ភ្នំពេញ ៖ នៅព្រឹកថ្ងៃទី២៣ ខែតុលា ឆ្នាំ២០១៦នេះ គឺជាខួបលើកទី ២៥ឆ្នាំ នៃកិច្ចព្រមព្រៀងសន្តិភាពទីក្រុងបារីស ២៣ តុលា ឆ្នាំ ១៩៩១ ដែលនាំឲ្យកម្ពុជាបញ្ចប់សង្គ្រាមស៊ីវិលក្នុងទសវត្សន៍ ៧០។
ប្រមុខរាជរដ្ឋាភិបាលនាយករដ្ឋមន្ត្រី ហ៊ុន សែន បានប្រារព្ធពិធីនេះ នៅឯមជ្ឈមណ្ឌលពិព័រណ៍ និង សន្និបាតកោះពេជ្រ ដោយបានជួបសំណេះសំណាកជាមួយអាជ្ញាធរ មន្ត្រីរាជការ និងកងកម្លាំងប្រដាប់អាវុធ។
ចំណែក គណបក្សសង្គ្រោះជាតិវិញ បានប្រារព្ធទិវារំលឹកខួប២៥ឆ្នាំ កិច្ចព្រមព្រៀងសន្តិភាពទីក្រុងបារីស ២៣ តុលា ឆ្នាំ ១៩៩១នេះ នៅទីស្នាក់ ការគណបក្សសង្គ្រោះជាតិ ដោយលោក កឹម សុខា បានថ្លែងសន្ទរកថា ជុំវិញកិច្ចព្រមព្រៀងទីក្រុងបារីសនេះ ហើយលោកក៏បាន សំណេះ សំណាលជាមួយសកម្មជនបក្ស និងគាំទ្រជាច្រើនរយនាក់។
កិច្ចព្រមព្រៀងទីក្រុងប៉ារីស មានប្រទេសចំនួន ១៨ ក្នុងនោះមានក្រុមប្រឹក្សាសន្ដិសុខអង្គការសហប្រជាជាតិ ៥ ប្រទេសផងដែរ គឺ អាមេរិក បារាំង អង់គ្លេស រុស្ស៊ី និងចិន គឺជាអ្នកធ្វើអោយមានការឯកភាពជាតិខ្មែរឡើងវិញ ហើយបានបញ្ចប់សង្គ្រាម ស៊ីវិលជាង ២ទសវត្សរ៍។ បន្ថែមលើនេះ ភាគីជម្លោះខ្មែរទាំង ៤ ភាគីបានវិលមកប្រកួតប្រជែងគ្នាវិញ តាមលក្ខណៈការដណ្ដើមអំណាចចេញពីការបោះឆ្នោតដោយប្រជាជន៕
