ភ្នំពេញ៖ ក្រុមអង្គការសង្គមស៊ីវិលចំនួន៦០ បានរួមគ្នាថ្កោលទោសអំពើហិង្សា កាលពីថ្ងៃចន្ទទី១០តុលាទៅលើ អ្នកការពារសិទ្ធិមនុស្ស ក្នុងពេលប្រារព្វទិវាសិទិ្ធលំដៅដ្ឋាន ដោយពួកគេបានទទូចទៅលោកស្រី រូណា ស្មិត ប្រាប់ទៅរដ្ឋាភិបាលឱ្យជួយបញ្ឈប់ហិង្សា លើការសម្ដែងមតិរបស់ពលរដ្ឋ។
ការទទូចសុំរបស់ក្រុមសង្គមស៊ីវិលធ្វើឡើង បន្ទាប់ពី មនុស្ស៣នាក់ដែលដើរក្បួនសិទិ្ធលំនៅដ្ឋានអន្តរជាតិ ត្រូវបានកងសន្តិសុខ របស់សាលារាជធានីភ្នំពេញ វាយឱ្យរងបួសក្នុងនោះមានអ្នកការពារសិទិ្ធមនុស្ស ម្នាក់ផងដែរ។
យ៉ាងនេះក្ដីអ្នកនាំពាក្យរាជរដ្ឋាភិបាល ចាត់ទុកក្រុមសង្គមស៊ីវិល ទាំងនោះថាធ្វើរបាយការណ៍ មិនមានមូលដ្ឋានជាក់លាក់។ កញ្ញា ឆេង ណាតា រាយការណ៍៖
សេចក្ដីថ្លែងការណ៍រួម របស់សង្គមស៊ីវិលទាំងនេះ បានរៀបរាប់ពីសកម្មភាព របស់កងសន្តិសុខ របស់សាលាក្រុងភ្នំពេញ ដោយបានប្រើហិង្សាទៅលើអ្នកប្រារព្វពិធី និងជាពិសេសទៅលើ លោក អំ សំអាត មន្ត្រីការពារសិទិ្ធមនុស្សមកពីអង្គការលីកាដូ ដែលបានទៅឃ្លាំមើល ការហែក្បួនរបស់សហគមន៍ ដីធ្លី។
ក្នុងអំពើហិង្សានេះ លោក អំ សំអាត និងមនុស្ស២នាក់ត្រូវបាន កងសន្តិសុខ វាយឱ្យរងរបួស។
លោក មឿន តុលា នាយកប្រតិបត្តិ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្សដែលជាភាគីមួយនៃសេចក្ដីថ្លែងការណ៍រួមនេះ បាននិយាយក្នុងបទសម្ភាសន៍ជាមួយវិទ្យុស្ត្រីថា រដ្ឋាភិបាលគួរតែជួយការពារពលរដ្ឋអ្នកដើរក្បួន តែផ្ទុយទៅវិញបែរជា កងសន្តិសុខរបស់ រដ្ឋទៅវាយបង្ក្រាបទៅវិញ ដែលរឿងនេះគឺជាការបំពាន លើគោលការណ៍សិទិ្ធមនុស្សធ្ងន់ធ្ងរ។
លោក មឿន តុលា៖« រដ្ឋដែលជាភាគី មានកាតព្វកិច្ចក្នុងការអនុវត្តសិទ្ធិលំនៅដ្ឋាន នៅក្នុងរដ្ឋធម្មនុញ្ញ និងកតិកាសញ្ញាអន្ដរជាតិដែលកម្ពុជា សន្យាមកយកអនុវត្ត ក៏មានចែងយ៉ាងច្បាស់។ ប៉ុន្ដែផ្ទុយទៅវិញ នៅពេលដែលប្រជាពលរដ្ឋរៀបចំប្រារព្ធសិទ្ធិលំនៅដ្ឋានហ្នឹង ទៅជាមានការរំខានពីអាជ្ញាធរ ហើយរហូតដល់ការបង្កហិង្សាទៅទៀត ហើយអ្វីដែលធ្ងន់ធ្ងរថែមពីនឹងទៀតនោះ គឺ នៅពេលដែលមន្ដ្រីសិទ្ធិមនុស្សដែលគាត់ជាអ្នកការពារ កុំអោយមានការរំលោភសិទ្ធិ ជួយកុំអោយមានអំពើហិង្សាកើតឡើង វាបែរទៅជាអាជ្ញាធរ ឬក៏ក្រុមសន្ដិសុខហ្នឹងវាយគាត់យ៉ាងកំរោល។ នេះជាការរំលោភសិទ្ធិមនុស្សយ៉ាងធ្ងន់ធ្ងរ ហើយវាជាគំរូអាក្រក់ ខូចមុខមាត់ដល់សង្គមយើង និងខូចមុខមាត់ដល់រដ្ឋាភិបាល»។
ការវាយលើអ្នកដើរក្បួនទិវាសិទ្ធិលំនៅដ្ឋានកាលពីថ្ងៃចន្ទ កើតឡើងជួនពេល អ្នករាយការណ៍ពិសេស អង្គការសហប្រជាជាតិ លោកស្រី រូណាស្មិត មកពិនិត្យមើលស្ថានភាពសុទ្ធិមនុស្ស នៅកម្ពុជា ហើយលោកមានផែនការ ជួបមន្ត្រីសិទ្ធិមនុស្ស រដ្ឋាភិបាលនៅថ្ងៃនេះ។
ដោយភ្ជាប់បេសកកម្មរបស់ អ្នករាយការណ៍ពិសេសនេះ លោក មឿង តុលា និយាយថា សេចក្ដីថ្លែងការណ៍របស់សង្គមស៊ីវិល ក៏បានទទូចឱ្យលោកស្រី រូណាស្មីត ជួយជំរុញទៅរដ្ឋាភិបាល បញ្ឈប់ហិង្សា លើការសំដែងមតិនៅកម្ពុជា។
លោក មឿន តុលា៖«ជាការពិត ការដែលប្រជាពលរដ្ឋ រៀបចំប្រារព្ធសិទ្ធិលំនៅដ្ឋាននេះ ជាផ្នែកមួយនៃការបញ្ចេញមតិ របស់ប្រជាពលរដ្ឋផងដែរ ហើយបើសិនជាយើងមើលទៅសិទ្ធិបញ្ចេញមតិនៅក្នុងស្រុកខ្មែរយើងនេះ គឺរងការគំរាមកំហែងធ្ងន់ធ្ងរណាស់ ហើយស្របពេលដែលឥលូវនេះ អ្នកស្រី រ៉ូណាស្មីត គាត់កំពុងមានវត្តមានក្នុងប្រទេសផង យើងសង្ឃឹមថា អ្នកស្រី រ៉ូណាស្មីត បន្ទាប់ពីប្រមូលព័ត៌មានអស់នេះ នឹងយកបញ្ហាសិទ្ធិសេរីភាព បញ្ចេញមតិ នឹងយកទៅជជែកជាមួយរដ្ឋាភិបាលកម្ពុជា ដើម្បីរំលឹករដ្ឋាភិបាលកម្ពុជា ថា ត្រូវធានា នូវសិទ្ធិសេរីភាព នៃការបញ្ចេញមតិ របស់ប្រជាពលរដ្ឋឡើងវិញ»។
អ្នកសង្កេតការណ៍ យល់ថាករណីហិង្សា លើក្រុមអ្នករិះគន់នៅកម្ពុជា បានក្លាយជាធម្មតាទៅហើយ ដែលពួកគាត់ថា អ្នកប្រព្រឹត្ត ជាសមត្ថកិច្ច មិនឃើញមានទោសធ្ងន់ធ្ងរទេ ហើយ ត្រូវបានជួយការពារទៀតផង។
លោក ផៃ ស៊ីផាន អ្នកនាំពាក្យគណៈរដ្ឋមន្ត្រី បានហៅសេចក្ដីថ្លែងការណ៍នេះថា មិនបានធ្វើឡើងផ្អែកលើ សភាពការណ៍ពិត។
លោក ផៃ ស៊ីផាន៖« ខ្ញុំអត់ដឹងសាច់រឿងពិត តើវាយ៉ាងដូចម្ដេច តើមន្ដ្រីអង្គការសិទ្ធិមនុស្សគាត់ទៅសង្កេតការណ៍ ឬក៏ទៅចូលរួមក្នុងបាតុកម្មហ្នឹង នេះជាសំណួររបស់ខ្ញុំទៅវិញ។ សំខាន់បំផុត តើគាត់ជាអ្នកចូលរួមបាតុកម្ម គាត់មានសកម្មភាពក្នុងបាតុកម្ម ឬគាត់គ្រាន់តែជាអ្នកឈរមើល អាហ្នឹងយើងត្រូវស្វែងយល់។ ប៉ុន្ដែអ្វីដែលខ្ញុំមើលឃើញតាមវីដេអូ ខ្ញុំឃើញគាត់ជាអ្នកចូលរួមបាតុកម្ម គាត់មែនជាអ្នកពិនិត្យទេ ទីមួយ។ ទីពីរ គាត់ត្រូវតែសហការជាមួយនឹងមន្ដ្រីអាជ្ញាធរ ពីព្រោះមន្ដ្រីអាជ្ញាធរ គេមានដែនអំណាចរបស់គេ ក្នុងការគ្រប់គ្រងសណ្ដាប់ធ្នាប់សង្គម សណ្ដាប់ធ្នាប់សាធារណៈ។ ដូច្នេះ មិនមែនអាងគ្រាន់តែពាក់មួកអង្គការសិទ្ធិមនុស្ស យើងទៅប្រឆាំងជាមួយមន្ដ្រីអាជ្ញាធរនោះទេ…»។
តែយ៉ាងហោចតិចណាស់ ប្រទេសជិត៤០ នៃក្រុមប្រឹក្សាសិទ្ធិមនុស្ស អង្គការសហប្រជាជាតិ បាន ចេញសេចក្ដីថ្លែងការណ៍រួម ដោយ ថោ្កលទោស ការរំលោភសិទ្ធិមនុស្ស នៅកម្ពុជា ដែលបានប្រព្រឹត្តកន្លងមក។
ប្រទេសទាំង ៣៩ នោះមាន អាមេរិក ជប៉ុន សហភាពអឺរ៉ុប២៨ប្រទេស បានចេញសេចក្ដីថ្លែងការណ៍នេះ បន្ទាប់ពី ពួកគេបានជួបប្រជុំគ្នា នៅឯក្រុមប្រឹក្សាសិទ្ធិមនុស្សអង្កការសហប្រជាជាតិនៅក្រុង ហ្សឺណែវ ប្រទេសស្វិស កាលពីពាក់កណ្ដាលខែកញ្ញា ឆ្នាំ ២០១៦នេះ៕
