ភ្នំពេញ ៖ លោក អំ សំអាត មន្ត្រីការពារសិទ្ធិមនុស្សនៃអង្គការលីការដូ និងសកម្មជនដីធ្លីត្រូវបានវាយឲ្យរងរបួសក្នុងពិធីហែក្បួន ក្នុងទិវាសិទ្ធិលំនៅដ្ឋាន នៅថ្ងៃទី ១០ តុលា ឆ្នាំ ២០១៦នេះ។
លោក អំ សំអាត បានប្រាប់វិទ្យុស្ត្រីថា សន្តិសុខខណ្ឌបានវាយដំរូបលោកជាច្រើនត្រង់ផ្ទៃមុខ និងវាយឲ្យបែកមាត់ហូរឈាមផងដែរ ខណៈលោកព្យាយាមឃាត់មិនឱ្យមានការប្រើអំហិង្សារវាងអ្នកចូលរួមហែក្បួន និងកងសន្តិសុខ ។
លោក អំ សំអាត មន្ត្រីការពារសិទ្ធិមនុស្សល្បីឈ្មោះមួយរូបនេះ បានបញ្ជាក់ថា លោកកំពុងពិចារណាប្តឹងសន្តិសុខខណ្ឌថាក្នុងនាមជាបុគ្គល ឬ ក្នុងនាមជាស្ថាប័នរដ្ឋ។
បើតាមលោក អំ សំអាត សកម្មជនដីធ្លី លោក ចាន់ ពុទ្ធិស័ក្ត ក៏ត្រូវបានវាយឲ្យរងរបួស។
ហេតុការណ៍ផ្ទុះហិង្សានេះ បានកើតឡើងនៅក្បែរសាលាភូមិន្ទវិចិត្រសិល្បៈ រាជធានីភ្នំពេញ ខណៈសកម្មជនដីធ្លីមានគ្នាប្រមាណ ១០០នាក់ បានចូលរួមប្រារព្ធទិវាសិទ្ធិលំនៅឋានពិភពលោកនៅថ្ងៃនេះ៕