អូស្ត្រាលី ៖ ត្រីបាឡែនខ្នងគមសម្បុរខ្មៅមេនិងកូនពីរក្បាល បានជាប់កឿងនៅលើឆ្នេរខ្សាច់ក្នុងរដ្ឋ Queensland តែយ៉ាងក្រុមការងារបានជួយសង្គ្រោះត្រីបាឡែនមេកូននោះ ដោយសុវត្ថិភាពហើយកាលពីថ្ងៃសុក្រទី០៧ តុលាកន្លងទៅ។
ប្រព័ន្ធផ្សព្វផ្សាយក្នុងស្រុកបានរាយការណ៍ថា ត្រីបាឡែនពីរក្បាលដែលកំពុងជួបគ្រោះភ័យនេះ ត្រូវបានគេប្រទះឃើញនៅក្នុងដែនទឹករាក់នៃឆ្នេរខ្សាច់សមុទ្រភាគខាងជើងកោះ Stradbroke ក្បែរភាគខាងកើតនៃទីក្រុង Brisbane កាលពីព្រឹកថ្ងៃសុក្រ។
ប្រព័ន្ធផ្សព្វផ្សាយក្នុងស្រុកបានរាយការណ៍ ត្រីបាឡែនមេកូនទាំងពីរក្បាលនេះ ត្រូវបានក្រុមការងាររំដោះពីការជាប់កឿងនោះនៅម៉ោង ៨ព្រឹក បន្ទាប់ពីត្រីបាឡែនទាំងពីរនោះត្រូវជាប់គាំងអស់រយៈពេល ៤០ នាទី។
ការបំលាស់ទីរបស់ត្រីបាឡែនខ្នងគមសម្បុរខ្មៅប្រភេទនេះ គេតែងប្រទះឃើញជាធម្មតានៅតាមបណ្តោយឆ្នេរសមុទ្រភាគខាងកើតប្រទេសអូ ស្ត្រាលី នៅចន្លោះខែមេសា និងខែវិច្ឆិកាជារៀងរាល់ឆ្នាំ។ ត្រីបាឡែនប្រភេទនេះ ជារឿយៗតែងមកបង្កើនកូននៅឆ្នេរសមុទ្រក្នុងប្រទេសអូស្ត្រាលីរាល់ឆ្នាំ មុនពេលដែលវាធ្វើដំណើរទៅមហាសមុទ្រអង់តាក់ទិកវិញ។
នេះបើយោងតាមគេហទំព័របរិស្ថានរបស់រដ្ឋាភិបាលអូស្ត្រាលី។