ក្រសួងការពារជាតិនៃប្រទេសណ័រវេ បានប្រកាសថា សហរដ្ឋអាមេរិក នឹងពង្រាយកងទ័ពម៉ារីន ៣៣០នាក់ នៅជាប់ព្រំដែនទឹកជាមួយប្រទេសរុស្ស៊ី។
តាមក្រសួងការបរទេសណ័រវេ ទ័ពជើងទឹកអាមេរិកនឹងស្ថិតនៅចម្ងាយ១ពាន់គីឡូម៉ែត ពីប្រទេសរុស្ស៊ី ហើយការដាក់ពង្រាយនេះ ជាផ្នែកមួយនៃការចូលរួមហ្វឹកហ្វឺន និងពង្រឹងសន្ដិសុខតំបន់។
តាមបណ្ដាញផ្សាយព័ត៌មាន Chanel News Asia ការដាក់ពង្រាយកងទ័ពម៉ារីនអាមេរិក ធ្វើឡើង បន្ទាប់ពីភាពតានតឹងបានបន្ដកើនឡើង រវាងរុស្ស៊ី និងលោកខាងលិច ដោយសារតែអាមេរិក និងរុស្ស៊ី ប្រឈមមុខគ្នាករណីអ៊ុយក្រែន និងសង្គ្រាមនៅស៊ីរី។
សហរដ្ឋអាមេរិក ដែលជាសមាជិកមួយនៃអង្គការយោធាណាតូ ប្រទេសមហាអំណាចមួយនេះ តែងតែបញ្ចេញអំណាចយោធា របស់ខ្លួនប្រឈមជាមួយរុស្ស៊ី ដោយយកសម្ព័ន្ធភាព ណាតូរបស់ខ្លួនភ្ជាប់ជាមួយ។
រដ្ឋមន្ដ្រីការបរទេសការពារជាតិណ័រវេ លោក Ine Eriksen Soreide បាននិយាយនៅក្នុងសេចក្ដីថ្លែងការណ៍របស់លោកថា ណ័រវេ និងណាតូ ស្វាគមន៍សហរដ្ឋអាមេរិកដែលមានវត្តមានទ័ពដើម្បីជាផ្នែកមួយ នៃការពង្រឹងសម្ព័ន្ធភាព និងការហ្វឹកហ្វឺនជំនាញកងទ័ព៕ ប្រភព:CNA
