកឧបការី ក្រសួងការបរទេសអាមេរិក បាន លើកឡើងថា ជំលោះនយោបាយ គឺជាក្ដីបារម្ភរបស់សហគមន៍អន្តរជាតិ ចំពោះលទ្ធផលបោះឆ្នោត។
តាមលោកស្រី មួរ សុខហួរ លោក Daniel Russel ចង់ឃើញវត្តមាន លោក សម រង្ស៊ី និងលោក កឹម សុខា មានវត្តមានលើសង្វៀនប្រកួតការបោះឆ្នោតខាងមុខនេះ ។
លោក Daniel Russel បានមកធ្វើទស្សនកិច្ចនៅកម្ពុជានៅពេលនេះ បន្ទាប់ពីលោក សមរង្ស៊ី បានទៅជួបលោក នៅសេតវិមាន កាលពី ០២សប្ដាហ៍មុន ហើយទស្សនកិច្ច របស់លោក ត្រូវបានមើលឃើញថា ជាការស្ទាបស្ទង់មតិមួយថ្មីទៀតរបស់ រដ្ឋាភិបាលអាមេរិក ចំពោះស្ថានការណ៍នយោបាយ និងសិទ្ធិមនុស្ស នៅកម្ពុជា៕
