ប្រធានាធិបតីរុស្ស៊ី Vladimir Putin ច្រានចោលចំពោះការទាមទារ របស់ប្រទេសបារាំង ដែលស្នើឱ្យដាក់ប្រទេសរុស្ស៊ី នៅក្នុងបទឧក្រិដ្ឋកម្មសង្គ្រាម ដោយសារតែប្រទេសមហាអំណាចមួយនេះ បានប្រើប្រាស់កងទ័ព ទម្លាក់គ្រាប់បែកទៅលើជនស៊ីវិល ក្នុងសង្គ្រាមនៃប្រទេសស៊ីរី។
តាមបណ្ដាញផ្សាយព័ត៌មាន BBC លោក Putin បានថ្លែងដូចនេះ នៅក្នុងបទសម្ភាសន៍ជាមួយប្រព័ន្ធផ្សព្វផ្សាយព័ត៌មានមួយនៃប្រទេសបារាំង កាលពីថ្ងៃពុធ ទី១២ តុលា ម្សិលមិញ។
លោកបានបញ្ជាក់ថា អ្វីដែលចោទប្រកាន់ពីសំណាក់មេដឹកនាំបារាំង មកលើប្រទេសរុស្ស៊ី ថាគ្រាន់តែជាសង្គ្រាមវោហាសាស្ដ្រ ដែលធាតុពិតមិនមានដូចនេះទេ។
កាលពីថ្ងៃម្សិលមិញ ប្រធានាធិបតីបារាំង Francois Hollande បានស្នើថា ការវាយប្រហាររបស់កងទព័រុស្ស៊ីទៅលើទីក្រុងអាលីប៉ូល នៃប្រទេសស៊ីរី ហើយបណ្ដាលឱ្យជនស៊ីវិលស្លាប់ ទៀតនោះ ជា បទល្មើសឧក្រិដ្ឋកម្មសង្គ្រាម ដែលគេត្រូវនាំប្រទេសរុស្ស៊ី ទៅកាន់តុលាការព្រហ្មទណ្ឌអន្ដរជាតិ ICC៕ប្រភព:BBC
