ក្រុងម៉ានីល ៖ ជាថ្មីម្តងទៀតប្រធានាធិបតីហ្វីលីពីនលោក Rodrigo Duterte បានវាយប្រហារជាពាក្យសម្តីទៅកាន់សហរដ្ឋអាមេរិកនៅថ្ងៃអង្គារ ទី២៥ តុលានេះថា ប្រសិនបើលោកនៅកាន់តំណែងនេះយូរប៉ុណ្ណា នោះ នោះលោកនឹងមិនធ្វើសមយុទ្ធយោធាជាមួយជាក្រុងវ៉ាស៊ីនតោនឡើយ ហើយលោកចង់ឱ្យអាមេរិកបំភ្លេចចោលកិច្ចព្រមព្រៀងយោធាហៅកាត់ថា EDCA រវាងប្រទេសទាំងពីរចោលទៅ។
លោក Duterte បានព្រមានទៀតថា លោកប្រឆាំងដាច់ខាតនឹងវត្តមានកងទ័ពបរទេសណាមួយដែលតាំងនៅក្នុងប្រទេសរបស់លោក ហើយសហ រដ្ឋអាមេរិកប្រសិនជាអាច គឺត្រូវបំភ្លេចចោលនូវកិច្ចព្រមព្រៀងសហប្រតិបត្តិការការពារជាតិ (EDCA) ជាមួយនឹងប្រទេសហ្វីលីពីន បើសិនជាអាមរិកចង់ឱ្យសម្ព័ន្ធភាពរវាងប្រទេសនៅរក្សាបានយូរអង្វែងនោះ។
លោក Duterte បន្តថា សហរដ្ឋអាមេរិកមិនគួរតាមព្យាបាទហ្វីលីពីនទៀតនោះទេ ពោលគឺ«កុំធ្វើខ្លួនដូចឆ្កែជាប់ចំណង» ព្រោះជៀសវាងកុំឱ្យមានការច្រឡំអំពីអនាគតចំណងទំនាក់ទំនងសម្ព័ន្ធមិត្តរវាងប្រទេសទាំងពីរ។
លោក Duterte បាននិយាយមុនពេលលោកធ្វើដំណើរទៅបំពេញទស្សនកិច្ចនៅប្រទេសជប៉ុនថា៖ «ខ្ញុំសម្លឹងទៅពេលវេលាខាងមុខ ដោយខ្ញុំមិនចង់ឃើញកងទ័ព ឬ យោធាណាបរទេសណាមួយតាំងក្នុងប្រទេសឡើយ ហើយចង់ឃើញតែទាហានហ្វីលីពីននៅប្រទេសតែប៉ុណ្ណោះ៕
ប្រភព៖CNA
