ភ្នំពេញ៖ សេចក្ដីរាយការណ៍នានា ពីប្រទេសថៃ បានឱ្យដឹងថា នាយករដ្ឋមន្ដ្រី ឧត្ដមសេនីយប្រយុទ្ធចាន់អូចា បានសម្រេចលុបចោល គម្រោងធ្វើទសន្សកិច្ច ទោះជានៅក្នុងប្រទេស ឬនៅក្រៅប្រទេសក្ដី។
ការលុបចោលទសន្សកិច្ចនេះ ធ្វើឡើងបន្ទាប់ពី ព្រះមហាក្សត្រ ភូមិបុល អាល់ឌុលយ៉ាដេត ត្រូវបានរាយការណ៍ថា ព្រះអង្គមានព្រះរាជសុខភាព ធ្ងន់ធ្ងរខ្លាំងឡើងៗ។
តាមគម្រោងលោក ប្រាយុទ្ធត្រូវចេញដំណើរ ទៅកាន់បណ្ដាខេត្តមួយចំនួន នៅថ្ងៃព្រហស្បត្តិ៍នេះ និងថ្ងៃសុក្រ ប៉ុន្ដែក្រោយពេលលោកប្រជុំគណៈរដ្ឋមន្ដ្រី លោកក៏បានសម្រេចលុបចោលគម្រោងទសន្សកិច្ចទាំងនោះ។
ព្រះមហាក្សត្រ ភូមិបុល អាឌុលយ៉ាដេត មានព្រះជន ៨៨ព្រះវស្សា ព្រះអង្គបានយាងចូលសម្រាកនៅមន្ទីរពេទ្យ ជាញឹកញប់ ក្នុងរយៈពេលបីឆ្នាំចុងក្រោយនេះ។
តាមវេជ្ជបណ្ឌិតរាជវង្សថៃ ព្រះមហាក្សត្រអង្គនេះ មានជម្ងឺច្រើនយ៉ាង មានដូចជា ទឹកដក់ក្នុងខួរក្បាល និងសម្ពាធឈាមជាដើម។ ស្ដេចថៃអង្គនេះ បានឡើងសោយរាជ្យនៅឆ្នាំ ១៩៤៦ ក្រោយពីបងប្រុសរបស់ព្រះអង្គបានសុគត ដោយអាថ៌កំបាំងបំផុត៕ ប្រភព The Morning News
