ភ្នំពេញ៖ ក្រសួងធនធានទឹក និងឧតុនិយម ចេញសេចក្ដីជួនដំណឹងមួយដោយបញ្ជាក់ថា មានខេត្ដចំនួន ១២ នឹងប្រឈម រងគ្រោះដោយជំនន់ទឹកភ្លៀងចាប់ពីថ្ងៃទី ២២ ដល់ថ្ងៃទី ៣១ ខែ តុលា ឆ្នាំ ២០១៦។
តាមការបញ្ជាក់របស់ក្រសួងធនធានទឹកឲ្យដឹងថា ប្រព័ន្ធសម្ពាធទាប គឺនៅតែបន្ដអូសកាត់ពីលើព្រះរាជាណាចក្រកម្ពុជា ។ ហើយប្រព័ន្ធសម្ពាធទាបមួយនៃប្រព័ន្ធសម្ពាធទាប ដែលកំពុងស្ថិតនៅក្នុងសមុទ្រចិនខាងត្បូង នឹងវិវត្ដទៅជាសម្ពាធទាបសកម្ម ដែលជម្រុញឲ្យប្រព័ន្ធសម្ពាធទាបកាន់តែមានឥទ្ធិពលមកលើខេត្ដមួយចំនួននៃប្រទេសកម្ពុជា។
យោងតាមការព្យាករណ៍ ស្ថានភាពអាកាសធាតុ ចាប់ពីថ្ងៃទី ២២ ដល់ថ្ងៃទី ៣១ ខែតុលា ឆ្នាំ២០១៦ បញ្ជាក់ថា ភ្លៀង នឹងបង្កើនការធ្លាក់រាយប៉ាយលើផ្ទៃប្រទេស ជាមួយនឹងបរិមាណកើនឡើងជាលំដាប់ពិសេស ខេត្ដកំពង់ស្ពឺ ខេត្ដកណ្ដាល ខេត្ដកំពត ខេត្ដតាកែវ ខេត្ដស្វាយរៀង ខេត្ដកំពង់ឆ្នាំ ខេត្ដខេត្ដត្បូងឃ្មុំ ខេត្ដក្រចេះ ខេត្ដកំពង់ចាម និងខេត្ដព្រៃវែង អាចនឹងមានភ្លៀងធ្លាក់ជាបន្ដបន្ទាប់ក្នុងបរិមាណពីបង្គួរទៅច្រើន ។ ចំណែកខេត្ដកោះកុង និងខេត្ដព្រះសីហនុ អាចនឹងមានភ្លៀងធ្លាក់ច្រើន។
តាមសេចក្ដីជួនដំណឹងដដែលនេះ ក្រសួងធនធានទឹក និងឧតុនិយមក៏បាន អំពាវនាដល់អាជ្ញាធរដែលពាក់ព័ន្ធ ក៏ដូចជាសាធារណជនទាំងអស់ត្រូវតែបង្កើនការយកចិត្ដទុកដាក់ប្រុងប្រយ័ត្ន ចំពោះជំនន់ទឹកភ្លៀងដែលអាចកើតមានឡើងក្នុងរយៈពេលនៃចុងខែតុលានេះ៕
