ភ្នំពេញ ៖ នៅព្រឹកថ្ងៃទី ១៥ ខែ តុលានេះ អង្គការសេដាក (CEDAC) រៀបចំសិក្ខាសាលាស្តីពី៖«ការជំរុញកសិកម្មតាមគោលការណ៍ធម្មជាតិ ដើម្បីនិរន្តរភាពស្បៀង និងធនធានធម្មជាតិ» ក្នុងគោលបំណងលើកស្ទួយកសិកម្មតាមគោលការណ៍ធម្មជាតិ។
នៅក្នុងភាពជាដៃគូជាមួយបណ្តាញសកម្មភាពកាត់បន្ថយថ្នាំពុលកសិកម្មប្រចាំតំបន់អាស៊ីប៉ាស៊ីហ្វិក អង្គការសេដាក(CEDAC) និងសហគមន៍ផ្សារកសិផលធម្មជាតិ បានចូលរួមយុទ្ធនាការសកម្មភាពសាកល ១៦ថ្ងៃ ស្តីអំពី ដី និង ធនធាន ចាប់ពីថ្ងៃទី ០១ តុលា កន្លងមក។
អង្គការសេដាក (CEDAC) និងសហគមន៍ផ្សារកសិផលធម្មជាតិ បានរៀបចំសិក្ខាសាលាស្តីពី«ការជំរុញកសិ កម្មតាមគោលការណ៍ធម្មជាតិ ដើម្បីនិរន្តរភាពស្បៀង និងធនធានធម្មជាតិ» ក្នុងគោលបំណង់ លើកស្ទួយកសិកម្មតាមគោលការណ៍ធម្មជាតិ និងការរួមចំណែករបស់ស្ត្រីជនបទក្នុងការផលិត និងផ្គត់ផ្គង់ស្បៀងប្រកបដោយសុខភាពដល់ប្រជាជន។
សិក្ខាសាលានេះ ក៏លើកឡើងនូវការព្រួយបារម្ភណ៍របស់អ្នកវិភាគទៅលើ សារធាតុគីមីផ្ទុកនៅក្នុងចំណីអាហារ ផលប៉ះពាល់សុខភាព ជាពិសេសលើកុមារ និងបញ្ហាបម្រែបម្រួលអាកាសធាតុ និងពិភាក្សាពីតម្រូវរបស់អ្នកវិភាគ និងស្ត្រីក្នុងការធានាអោយបាននូវធនធានផលិត និង សុវត្ថិភាពស្បៀងអាហារ៕
