ប្រធានាធិបតីបារាំងលោក Francois Hollande បានណែនាំទៅរុស្ស៊ី ព្រោះថារុស្ស៊ីអាចប្រឈមនឹងការចោទប្រកាន់ពីបទឧក្រិដ្ឋកម្មសង្គ្រាម ព្រោះរុស្ស៊ីបានបាញ់គ្រាប់ផ្លោងជាលើកទីពីរនៅក្រុងអាឡេប៉ូប្រទេសស៊ីរី។
លោក ហូឡង់ បានប្រាប់ទូរទស្សន៍បារាំងថា ករណីរុស្ស៊ីនេះអាចត្រូវបានតុលាការឧក្រិដ្ឋកម្មអន្តរជាតិ (ICC) ចោទប្រកាន់។ លោក ហូឡង់ និយាយថា លោកអាចនឹងបដិសេធជំនួបជាមួយលោកប្រធានាធិបតីរុស្ស៊ី វ្ល៉ាឌីមៀរ ពូទីនដែលគ្រោងធ្វើទស្សនកិច្ចផ្លូវការនៅប្រទេសបារាំង នាសប្តាហ៍ក្រោយនេះ។
លោក ហូឡង់ បានប្រាប់ទូរទស្សន៍ TMC ថា៖«ប្រជាជនដែលស្លាប់ស្ទើររាល់ថ្ងៃនេះ គឺជាជនរងគ្រោះនៃឧក្រិដ្ឋកម្មសង្គ្រាម។ អ្នកដែលបានប្រព្រឹត្តអំពើទាំងនេះ នឹងត្រូវប្រឈមមុខទទួលខុសត្រូវនូវទង្វើរបស់ពួកគេ នៅក្នុងតុលាការឧក្រិដ្ឋកម្មអន្តរជាតិនេះ»។ ប្រធានាធិបតីបារាំងបន្ថែមថា៖«ប្រ សិនបើខ្ញុំធ្វើការបានទទួលគាត់ [លោកពូទីន] ខ្ញុំនឹងប្រាប់គាត់ថា ទង្វើដែលរុស្ស៊ីធ្វើគឺជាការមិនអាចទទួលយកបាន»។
លោក ហូឡង់ អំពាវនាវឱ្យមានការកាត់ទោសលើប្រទេសរុស្ស៊ីភ្លាមៗ បន្ទាប់ពីលោក Jean-Marc Ayrault រដ្ឋមន្ត្រីការបរទេសបារាំងបានថ្លែងថា បារាំងកំពុងធ្វើការបើកផ្លូវមួយសម្រាប់រដ្ឋអាជ្ញានៃតុលាការ ICC អាចដំណើរការការស៊ើបអង្កេតលើការវាយប្រហារលើមូលដ្ឋានដ៏រឹងមាំរបស់ក្រុមឧទ្ទាមនៅភាគខាងកើតក្រុងអាឡេប៉ូ។
កាលពីសប្តាហ៍មុនប្រទេសរុស្ស៊ី បានជំទាស់ទៅនឹងសេចកត្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលបានអំពាវនាវឱ្យបញ្ចប់ការទម្លាក់គ្រាប់បែកមួយនេះ។
យ៉ាងណាក្រុងម៉ូស្គូបានបដិសេធម្តងហើយម្តងទៀត ថាខ្លួនមិនបានវាយប្រហារលើជនស៊ីវិលនោះទេហើយថា ការវាយប្រហារនោះគឺផ្តោតសំខាន់លើក្រុមភេរវកម្មនៅប្រទេសស៊ីរីតែប៉ុណ្ណោះ។
ទាំងប្រទេសរុស្ស៊ី និងប្រទេសស៊ីរី គឺសុទ្ធជាសមាជិកនៃតុលាការព្រហ្មទណ្ឌអន្តរជាតិ(ICC)។
សូមបញ្ជាក់ថា សប្ដាហ៍មុននេះលោក John Kerry រដ្ឋមន្ត្រីការបរទេសអាមេរិក បានអំពាវនាវផងដែរឱ្យមានការចោទប្រកាន់ពីបទឧក្រិដ្ឋកម្មស ង្គ្រាម ដោយហេតុថា ការវាយប្រហាររបស់រដ្ឋាភិបាលរុស្ស៊ី និង ស៊ីរី មកលើមន្ទីរពេទ្យមិនមែនជាហេតុការណ៍ចៃដន្យនោះទេ តែវាជាផ្នែកមួយនៃយុទ្ធសាស្ត្រដោយចេតនា៕
ប្រភព៖BBC
