ភ្នំពេញ ៖ សម្តេចនាយករដ្ឋមន្ត្រី ហ៊ុន សែន នឹងទៅចូលរួមកិច្ចប្រជុំកំពូល នៅថ្ងៃទី២៥ ខែតុលា ឆ្នាំ២០១៦។ កិច្ចប្រជុំកំពូលលើកទី ៨ នេះមានមេដឹកនាំ កម្ពុជា ឡាវ មីយ៉ាន់ម៉ា និង វៀតណាម និងកិច្ចប្រជុំមួយទៀតស្ដីពីយុទ្ធសាស្ត្រ នៃកិច្ចសហប្រតិបត្តិការ សេដ្ឋកិច្ច អាយ៉េយ៉ាវ៉ាឌី-ចៅប្រាយ៉ា-មេគង្គ លើកទី ៧ រួមទាំងវេទិកាសេដ្ឋកិច្ចពិភពលោកស្តីពីតំបន់មេគង្គលើ។
ក្រសួងការបរទេស និងសហប្រតិបត្តិការអន្តរជាតិ បានឲ្យដឹងថា កិច្ចប្រជុំកំពូលលើកទី ៨ លើប្រធានបទ “ចាប់យកឱកាស កសាងអនាគត” ។
ចំណែកកិច្ចប្រជុំយុទ្ធសាស្ត្រ នៃកិច្ចសហប្រតិបត្តិការ សេដ្ឋកិច្ច អាយ៉េយ៉ាវ៉ាឌី -ចៅប្រាយ៉ា -មេគង្គ លើកទី ៧ លើប្រធានបទ “ឆ្ពោះទៅរកអនុតំបន់មេគង្គ ប្រកបដោយឋាមពល និងវិបុលភាព”។ រីឯ វេទិកាសេដ្ឋកិច្ចពិភពលោកស្តីពីតំបន់មេគង្គ លើប្រធានបទ“ការស្វែងរកជោគជ័យរួមគ្នាក្នុងតំបន់មេគង្គ”។
កិច្ចប្រជុំនេះ នឹងប្រព្រឹត្តទៅពីថ្ងៃទី ២៤ ដល់ថ្ងៃទី ២៦ ខែតុលា ឆ្នាំ២០១៦ នៅទីក្រុងហាណូយ ប្រទេសវៀតណាម។
ប្រតិភូកម្ពុជាដឹកនាំដោយសម្ដេចនាយករដ្ឋមន្ត្រី ក្នុងនោះក៏រួមមានលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន, លោក ថោង ថុន រដ្ឋមន្ត្រីក្រសួងទេសចរណ៍, លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ព្រមទាំងសមាជិក រាជរដ្ឋាភិបាលមួយចំនួនទៀត៕
