ភ្នំពេញ៖ អ្នកតំណាងរាស្ត្រមកពីគណបក្សសង្គ្រោះជាតិ លោក អ៊ុំ សំអាន ត្រូវបានតុលាការ សាលាដំបូងរាជធានីភ្នំពេញ សម្រេចផ្តន្ទាទោស ឲ្យជាប់ពន្ធនាគារ ២ ឆ្នាំ កន្លះ និងពិន័យជាប្រាក់។ តែការប្រកាសសាលក្រមនេះធ្វើឡើង ដោយអវត្តមានសហមេធាវី និងជនជាប់ចោទ។ តែយ៉ាងនេះក្ដី មេធាវីលោក អ៊ុំ សំអាន បានប្រាប់វិទ្យុស្ត្រី ថា លោកមិនចាប់អារម្មណ៍ សាលក្រមនេះទេ។
នៅថ្ងៃទី ១០ ខែ តុលានេះ ចៅក្រមសាលាដំបូងរាជធានីភ្នំពេញ លោក ហេង សុខណា បានប្រកាសសាលក្រមផ្តន្ទាទោស លោក អ៊ុំ សំអាន អ្នកតំណាងរាស្ត្រមណ្ឌលសៀមរាប ឲ្យជាប់ពន្ធធាគារចំនួន ២ ឆ្នាំ ៦ ខែ និងពិន័យជាប្រាក់ ៤ លានរៀល។
លោក អ៊ុំ សំអាន ត្រូវបានតុលាការ ចោទប្រកាន់ពីបទញុះញង់ ឲ្យប្រព្រឹត្តបទឧក្រិដ្ឋជាអាទិ៍ ដែលបង្កឲ្យមានភាពវឹកវរ ធ្ងន់ធ្ងរដល់សន្តិសុខសង្គម និង បទញុះញង់ឲ្យមានការរើសអើង តាមមាត្រា ៤៩៥ និង ៤៨៦ នៃក្រមព្រហ្មទណ្ឌ។
ជុំវិញការចោទប្រកាន់នេះ មេធាវីការពារក្តីឲ្យ លោក អ៊ុំ សំអាន គឺ លោក ជួង ជូងី បានប្រាប់វិទ្យុស្ត្រីថា ការសម្រេចផ្តន្ទាទោស កូនក្តីរបស់លោកដាក់ ពន្ធនាគារ ២ ឆ្នាំ កន្លះគឺ មិនអាចទទួលយកបានឡើយ ដោយសារលោកចាត់ទុកអនុវត្តន៍ច្បាប់ របស់មន្ត្រីយុត្តិធម៌ និងតុលាការ ធ្វើឡើងខុសនីតិវិធីច្បាប់។
លោក ជួង ជូងី៖«ខ្ញុំជឿថាកូនក្តីខ្ញុំមិនអាចទទួលយកបាន ក៏ដូចមេធាវី ដែរ គឺមើលឃើញចំណាត់ការរបស់តុលាការ កន្លងមកបំពានច្បាប់ទាំងស្រុង។ ខ្ញុំនឹងពិភាក្សាជាមួយកូនក្តីខ្ញុំ កូនក្តីរបស់ខ្ញុំចង់បានយ៉ាងណា ខ្ញុំនឹងធ្វើទៅតាមគាត់»។
នៅក្នុងសវនាការជំនុំជម្រះ កាលពីថ្ងៃទី ០៥ ខែ កញ្ញា កន្លងមក ជនជាប់ចោទលោក អ៊ុំ សំអាន និងសហមេធាវី សម្រេចដើរចេញពីបន្ទប់នៃសាលជំនុំជម្រះ ដោយសារពួកគេចាត់ទុកថាសវនាការនេះ ខុសនីតិវិធីច្បាប់ ពោលគឺរំលោភរដ្ឋធម្មនុញ្ញ ហើយលោក អ៊ុំ សំអាន បានបដិសេធឆ្លើយរាល់សំនួរ របស់ចៅក្រមជំនុំជម្រះ ដោយសារលោកទាមទារ ឲ្យរដ្ឋសភាដកអភ័យឯកសិទ្ធិ សភា ដោយសំឡេង ២ ភាគ ៣ ជាមុនសិន។
ជុំវិញករណីនេះ អ្នកសង្កេតការណ៍យល់ថា គេមិនត្រូវចាប់កំហុស អ្នកនយោបាយដែលការពារ ផលប្រយោជន៍ជាតិនោះទេ។
លោក សុំ គន្ធាមី នាយកប្រតិបត្តិ អង្គការឃ្លាំមើលការបោះឆ្នោត មួយហៅថា និហ្វិច បានហៅសាលក្រមរបស់តុលាការ ថាជាសញ្ញានៃការបំភិតបំភ័យ អ្នកតំណាងរាស្ត្រដែលមានអភ័យឯកសិទ្ធសភា។ តែលោកសង្ឃឹមថា នឹងមានការលើកលែងទោស តាមរយៈដំណោះស្រាយនយោបាយ។
អ្នកតំណាងរាស្ត្រមណ្ឌលសៀមរាប លោក អ៊ុំ សំអាន ត្រូវបានអាជ្ញាធរ ចាប់ខ្លួននៅរំលងអាធ្រាត ថ្ងៃទី ១០ មេសា ឆ្នាំ ២០១៦ បន្ទាប់ពីលោកត្រឡប់ មកពីសហរដ្ឋអាមេរិក ដោយតុលាការ ចោទប្រកាន់ពី បទញុះញង់ ឲ្យប្រព្រឹត្តបទឧក្រិដ្ឋជាអាទិ៍ ដែលបង្កឲ្យមានភាពវឹកវរធ្ងន់ធ្ងរ ដល់សន្តិ សុខសង្គម និង បទញុះញង់ឲ្យមានការរើសអើង៕
