ភ្នំពេញ៖ ប្រធានាធិបតីចិនស៊ី ជីនភីង បានធ្វើដំណើរមកដល់កម្ពុជាហើយ នៅម៉ោងប្រមាណជិតមួយរសៀលនេះ តាមជើងហោះហើររបស់យន្ដហោះចិន។
ការទទួលបដិសណ្ឋារកិច្ចប្រធានាធិបតីចិន បានធ្វើឡើងនៅអាកាសយានដ្ឋានអន្ដរជាតិភ្នំពេញ មានលោក គង់ សំអុល រដ្ឋមន្ត្រីព្រះបរមរាជវាំង និងមន្ដ្រីជាន់ខ្ពស់រដ្ឋាភិបាលមួយ ចំនួនទៀត។
លោក ស៊ី ជីនភីង ដែលមកធ្វើទស្សនកិច្ចផ្លូវការនៅកម្ពុជា ជាលើកដំបូងនេះ ធ្វើឡើងតាមការអញ្ជើញរបស់ព្រះមហាក្សត្រកម្ពុជា ព្រះបាទនរោត្ដមសីហមុនី។
តាមសេចក្ដីជូនដំណឹងរបស់ក្រសួងការបរទេស កម្ពុជា លោក ស៊ី ជីនភីង នឹងចូលគាល់ ព្រះមហាក្សត្រ នៅព្រះបរមរាជវាំង នៅម៉ោង៣រសៀលថ្ងៃនេះ។
លោកប្រធានាធិបតីចិន ស៊ី ជីនភីង មកធ្វើទស្សនកិច្ចនៅកម្ពុជាជាលើកដំបូងនាពេលនេះ មានរយៈពេល២ថ្ងៃ គឺ ពីថ្ងៃទី១៣ ដល់ថ្ងៃទី១៤ តុលា។
ប្រទេសចិន និងកម្ពុជា ត្រូវបានចាត់ទុកថាមានចំណងសាមគ្គីភាព មិត្តភាព ជាប្រវត្តិសាស្ត្រ តាំងពីច្រើនជំនាន់ មកហើយ គឺតាំងពីសម័យសង្គមរាស្ត្រនិយម ក្រោមការដឹកនាំរបស់អតីតព្រះមហាក្សត្រ ព្រះបាទ នរោត្តម សីហនុ៕
