នគរបាលនៃនាយកដ្ឋានស៊ើបអង្កេត និងអនុវត្តនីតិវិធី សហការជាមួយកម្លាំងស្នងការដ្ឋាននគរបាលរាជធានីភ្នំពេញ បានចាប់ខ្លួនជនជាតិវៀតណាមដែលរស់នៅខុសច្បាប់ក្នុងប្រទេសកម្ពុជាចំនួន ៥១នាក់បន្ថែមទៀតកាលពីព្រឹកថ្ងៃទី២៩ កក្កដា ឆ្នាំ២០១៥។ ការចាប់ខ្លួន និងបណ្តេញជនជាតិវៀតណាម នេះធ្វើឡើងបន្ទាប់ពីកម្ពុជាមានជម្លោះជាមួយវៀតណាមជុំវិញរឿងព្រំដែន ដែលមកដល់ពេលនេះ នៅមិនទាន់ស្រកកម្តៅនៅឡើយទេ។ ក៏ប៉ុន្តែអ្នកវិភាគសង្គមបានលើកឡើងថា ការចាប់ខ្លួនជនជាតិវៀតណាមនេះ គឺជារឿងផ្ទៃក្នុងនយោបាយ ច្រើនជាងនយោបាយការទូតទាក់ទងនឹងជម្លោះព្រំដែនកម្ពុជាវៀតណាមទៅវិញ។
ប្រតិបត្តិការកាលពីព្រឹកថ្ងៃ២៩ ខែកក្កដា ត្រូវបានធ្វើឡើងនៅបុរីអង្គរភ្នំពេញ ស្ថិតក្នុងភូមិបន្លាស្អិត សង្កាត់ឃ្មួញ ខណ្ឌសែនសុខ រាជធានីភ្នំពេញ។ ការចាប់ខ្លួនជនជាតិវៀតណាមដែលរស់នៅមិនស្របច្បាប់ក្នុងប្រទេសកម្ពុជាជាច្រើនសន្ធឹកសន្ធាប់នេះ មិនធ្លាប់មានពីមុនមក ចាប់តាំងពីការឡើងកាន់អំណាចរបស់លោកនាយករដ្ឋមន្រ្តី ហ៊ុន សែន ។
ទាក់ទងនឹងបញ្ហានេះ លោក បណ្ឌិត កែម ឡី អ្នកស្រាវជ្រាវការអភិវឌ្ឍសង្គម បានមានប្រសាសន៍ថា ការបណ្តេញជនជាតិវៀតណាមនេះ គឺជាលក្ខណៈនយោបាយផ្ទៃក្នុងជាជាងជម្លោះការទូតរវាងកម្ពុជា និងវៀតណាមដោយសារបញ្ហាព្រំដែន។
លោកបន្ថែមថា ប្រជាជនកម្ពុជាមិនបោះឆ្នោតឲ្យគណបក្សប្រជាជន ព្រោះមើលឃើញពីហានីភ័យដែលជនអន្តោប្រវេសន៍វៀតណាមបានហូរចូលមកកម្ពុជាច្រើនឡើងៗ។ ហេតុផលនេះហើយ ទើបធ្វើឲ្យរដ្ឋាភិបាលកម្ពុជា ដែលគ្រប់គ្រងដោយ គណបក្សប្រជាជនកម្ពុជា ត្រូវតែដោះស្រាយបញ្ហានេះ ក្នុងគោលបំណងដើម្បីទាក់ទាញប្រជាប្រិយភាពពីប្រជាពលរដ្ឋ។
ពាក់ព័ន្ធនឹងការបណ្តេញជនជាតិវៀតណាមនេះដែរ អ្នកវិភាគនយោបាយ លោក អ៊ូ វីរៈ បានអត្ថាធិប្បាយថា នេះមិនមែនជាបញ្ហាព្រំដែននោះទេ តែជាសម្ពាធនយោបាយផ្ទៃក្នុងរបស់កម្ពុជា។ លោកបន្ថែមថា គណបក្សប្រជាជនកម្ពុជាកន្លងមក មិនបានដោះស្រាយបញ្ហា ជនអន្តោប្រវេសន៍ វៀតណាមនោះទេតែទើបចាប់ផ្តើមនៅអាណត្តិនេះ គឺដោយសារខ្លាចបាត់បង់ការគាំទ្រពីប្រជាជនដូចអាណត្តិនេះ។
ឆ្លើយតបនឹងបញ្ហានេះ អ្នកនាំពាក្យទីស្តីការគណរដ្ឋមន្រ្តីលោក ផៃ ស៊ីផាន បានឲ្យដឹងថា ការដែលរដ្ឋាភិបាលចាប់បញ្ជូនជនជាតិវៀតណាមនេះ មិនមែនជាការឆ្លើយតាមការទូតដែលវៀតណាម ព្រងើយកន្តើយរឿងព្រំដែននោះទេ តែការចាប់បញ្ជូនជនជាតិវៀតណាមគឺជាការចាប់ផ្តើមអនុវត្តច្បាប់ អន្តោប្រវេសន៍របស់កម្ពុជា។ លោកបន្ថែមទៀតថា បានជាកម្ពុជាទើបចាប់ផ្តើមបណ្តេញជនជាតិ វៀតណាម គឺដោយសារស្ថានភាពនយោបាយ និងការទំនាក់ទំនងល្អជាមួយប្រទេសវៀតណាម ទើបកម្ពុជាមានលទ្ធភាពបញ្ជូន ហើយភាគីវៀតណាមរងចាំទទួល។
គួរបញ្ជាក់ថា ក្នុងរយៈពេល៧ខែ ក្នុងឆ្នាំ២០១៥នេះ កម្ពុជាបានបណ្តេញជនអន្តោប្រវេសន៍ វៀតណាមដែលរស់នៅលើទឹកដីកម្ពុជាដោយខុសច្បាប់ ជិត៣ពាន់នាក់ដែលនេះជាប្រវត្តិសាស្រ្តកម្ពុជាក្រោមការដឹកនាំរបស់លោកនាយករដ្ឋមន្រ្តីហ៊ុន សែន៕
