ភ្នំពេញ៖ ធនាគារអភិវឌ្ឍន៍អាស៊ី ហៅកាត់ថា ADB ផ្តល់ថវិកាចំនួន ៣០លានដុល្លារ ក្នុងការលើកកម្ពស់ការគ្រប់គ្រងហិរញ្ញវត្ថុសាធារណៈ ក្នុងប្រទេសកម្ពុជា។ តាមរយៈការផ្តល់ប្រាក់កម្ចីនេះនឹងគាំទ្រដល់ការបង្កើនប្រសិទ្ធភាព នៃការផ្តល់សេវាសាធារណៈ និងកំណើនប្រកបដោយបរិយាប័ន្ននៅក្នុងប្រទេសកម្ពុជា។
សេចក្តីប្រកាសព័ត៌មានរបស់ធនាគារអភវិឌ្ឍន៍អាស៊ី ចុះថ្ងៃទី ២០ ខែតុលា ឆ្នាំ២០១៦ ឱ្យដឹងថា ប្រាក់កម្ចីដែលផ្តល់ដល់រដ្ឋាភិបាលនេះ គឺទីមួយនឹងផ្តល់ហិរញ្ញប្បទាន ដល់អនុកម្មវិធី។ ទីពីរ នៃកម្មវិធីពង្រឹងការគ្រប់គ្រងហិរញ្ញវត្ថុសាធារណៈ (SPEMP) ដែលគាំទ្រដល់ការអនុវត្តដំណាក់កាលទីបី នៃកម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈ របស់រាជរដ្ឋាភិបាលកម្ពុជាដែលបែងចែកជា ៤ ដំណាក់កាល។
នាយក ADB លោក Samiuela Tukuafu បានបញ្ជាក់នូវក្នុងសេចក្តីប្រកាសព័ត៌មានថា កម្មវិធីនេះនឹងជួយបង្កើនប្រសិទ្ធិភាព នៃសេវាសាធារណៈ ក្នុងប្រទេសកម្ពុជា រាប់បញ្ចលទាំងសេវាសម្រាប់ក្រុមប្រជាជនក្រីក្រ និងងាយរងគ្រោះផងដែរ គឺតាមរយៈការពង្រឹងការគ្រប់គ្រងចំណាយ និងចំណូលសាធារណៈ និងការផ្សារភ្ជាប់ថវិកា កាន់តែមានប្រសិទ្ធភាព សំដៅលើកកម្ពស់កំណើនប្រកប ដោយបរិយាប័ន្ន និងកាត់បន្ថយភាពក្រីក្រ។
កម្មវិធីពង្រឹងការគ្រប់គ្រងហិរញ្ញវត្ថុសាធារណៈ មានគោលបំណងបង្កើនប្រសិទ្ធភាពនៃការគ្រប់គ្រងចំណាយ និងចំណូលសាធារណៈ តាមបែបផែនចំនួនបីគឺ៖ ការពង្រឹងក្របខណ្ឌគោលនយោបាយ និងគតិយុត្តិ សម្រាប់ការគ្រប់គ្រងចំណាយ និងចំណូលក្រោមការដឹកនាំរបស់ក្រសួងសេដ្ឋកិច្ច និងហិរញវត្ថុ។
សូមជំរាបថាកម្មវិធីនេះនឹងជួយពង្រឹងបន្ថែមទៀតនូវការគាំទ្រដែល ADB បានផ្តល់កន្លងមកដល់ក្រសួងសេដ្ឋកិច្ច និងហិរញវត្ថុ អាជ្ញាធរសវនកម្មជាតិ និងក្រសួងចំនួនបី ដែលធ្វើការងារខាងការអភិវឌ្ឍន៍ជនបទ ក៏ដូចជាពង្រីក ការគាំទ្រដល់ក្រសួងអាទិភាពចំនួនបីទៀតដូចជា៖ ក្រសួងអប់រំយុវជន និងកីទ្បា ក្រសួងការងារនិងបណ្តុះបណ្តាលវិជ្ជាជីវៈ និងក្រសួងសាធារណការ និងដឹកជញ្ជូនជាដើម។
គួររម្លឹកថានាពេលថ្មីៗនេះ ធនាគារអភិវឌ្ឍន៍អាស៊ីបានផ្តល់ប្រាក់កម្ចី ដល់កម្ពុជាចំនួន ៤៥ លានដុល្លារ ដើម្បីលើកកម្ពស់ការទទួលបានការអប់រំ ប្រកបដោយគុណភាពនៅកម្រិតមធ្យមសិក្សាទុតិយភូមិក្នុងប្រទេសកម្ពុជា៕
