ភាគហ៊ុននៅក្នុងក្រុមហ៊ុន Samsung បានធ្លាក់ចុះបន្ថែមទៀតនៅថ្ងៃពុធ ទី១២ តុលានេះ ហើយក្រុមហ៊ុនផលិតស្មាតហ្វូនមួយនេះនិយាយថា ក្រុមហ៊ុន Samsung នឹងផ្អាក់ការផលិតទូរស័ព្ទស្មាតហ្វូនម៉ូដែល Note 7។
ភាគហ៊ុនក្រុមហ៊ុន Samsung បានធ្លាក់ចុះ ៣% ហើយបន្តធ្លាក់ចុះ ៨% បន្ថែមទៀតកាលពីថ្ងៃអង្គារម្សិលមិញ។
ក្រុមហ៊ុននេះត្រូវបានមើលឃើញថា បានខាតបង់ប្រាក់ប្រមាណ ២០ ពាន់ដុល្លារសហរដ្ឋអាមេរិក លើទីផ្សាររបស់ខ្លួនក្នុងរយៈតែពីរថ្ងៃប៉ុណ្ណោះ។
ទូរស័ព្ទម៉ាក់ Note 7 នេះត្រូវបានគេដឹងថា ថ្មរបស់វាបានផ្ទុះកាលពីខែកញ្ញា ប៉ុន្តែទូរស័ព្ទម៉ាក់ថ្មីៗដែលផលិតចុងក្រោយនេះក៏មានសញ្ញាបង្ហាញថា មានបញ្ហាដូចគ្នានេះដែរ ហើយក្រុមហ៊ុន Samsung របស់ប្រទេសកូរ៉េខាងត្បូង បានផ្អាក់ការផលិតទាំងស្រុង។
ក្រុមអ្នកវិភាគបានបង្ហាញថា បញ្ហាថ្មទូរស័ព្ទ Note 7 អាចធ្វើឱ្យក្រុមហ៊ុន Samsung ជួបវិបត្តិរយៈពេលវែងជាពិសេសក្រុមហ៊ុន Samsung នឹងប្រឈមនិងគូប្រជែង ដែលក្នុងនោះមានក្រុមហ៊ុន Google និងក្រុមហ៊ុន Apple ដែលបានប្រកាសផលិតស្មាតហ្វូន ម៉ាក់ថ្មីចុងក្រោយហើយ មានបច្ចេកទេសខ្ពស់ថែមទៀតផង។
ទូរស័ព្ទ Note 7 នេះត្រូវបានគេមើលឃើញថា ជាផលិតផលមួយកំពុងប្រកួតប្រជែង ជាមួយទូរស័ព្ទ iPhone 7 ម៉ូដែលថ្មីរបស់ក្រុមហ៊ុន Apple។ បញ្ហារបស់ក្រុមហ៊ុន Samsung បានឱ្យភាគហ៊ុនរបស់ Apple ឡើងខ្ពស់ក្នុងរយៈពេល ១០ខែនេះ។
កាលពី ខែកញ្ញា ក្រុមហ៊ុន Samsung បានប្រមូលទូរស័ព្ទមកវិញចំនួន ២,៥ លានគ្រឿងពីម្ចាស់ប្រើប្រាស់ បន្ទាប់ពីមានពាក្យបណ្តឹងពីបញ្ហាថ្មទូរស័ព្ទផ្ទុះ៕ប្រភព៖ BBC
