ភ្នំពេញ ៖ អ្នករាយការណ៍ពិសេស ផ្នែកសិទ្ធិមនុស្សអង្គការសហប្រជាជាតិលោកស្រី រ៉ូណា ស្មីត បានទៅគោរពវិញ្ញាណក្ខន្ធលោកបណ្ឌិត កែម ឡី នៅវត្តចាស់កាលពីព្រឹកថ្ងៃទី ១៥ ខែតុលានេះ ដែលនាំឱ្យពលរដ្ឋនិង គណៈកម្មការបុណ្យមានការភ្ញាក់ផ្អើល។
ព្រះអង្គ ប៊ុត ប៊ុនតិញ មានថេរដីកាប្រាប់អ្នកសារព័ត៌មានថា វត្តមានលោកស្រី រ៉ូណា ស្មីត មកចូលរួម និង គោរពវិញ្ញណក្ខន្ធលោកបណ្ឌិត កែម ឡី គឺជាកិត្តិយសខ្លាំងណាស់ ចំពោះអ្នកវិភាគល្បីល្បាញរូបនេះ។
ព្រះអង្គសរសើរលោកស្រី រ៉ូណា ស្មិត ដែលបានមកកាន់វត្តចាស់ ហើយក៏ជាកិត្តិសយមួយដល់គណៈកម្មការបុណ្យផងដែរ។
លោកស្រី រ៉ូណា ស្មីត ប្រេសិតពិសេសរបស់អង្គការសហប្រជាជាតិ (UN) បានមកបំពេញបេសកម្មចំនួន ១០ថ្ងៃ នៅប្រទេសកម្ពុជាដើម្បីពិនិត្យអំពីស្ថានភាពសិទ្ធិមនុស្ស។
ពិធីបុណ្យគម្រប់ខួប ១០០ថ្ងៃបណ្ឌិត កែម ឡី នៅថ្ងៃទី ១៥ តុលានេះ ដោយរាប់បាត្រព្រះសង្ឃប្រមាណ ៥០០ អង្គ។
នៅថ្ងៃទី ១៦ តុលា ស្អែកនេះ គណៈកម្មាធិការបុណ្យសពលោកបណ្ឌិត កែម ឡី នឹងមានដង្ហែរូបសំណាកលោកបណ្ឌិតទៅកាន់ខេត្តតាកែវ។
លោក កែម ឡី ត្រូវបានខ្មាន់កាំភ្លើងបាញ់សម្លាប់កាលថ្ងៃទី១០ កក្កដា ឆ្នាំ២០១៦ ខណៈលោកកំពុង ទទួលទានកាហ្វេ ក្នុងស្តាម៉ាត ស្ថានីយ៍ចាក់សាំងកាលតិច ស្តុបបូកគោ។ អុ្នកសង្កេតការណ៍ជាតិ និងអន្តរជាតិ ចាត់ទុកឃាតកម្មនេះថា ជារឿងគំនុំខាងនយោបាយ ៕
