ភ្នំពេញ៖ សាលាដំបូងរាជធានីភ្នំពេញ បើកសវនាការជំនុំជម្រះលើសំណុំរឿងលោក ហុង សុខហួរ អតីតសមាជិកព្រឹទ្ធសភា មកពីគណបក្សសម រង្ស៊ី នៅថ្ងៃទី២៦ ខែតុលា ឆ្នាំ២០១៦នេះ លើករណីបង្ហោះឯកសារពាក់ព័ន្ធសន្ធិសញ្ញាព្រំដែន កម្ពុជា-វៀតណាម ឆ្នាំ១៩៧៩ ។
តាមសេចក្ដីជូនដំណឹងរបស់សាលាដំបូងរាជធានីភ្នំពេញ ផ្ញើជូន លោក មេធាវី ជូង ជូងី ការកោះហៅលោក ជូង ជូងី នាពេលនេះ ដើម្បី ជុំនុំជម្រះរឿងក្ដីលោក ហុង សុខហួរ ដែលកន្លងមកសាលាឧទ្ធរណ៍ និងតុលាការកំពូល បានសម្រេចដាក់បទចោទលើ ហុង សុខហួរ ចំនួនបី គឺ ក្លែងឯកសារសាធារណៈ ប្រើប្រាស់ឯកសារសាធារណៈក្លែង និងញុះញង់បង្កឲ្យមានភាពវឹកវរធ្ងន់ធ្ងរដល់សន្ដិសុខសង្គម។
តាមសេចក្ដីជូនដំណឹងរបស់សាលាដំបូងរាជធានីភ្នំពេញដដែល សវនាការជុំនុំជម្រះលើ លោក ហុង សុខហួរ ត្រូវចាប់ផ្ដើម នៅវេលាម៉ោង៨ និង៣០នាទីព្រឹក នៅសាលជាន់ទី១នៃសលាដំបូងរាជធានីភ្នំពេញ ។
លោក ហុង សុខហួរ ត្រូវបានសមត្ថកិច្ចចាប់ខ្លួនកាលពីថ្ងៃព្រឹកថ្ងៃទី១៥ ខែសីហា ឆ្នាំ២០១៥ ។ ការចាប់ខ្លួន លោក ហុង សុខហួរ ធ្វើឡើង មួយសប្ដាហ៍ បន្ទាប់ពីសម្ដេច ហ៊ុន សែន បានប្រកាសឱ្យចាប់ខ្លួន បន្ទាប់ពីលោកចោទ អតីតសមាជិកព្រឹទ្ធសភា បក្សប្រឆាំងរូបនេះ ថា ក្បត់ជាតិ ទាក់ទិននិងការបង្ហោះផែនទីសន្ធិសញ្ញាព្រំដែន កម្ពុជា-វៀតណាម ឆ្នាំ១៩៧៩៕