តាមហ្វេសប៊ុករបស់ លោក កឹម សុខា ដែលបានបង្ហោះ នៅរសៀលថ្ងៃពុធ ទី១២ តុលា ឆ្នាំ២០១៦ លោកបានជួបជាមួយលោកស្រី រ៉ូណា ស្មីត អ្នករាយការណ៍ពិសេសរបស់ អង្គការសហប្រជាជាតិ ដែលក្នុងជំនួបនោះ ពួកគាត់ បានពិភាក្សា លើបីចំនុចសំខាន់ទាក់ទងនឹងស្ថានការណ៍នយោបាយ និងរឿងរំលោភសិទ្ធិមនុស្សនៅកម្ពុជា។
តាម ហ្វេសប៊ុក របស់លោក កឹម សុខា ដដែល ក្រៅពីជំនួបពិភាក្សាទាំងអស់នេះ លោកស្រី រ៉ូណាស្មីត ក៏បានសម្ដែងការព្រួយបារម្ភអំពី “ស្ថានភាពរំលោភសិទ្ធិមនុស្សនៅកម្ពុជាបច្ចុប្បន្ន” ផងដែរ។
លោក កឹម សុខា បានបញ្ជាក់យ៉ាងដូច្នេះ៖«បន្ទាប់ពីសួរសុខទុក្ខខ្ញុំផ្ទាល់ និងសម្ដែងពីការព្រួយបារម្ភអំពី “ស្ថានភាពរំលោភសិទ្ធិមនុស្សនៅកម្ពុជាបច្ចុប្បន្ន” អ្នកស្រី រ៉ូណាស្មីត បានជជែកពិភាក្សាការងារយ៉ាងស៊ីជម្រៅ ជាមួយខ្ញុំ »។
លោកបានបញ្ជាក់ថា ជំនួបនេះ បានផ្ដោតលើ ប្រធានបទ៣នេះ៖
ទី១.ស្ថានភាព នយោបាយ បច្ចុប្បន្ន
ទី២.ស្ថានភាពច្បាប់ ទាក់ទងនឹងសកម្មជន ថ្នាក់ដឹកនាំគណបក្សសង្គ្រោះជាតិ ជាពិសេសខ្លួនខ្ញុំផ្ទាល់
ទី៣.គោលជំហរគណបក្សសង្គ្រោះជាតិ ចំពោះជាតិពន្ធុ(Stateless)។
តាម ហ្វេសប៊ុក ក្រោយពីការពិភាក្សា ស្វែងយល់ពីគ្នាទៅវិញមកហើយ ភាគីទាំង២ បានប្ដេជ្ញាថានឹងបន្ដទំនាក់ទំនងគ្នាទៀត ជាពិសេសដើម្បីស្វែងរកដំណោះស្រាយ ចំពោះបញ្ហារំលោភច្បាប់ និងរំលោភសិទ្ធិមនុស្សទាំងឡាយនៅកម្ពុជា។
សូមជម្រាបថា លោកស្រី រ៉ូណាស្មីត អ្នករាយាការណ៍ពិសេសអង្គការសហប្រជាជាតិ មកបំពេញបេសកកម្ម នៅកម្ពុជា គឺមានរយៈពេល១០ថ្ងៃ ដែលលោកស្រី បានមកដល់កាលពីថ្ងៃទី១០តុលា។
ជំនួបលោកស្រី ជាមួយលោក កឹម សុខា ប្រធានស្ដីទីគណបក្សសង្គ្រោះជាតិ ធ្វើឡើងបន្ទាប់ពីលោកស្រី បានទៅជួបពិភាក្សា ពីបញ្ហាសិទ្ធិមនុស្ស ជាមួយលោក កែវ រ៉េមី ប្រធានគណៈកម្មាការធិការសិទ្ធិមនុស្សរបស់រដ្ឋាភិបាល ដោយជំនួបនេះ ក៏ផ្ដោតលើបញ្ហាសិទ្ធិមនុស្សផងដែរ៕
