ភ្នំពេញ៖ អ្នករាយការណ៍ពិសេសអង្គការសហប្រជាជាតិលោកស្រី រ៉ូណា ស្មីត បានថ្លែងក្នុងសន្និសីទសារព័ត៌មានកាលពីរសៀលថ្ងៃ ពុធ ទី ១៩ នេះថា កម្ពុជាត្រូវអនុវត្ដកិច្ចព្រមព្រៀងទីក្រុងប៉ារីសដែលនាំឲ្យកម្ពុជា បានសន្ដិភាព ការអភិវឌ្ឍមកដល់ពេលនេះ។ 
លោកស្រីបានបន្ដថា ការអនុវត្ដកិច្ចព្រមព្រៀងទីក្រុងប៉ារីស បានល្អប្រសើគឺជាការគោរព បាននៅការអភិវឌ្ឍប្រកបដោយចីរភាព ការគោរពសិទ្ធិមនុស្សនឹងប្រជាធិបតេយ្យ។ ប៉ុន្ដែលោកស្រី បានណែនាំថា គេមិនត្រូវនាំប្រទេសកម្ពុជាឲ្យធ្លាក់ចូលក្នុងភ្នក់ភ្លើងសង្គ្រាមសារជាថ្មីទៀតនោះទេ។
ជាមួយគ្នានេះលោកស្រីក៏បានថ្លែងថា ការបោះឆ្នោតនៅពេលខាងមុខត្រូវតែមានអ្នកប្រកួតមានវត្ដមានលើសង្វៀនទាំងអស់ គឺការប្រកួតដោយស្នើភាពគ្នា ហើយចំណែកឯប្រព័ន្ធតុលាការដែលជាអ្នកពង្រឹងប្រព័ន្ធយុត្ដិធម៌សង្គមក៏ត្រូវក្លាយជាស្ថាប័ន អនុវត្ដច្បាប់ដោយមិនរើសអើងបក្សពួកដោយមិនប្រកាន់និន្នាការអ្វីឡើយ។ លោកស្រីថា ការកាត់ក្ដីត្រូវតែឈរ លើគោលការណ៍យុត្ដិធម៌ទាំងសងខាង។
លោកស្រី រ៉ូណា ស្មីត ដែលបានមកបំពេញទស្សនៈកិច្ច នៅកម្ពុជាតាំងពីថ្ងៃទី ១០ តុលា គឺលោកស្រីនឹងត្រឡប់ទៅកាន់ទីក្រុង ហ្សឺណែវ ប្រទេសស្វីសវិញ នៅថ្ងៃទី ២០ តុលានេះ បន្ទាប់ពីលោកស្រី បានជួបមន្ដ្រីរដ្ឋាភិបាល មន្ដ្រីសង្គមស៊ីវិល និងគណបក្សប្រឆាំង។ ការធ្វើសន្និសីទសារព័ត៌មានរបស់លោកស្រី រ៉ូណា ស្មីត នៅពេលនេះគឺស្របពេលដែលលោកស្រី ត្រូវធ្វើរបាយការណ៍អំពីការរំលោភសិទ្ធិមនុស្សនៅកម្ពុជាទៅកាន់ក្រុមប្រឹក្សាសិទ្ធិមនុស្សអង្គការសហប្រជាជាតិ នៅពេលលោកស្រីត្រឡប់ទៅដល់ទីក្រុងហ្សឺណែវវិញ។
លោកស្រី រ៉ូណា ស្មីតដែលមកបំពេញទស្សនៈកិច្ចនៅកម្ពុជាសាជាថ្មីនេះ លោកស្រីត្រូវបានក្រុមអង្គការសង្គមស៊ីវិល និងគណបក្សប្រឆាំងបានស្នើសុំលោកស្រី ជួយអន្ដរាគមន៍បញ្ចប់វិបត្ដិនយោបាយនិងការរំលោភសិទ្ធិមនុស្សនៅកម្ពុជា ដែលករណីទាំងនេះលោកស្រីបានប្រាប់អ្នកសារព័ត៌មានថា កម្ពុជាមិនទាន់បានគោរពសិទ្ធិមនុស្ស លទ្ធិប្រជាធិបតេយ្យ ទៅតាមការកំណត់នៃរដ្ឋធម្មនុញ្ញច្បាប់អន្ដរជាតិ និងកិច្ចព្រមព្រៀងទីក្រុងប៉ារីសនោះទេ។
ទោះជាមិនឆ្លើយតបនឹងប្រសាសន៍របស់លោកស្រី រ៉ូណា ស្មិត ក៏ដោយ តែទំនងនិយាយយោងដល់ បក្សប្រឆាំង ដែលប្រកាសធ្វើពិធីរម្លឹក ខួប២៥ឆ្នាំនៃកិច្ចព្រមព្រៀងសន្តិភាពក្រុងប៉ារីស សម្ដេចនាយករដ្ឋមន្ត្រី ហ៊ុន សែន បានថ្លែងអះអាងពីក្រុងប៉ៃលិនមកថា កម្ពុជាមានសន្តិភាពមកដល់ពេលនេះគឺគេមិនត្រូវភ្លេចសា្នដៃ របស់ លោក និងសម្ដេចព្រះបាទ នរោត្ដម សីហនុ ទេ។ ប៉ុន្តែសម្ដេច ហ៊ុន សែន អះអាងថា អ្វីដែលធ្វើឱ្យ មហាគ្រួសារខ្មែរជួបគ្នាមកដល់ពេលនេះ គឺជាការកើតចេញពី កម្ពុជា ខ្លួនឯង។
សម្ដេច ហ៊ុន សែន ក៏បានថ្លែងពីកម្លាំងរបស់ខ្មែរក្រហម ធ្វើសមាហរណកម្ម ជាមួយសង្គមជាតិដែលនាំឱ្យមានសន្តិភាព ដែលសម្ដេចថាក៏ជាស្នាដៃរបស់សម្ដេចដែរ។
ស្របពេលនេះដែរ អង្គការសង្គមស៊ីវិល នៅទូទាំងអាស៊ី ចំនួន ៤០ ដែលធ្វើការងារពាក់ព័ន្ធលើ កិច្ចការពារសិទិ្ធមនុស្ស និងប្រជាធិបតេយ្យ បានចេញសេចក្ដីថ្លែងការណ៍នៅថ្ងៃនេះដោយ បានសរសេរថា អស់រយៈពេល ២៥ឆ្នាំមកហើយ ដែលកិច្ចព្រមព្រៀងសន្តិភាពក្រុងប៉ារីស ត្រូវបានបង្កើតឡើង សម្រាប់ ប្រទេសកម្ពុជា តែ មកដល់ពេលនេះ កម្ពុជា មិនបានអនុវត្តស្មារតី នៃកិច្ចព្រមព្រៀងនេះបានល្អប្រសើរឡើយ។
សេចក្ដីថ្លែងការណ៍រួមរបស់អង្គការអន្តរជាតិ នៃបណ្ដាប្រទេសនៅអាស៊ី បានបន្តថា គេបានមើលឃើញពីការធ្លាក់ចុះ ការគោរពសិទ្ធិមនុស្ស និង ប្រជាធិបតេយ្យ នៅកម្ពុជា ដែលត្រូវបាន កំណត់ដោយកិច្ចព្រមព្រៀងសន្តិភាពក្រុងប៉ារីស២៣ តុលា១៩៩១។
អង្គការអន្តរជាតិនៅអាស៊ី ទាំង៤០នេះ ក៏បានបានទទូចឱ្យកម្ពុជា បញ្ចប់វិបត្តិនយោបាយ ដោះលែងក្រុមប្រឆាំង សង្គមស៊ីវិល ហើយបានទាមទារ ការបោះឆ្នោត ក្រុមប្រឹក្សាឃុំសង្កាត់ និង បោះឆ្នោតសភា ប្រកបដោយ បរិយាកាសដែល គ្មានការភិតភ័យ និង មានភាពត្រឹមត្រូវ។
