អាមេរិក៖ បេក្ខជនប្រធានាធិបតី នៃគណបក្សប្រជាធិបតេយ្យ លោកស្រី Hillary Clinton បាននិយាយចំៗ នៅចំពោះមុខសមភាគីរបស់លោកស្រី គឺ លោក Donald Trump បេក្ខជនមកពីគណបក្សសាធារណរដ្ឋ ដោយនិយាយបែបចំអកថា លោកស្រី មានក្ដីព្រួយបារម្ភ អំពីជោគវាសនារបស់អាមេរិក ស្ថិតនៅក្រោមប្រទេសរុស្ស៊ី បើលោក Trump ឈ្នះឆ្នោត។
លោកស្រី Clinton បានថ្លែងដូចនេះ នៅក្នុងវេទិកា ជជែកដេញដោលនៅថ្ងៃផ្ដាច់ព្រ័ត្រ នៅថ្ងៃព្រហស្បតិ៍ ទី២០តុលានេះ នៅរដ្ឋ Las Vegas។ លោកស្រី Clinton បានវាយប្រហារ លោក Trump ថា ជាមនុស្សអាយ៉ង របស់ប្រធានាធិបតីពូទីន ដែលធ្វើអោយអាមេរិកធ្លាក់អំណាច និងធ្លាក់ឥទ្ធិពលលើឆាកអន្ដរជាតិ។
យ៉ាងណាក៏ដោយ លោក Trump បានបដិសេធ ហើយបានសន្យាថា នឹងដឹកនាំសហរដ្ឋអាមេរិក កាន់តែមានឥទ្ធិពល និងអភិវឌ្ឍន៍ខ្លាំងជាមុន។ ប៉ុន្ដែនៅពេលដែលសួរថា តើលោក Trump ទទួលយកការបរាជ័យរបស់ខ្លួនដែរឬទេ។ លោក Trump បានឆ្លើយយ៉ាងខ្លីថា លោកមិនអាច ចាញ់ឆ្នោតបានទេ។
តាមការស្ទង់មតិចុងក្រោយនេះ លោកស្រី Clinton នៅបន្ដនាំមុខលោក Trump រវាង ៤៧ និង ៤៣ភាគរយ។
នៅសល់តែ៣សប្ដាហ៍ទៀតប៉ុណ្ណោះ ការបោះឆ្នោតអាមេរិក នឹងចាប់ផ្ដើមហើយ គេសង្កេតឃើញ បេក្ខជនទាំង២រូបនេះ មានសកម្មភាពឃោសនាយ៉ាងខ្លាំងនៅទូទាំងប្រទេស ហើយមានប្រធានបទជាច្រើន និយាយទាំងវិស័យសេដ្ឋកិច្ចក្នុងស្រុក សេដ្ឋកិច្ចក្រៅប្រទេស ព្រមទាំងវិស័យសន្ដិសុខ សុខមាលភាពប្រជាជន ជាពិសេសប្រធានបទ សំខាន់ជាងគេ គឺគោលនយោបាយការបរទេសអាមេរិក៕ ប្រភព BBC
