ភ្នំពេញ៖ គណបក្សប្រជាជនកម្ពុជា (CPP) បានចេញសេចក្តីប្រកាសព័ត៌មាន នៅថ្ងៃសៅរ៍ទី០៨តុលានេះ ដោយ ហៅករណីបាតុកម្មប្រឆាំងដំណើរទស្សនកិច្ចលោក ហ៊ុន ម៉ាណែត នៅប្រទេសអូស្ត្រាលីថា ជាបាតុកម្មនយោបាយ។
គណបក្សកាន់អំណាចចេញសេចក្តីប្រកាសព័ត៌មាននេះ ធ្វើឡើងបន្ទាប់ពីសហគមន៍ខ្មែរនៅទីក្រុង ម៉ែលប៊ន (Melbourne) ប្រទេសអូស្ត្រាលីជាច្រើនរយនាក់ បានតវ៉ាប្រឆាំងនឹងលោក ហ៊ុន ម៉ាណែត ដើម្បីទាមទារយុត្តិធម៌ជូនបណ្ឌិត កែម ឡី ដែលត្រូវឃាតកបាញ់សម្លាប់កាលពីខែកក្កដា និងទាមទារឲ្យដោះលែងសកម្មជន និងសមាជិកសភាបក្សប្រឆាំងដែលកំពុងជាប់ពន្ធនាគារ។
សេចក្តីប្រកាសដដែលបានបញ្ជាក់ថា បាតុកម្មនេះ គឺជាបាតុកម្មនយោបាយ ព្រោះដឹកនាំដោយ លោក ហុង លីម តំណាងរាស្ត្រដើមកំណើតខ្មែរ ប្រចាំរដ្ឋវ៉ិកតូរីយ៉ា (Victoria)ថា ជាបុគ្គលនយោបាយ។
ដំណើរទស្សនកិច្ចរយៈពេល ២សប្ដាហ៍របស់ លោក ហ៊ុន ម៉ាណែត គឺធ្វើឡើងស្របពេលដែលប្រជាជនខ្មែរមួយចំនួននៅប្រទេសអូស្ត្រាលី ធ្វើបាតុកម្មសម្ដែងការមិនពេញចិត្តនឹងពិធីជប់លៀងរបស់លោកនៅទីនោះ៕
