ភ្នំពេញ៖ អគ្គនាយកដ្ឋានអន្ដោប្រវេសន៍បង្គាប់ទៅបណ្ដាច្រកទ្វារ អាកាសយានដ្ឋានអន្ដរជាតិទាំងបី ដែលរួមមាន រាជធានីភ្នំពេញ សៀមរាប ក្រុងព្រះសីហនុ និងប៉ុស្ដិ៍ច្រកទ្វារព្រំដែនអន្ដរជាតិនានាជួយទប់ស្កាត់ កុំឲ្យលោក សម រង្ស៊ី វិលចូលប្រទេសកម្ពុជាវិញបាន ។
លិខិតរបស់អគ្គនាយកដ្ឋានអន្ដោប្រវេសន៍មានខ្លឹមសារទាំងស្រុងដូចថា៖« ដើម្បីចូលរួមសហការ និងអនុវត្ដតាមខ្លឹមសារលិខិតលេខ ១៥១ រ.ប.ក ចុះថ្ងៃទី ១២ ខែ តុលា ឆ្នាំ២០១៦ របស់ទីស្ដីការគណដ្ឋមន្ដ្រី ឲ្យមានប្រសិទ្ធិភាពសូមឯកឧត្ដមនិងលោកជំទាវ អគ្គនាយករង និងលោកប្រធាននាយកដ្ឋាន ទាំងអស់យកចិត្ដទុកដាក់ក្រើនរំលឹក ពង្រឹងការត្រួតពិនិត្យ នៅតាមបណ្ដាច្រកទ្វារអាកាសយានដ្ឋានអន្ដរជាតិទាំងបីរួមមាន រាជធានីភ្នំពេញ សៀមរាប និងក្រុងព្រះសីហនុ ក៏ដូចជាប៉ុស្ដិ៍ច្រកទ្វារព្រំដែនអន្ដរជាតិនានា ។ ត្រូវរាយការណ៍ជាបន្ទាន់ក្នុងករណីដែលបុគ្គល សម រង្ស៊ី បានចាកចេញផុតពីយន្ដហោះ នៃប៉ុស្ដិ៍ច្រកទ្វារអាកាសយានដ្ឋានទាំងបី ឬតាមបណ្ដាប៉ុស្ដិ៍ច្រកទា្វរព្រំដែនអន្ដរជាតិនានា ព្រមទាំងចាត់វិធានការតាមផ្លូវច្បាប់ដើម្បីកុំឲ្យបុគ្គលនេះចូលមកក្នុងកម្ពុជាបាន »។
បន្ថែមពីនេះលិខិតនេះក៏បានស្នើឲ្យមន្ដ្រីអាជ្ញាធរទាំងអស់ចាត់វិធានការផ្សេងៗ ទៅតាមការចាំបាច់ដោយអនុវត្ដឲ្យបានម៉ត់ចត់ និងទទួលបានប្រសិទ្ធិភាពខ្ពស់ ស្របទៅតាមខ្លឹមសារលិខិតរបស់ទីស្ដីការគណរដ្ឋមន្ដ្រី ។
លិខិតរបស់ អគ្គនាយកដ្ឋានអន្ដោប្រវេសន៍ធ្វើឡើងនៅថ្ងៃទី ១៨ តុលា ហើយចុះហត្ថលេខាដោយ នាយឧត្តមសេនីយ៍សុខ ផល ដែលត្រូវបានផ្សព្វផ្សាយនៅថ្ងៃសៅរិ៍ទី២២ តុលានេះ។
សូមជម្រាបថាវិធានការរបស់អគ្គនាយកដ្ឋានអន្ដោប្រវេសន៍ធ្វើបន្ទាប់ពី គណៈរដ្ឋមន្ដ្រីបានប្រាប់ទៅ លោក សុខ ផល ឱ្យពិនិត្យ និងផ្ទៀងផ្ទាត់គ្រប់មធ្យោបាយទាំងអស់ គឺ ធ្វើយ៉ាងណាកុំអោយលោកសម រង្ស៊ី ជាន់ដីកម្ពុជា ដាច់ខាត។ សេចក្ដីប្រកាសនេះ បានដាក់ចុះនូវលក្ខខណ្ឌ ៤ ចំនុចមានដូចតទៅ៖
១.គ្រប់ក្រុមហ៊ុនអាកាសចរទាំងអស់ដែលធ្វើប្រតិបត្តិការហោះហើរមកកម្ពុជា មិនត្រូវអនុញ្ញាតឱ្យបុគ្គលសមរង្ស៊ី ឡើងយន្ដហោះមកកម្ពុជាទេ ហើយត្រូវផ្ដល់របាយការណ៍ជាទៀងទាត់ អំពីការទិញសំបុត្រយន្ដហោះមកកម្ពុជា ។
២.ក្នុងករណីដែលលោក សម រង្ស៊ី ធ្វើដំណើរមកកម្ពុជា យន្ដហោះនោះនឹងត្រូវបង្វែង វិលត្រឡប់ទៅកាន់អាកាសយាន្ដដ្ឋានដើមវិញ ដោយមិនអនុញ្ញាតឱ្យចុះចតនៅកម្ពុជាឡើយ។
៣.ក្នុងករណីយន្ដហោះដឹកលោក សម រង្ស៊ី ចុះចតនៅអាកាសយាន្ដណាមួយនៅកម្ពុជា និងមិនត្រូវឲ្យភ្ញៀវចាកចេញពីយន្ដហោះឡើយ ដោយត្រូវបញ្ជាអោយត្រឡប់ទៅអាកាសយាន្ដដា្ឋនដើមវិញ។
៤.ក្នុងករណីដែលបុគ្គលនេះបានចាកចេញផុតពីយន្ដហោះ នគរបាលអន្ដោប្រវេសន៍ត្រូវចាត់វិធានការតាមផ្លូវច្បាប់ ដើម្បីកុំអោយបុគ្គលសម រង្ស៊ី ចូលក្នុងប្រទេសកម្ពុជា ។
សេចក្ដីសម្រេចរបស់គណៈរដ្ឋមន្ដ្រីធ្វើឡើង ស្របពេលដែលលោក សម រង្ស៊ី បានប្រកាស ពីក្រៅប្រទេសមកថា លោកនឹងវិលត្រឡប់មកកម្ពុជាវិញ នៅពេលឆាប់ៗនេះ គឺដើម្បីដើរចូលគុកជំនួសសកម្មជនរបស់លោក ៕
