ភ្នំពេញ ៖ ថ្លែងក្នុងពិធីបង្សុលរំលឹកខួប ៤ ឆ្នាំថ្វាយដល់វិញ្ញាណក្ខន្ធព្រះបរមរតនកោដ្ឋ សម្ដេចព្រះនរោត្ដម សីហនុ ថ្ងៃទី ១៥ ខែតុលា ឆ្នាំ២០១៦ នេះ លោក កឹម សុខា ប្រធានស្ដីទីគណបក្សសង្គ្រោះជាតិ បានរំលឹកនូវស្នាព្រះហស្ដ និងទឹកព្រះទ័យនៃការរួបរួមជាតិ ផ្សះផ្សាជាតិ និងការកសាងជាតិរបស់ព្រះអង្គក្នុងការដោះស្រាយវិបត្តិសង្គមនាពេលកន្លងមក។ ក្រៅពីរំលឹកនូវស្នាព្រះហស្ត លោកក៏ចង់ឱ្យដួងព្រលឹងព្រះអង្គមកស្ថិតក្នុងខ្លួនអ្នកនយោបាយដើម្បី ឱ្យវិលមករកការឯកភាពគ្នាឡើងវិញ។
ប្រធានស្តីទីគណបក្សសង្គ្រោះជាតិ ដែលបានថ្លែងនៅស្នាក់ការកណ្តាលគណបក្ស ក្នុងពិធីគោរវិញ្ញាណព្រះករុណាសម្តេចព្រះនរោត្តមសីហនុ បានទូលប្រាប់ដួងវិញ្ញាណក្ខន្ធ សម្តេចព្រះ នរោត្តម សីហនុ ថា ឥលូវនេះ ខ្មែរមិនទាន់បានរួបរួមគ្នាស្រួលបួលនៅឡើយ។
លោកបន្តថា នៅតែមានការបែកបាក់គ្នា ការកាប់សម្លាប់គ្នា ឈ្នានីស និងធ្វើទុក្ខបុកម្នេញគ្នា ដែលហេតុនេះលោកចង់ឱ្យបារមីព្រះអង្គមកស្ថិតក្នុងខ្លួនអ្នកនយោបាយខ្មែរទាំងឡាយដើម្បីឱ្យវិលមករកការឯកភាពជាតិ បង្រួបបង្រួមជាតិ ដើម្បីសេចក្តីសុខរបស់ប្រជារាស្ត្រខ្មែរ។ លោក កឹម សុខា៖«ការដឹកនាំរបស់ព្រះអង្គក្តីដែលកូនចៅជំនាន់ក្រោយក្តី គឺសូមឱ្យព្រះវិញ្ញាណក្ខន្ធព្រះអង្គដែលបានទៅសោយសុគតិភព សូមបែរព្រះភ័ក្ត្រ ព្រះវិញ្ញាណក្ខន្ធមកជួយដល់ប្រទេសជាតិយើងជាពិសេសប្រជាពលរដ្ឋខ្មែរយើងដែលនៅរងទុក្ខវេទនា មានការលំបាកគ្រប់បែបយ៉ាងដែលឆ្លងកាត់នូវឧបសគ្គជាច្រើនមកហើយ ហើយមិនទាន់ឆ្លងផុតនេះ សូមព្រះអង្គលោកជួយធ្វើយ៉ាងមិចឱ្យឆ្លងផុតទុក្ខទាំងឡាយហ្នឹង ឱ្យបានប្រជាពលរដ្ឋខ្មែរយើងស្គាល់នូវសេចក្តីសុខសន្តិភាពពិតប្រាកដ។»
ជាទូទៅមន្ត្រីរដ្ឋាភិបាលតែងតែអះអាង កម្ពុជាសព្វថ្ងៃមានសុខសន្តិភាព ហើយស្ថានការណ៍នយោបាយ និងការអភិវឌ្ឍប្រទេសជាតិមានស្ថានភាពល្អធម្មតា។
លោក សួស យ៉ារ៉ា អ្នកនាំពាក្យគណបក្សប្រជាជនកម្ពុជា មានប្រសាសន៍ថា បើតាមលោក លោកយល់ឃើញការឯកភាព គឺត្រូវអនុវត្តតាមច្បាប់ ជាពិសេសគោរពរដ្ឋធម្មនុញ្ញ។ លោកសួស យ៉ារ៉ា ៖«រាល់អ្វីដែលជាការបង្រួបង្រួមជាតិ យើងត្រូវគោរពតាមដំណាក់កាលនៃការអនុវត្តច្បាប់ រដ្ឋធម្មនុញ្ញ និងច្បាប់ទាំងឡាយដែលបានអនុម័តដោយរដ្ឋសភាជាតិ នៅពេលដែលយើងគោរពច្បាប់ទាំងអស់នេះហើយ នោះជាតិយើងរឹងមាំ បង្រួបបង្រួមទៅតាមគោលការណ៍ច្បាប់។»
សម្ដេច នរោត្តម សីហនុ គឺជាព្រះមហាក្សត្រមួយអង្គដែលត្រូវបានប្រជាពលរដ្ឋខ្មែរ ចាត់ទុកជាវីរៈបុរស។ ព្រះអង្គបានទាមទារឯករាជ្យភាពពីអា ណានិគមបារាំងនៅថ្ងៃទី០៩ ខែវិច្ឆិកា ឆ្នាំ១៩៥៣ ហើយព្រះអង្គក៏ជាភាគីហត្ថលេខីនៃកិច្ចព្រមព្រៀងទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១ផងដែរ ដើម្បីបញ្ចប់ជំលោះ ផ្ទៃក្នុងរវាងខ្មែរនិងខ្មែរ តាមរយៈនយោបាយផ្សះផ្សាជាតិ និងរួបរួមជាតិ។
ព្រះអង្គតែតែងចេញព្រះកាយមកដោះស្រាយទំនាស់នយោបាយ នៅគ្រប់កាលៈទេសៈបើមានកើតឡើង៕
