ភ្នំពេញ៖ គណបក្សសង្គ្រោះជាតិ (CNRP) ដែលបានអះអាងថា នឹងចូលប្រជុំសភាពេញអង្គ នៃ បវេសនកាល ថ្មីមួយទៀត របស់រដ្ឋសភា តែនៅពេលរដ្ឋសភា បើកកិច្ចប្រជុំនៅថ្ងៃសុក្រទី០៧តុលា នេះ បែរជាបក្សប្រឆាំង មិនបានទៅចូលរួមប្រជុំតាមការអះអាងរបស់ខ្លួន។ គណបក្សដែលមានអាសនៈក្នុងរដ្ឋសភានេះបញ្ជាក់ថា មានព័ត៌មានច្បាស់ការមួយថា បើគណបក្សសង្គ្រោះជាតិចូលប្រជុំសភា និងអាចមានការយាយីដល់សុវត្ថិភាព របស់អ្នកតំណាងរាស្ដ្រដូចកាលពីចុងឆ្នាំ ២០១៥ ដែរ។
ប៉ុន្ដែបក្សកាន់អំណាចថា ការថ្លែងរបស់បក្សប្រឆាំងនេះគឺជាការដោះសារដើម្បីការពារ ការបំពានច្បាប់របស់ខ្លួនប៉ុណ្ណោះ ។ ករណីនេះអ្នកវិភាគយល់ថា បក្សសង្គ្រោះជាតិចង់បង្ហាញប្រាប់បក្សកាន់អំណាចពី ការរឹតត្បិតសេរីភាពសម្ដែងមតិ និងការកៀបសង្កត់ទៅលើបក្សប្រឆាំង។ លោក លៀ ស៊ីណា រាយការណ៍៖
អ្នកតំណាងរាស្ដ្រគណបក្សសង្គ្រោះជាតិនៅព្រឹកថ្ងៃ សុក្រ ទី ០៧ ខែ តុលា ឆ្នាំ ២០១៦ នេះមិនបានទៅចូលរួមកិច្ចប្រជុំសភាពេញអង្គ ដែលជាការបើក បវេសនកាល ថ្មីមួយទៀត របស់រដ្ឋសភា នីតិកាលទី៥ ឡើយ។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ អះអាង ក្នុងសនិ្នសីទសារព័ត៌មានថា ការដែលសមាជិកគណបក្សសង្គ្រោះជាតិមិនចូលប្រជុំសភា ពីព្រោះតែគណបក្សបានទទួលដំណឹងច្បាស់ការមួយថា មានមនុស្សមួយចំនួនបានចងភ្ជាប់ព្រឹត្ដិការណ៍បាតុកម្មនៅប្រទេសអូស្ដ្រាលីនៅថ្ងៃនេះ ជាទង្វើរបស់បក្សប្រឆាំង ហើយប៉ុនប៉ងយាយីលើរូបកាយអ្នកតំណាងរាស្ដ្រគណបក្ស ក៏ដូចជាថ្នាក់ដឹកនាំផងដែរ។ លោកថានេះជាហេតុនាំឲ្យ CNRP មិនចូលប្រជុំសភា។
លោក យឹម សុវណ្ណ៖«បើយោងតាមព័ត៌មានចុងក្រោយ ដែលយើងអាចជឿជាក់បាន បញ្ជាក់ថា មានការគំរាមកំហែងមកលើសមាជិក និងថ្នាក់ដឹកនាំគណបក្សសង្គ្រោះជាតិ អញ្ចឹងបានជា យើងប្រមូលព័ត៌មាន ធ្វើសេចក្ដីសម្រេចរួមគ្នាថា តំណាងរាស្ដ្រគណបក្សសង្គ្រោះជាតិ មិនទៅចូលរួមប្រជុំសភានៅថ្ងៃនេះទេ»។
ការមិនចូលប្រជុំសភា របស់គណបក្សប្រឆាំង ទំនងធ្វើឱ្យ មានការភ្ញាក់ផ្អើល តិចតួចដែរ ពីបក្សកាន់អំណាច។
សម្ដេចនាយករដ្ឋមន្ត្រី បានសរសេរលើហ្វេសប៊ុករបស់សម្ដេចថា«ទោះមាន់មិនរងាវ ក៏ព្រះអាទិត្យនៅរះដដែលព្រោះមិនមែនជាចំណាប់ខ្មាំងរបស់ក្រុមណាមួយនោះទេ»។
សាររបស់សម្ដេច ទំនងចង់និយាយចំអកឱ្យ បក្សប្រឆាំង ដែលមិនចូលប្រជុំសភាថ្ងៃនេះ។
ស្របនឹងនេះដែរអ្នកនាំពាក្យគណបក្សប្រជាជនកម្ពុជា លោក សុខ ឥសាន្ដ ដែលបានផ្ដល់បទសម្ដាសន៍ឲ្យវិទ្យុស្ដ្រីFM102 នៅថ្ងៃទី ០៧ កញ្ញា នេះថា លោកមិនទទួលយកការថ្លែងការពារ ការប្រព្រឹត្ដិល្មើសច្បាប់ ល្មើសបទបញ្ញាផ្ទៃក្នុងរដ្ឋសភា របស់គណបក្សសង្គ្រោះជាតិដូចនេះបានឡើយ។ លោកថា នេះគឺជា ចេតនា អាក្រក់របស់បក្សប្រឆាំង។
លោក សុខ ឥសាន្ដ៖«ខ្ញុំយល់ថានេះ ជាលេសរបស់គណបក្សសង្គ្រោះជាតិប៉ុណ្ណោះ ខ្លួនប្រព្រឹត្ដល្មើសច្បាប់ ល្មើសបទបញ្ជារផ្ទៃក្នុង របស់រដ្ឋសភា ល្មើសសេចក្ដីសម្រេចរបស់គណកម្មការអចិន្ទ្រៃរដ្ឋសភា ខ្លួនចង់ដាក់កំហុសលើអ្នកដទៃខ្ញុំយល់ថានេះជាចេតនាអាក្រក់»។
ក្នុងសន្និសីទសារព័ត៌មាន អ្នកនាំពាក្យបក្សប្រឆាំងពន្យល់ថា គណបក្សសង្គ្រោះជាតិនឹងចូលប្រជុំសភាបន្ទាប់ពីស្ថានការណ៍នយោបាយសព្វថ្ងៃ មានភាពល្អប្រសើ ដោយមិនមានការគំរាមកំហែងលើសុវត្ថិភាព សមាជិកអ្នកតំណាងរាស្ដ្របក្សប្រឆាំងបន្ដទៀត។ ជាងនេះលោកថា គណបក្សសង្គ្រោះជាតិ ចង់បានដំណោះស្រាយ ជាក់ស្ដែងពាក់ព័ន្ធការចូលរួមធ្វើនយោបាយរបស់មេបក្សប្រឆាំង ដោយត្រូវដោះស្រាយរឿងតំណាងរាស្ដ្រដែលជាប់ពន្ធនាគារ សកម្មជនគណបក្ស សកម្មជនដីធ្លី និង សកម្មជនសិទ្ធិមនុស្សជាដើម។
លោក យឹម សុវណ្ណ៖« យើងចង់បានការជួបប្រជុំគ្នានិយាយគ្នាដោះស្រាយបញ្ហា ការចូលរួមធ្វើនយោបាយរបស់ថ្នាក់ដឹកនាំគណបក្សសង្គ្រោះជាតិ សិទ្ធិសេរីភាពសកម្មជន និងអ្នកតំណាងរាស្ដ្ររដ្ឋសភា ដែលកំពុងជាប់ពន្ធនាគារ ហើយនឹងសកម្មជនសិទ្ធិមនុស្ស សិទ្ធិដីធ្លី ប៉ុន្ដែរហូតមកដល់ពេលនេះបក្សកាន់អំណាច មិនបានបង្ហាញឆន្ទៈនយោបាយ និងដំណោះស្រាយទេ»។
ទាក់ទិនការលើកឡើងរបស់អ្នកនាំពាក្យបក្សប្រឆាំងដូចនេះលោក សុខ ឥសាន្ដ មានប្រសាសន៍ថា មិនអាចយករឿងអ្នកប្រព្រឹត្តល្មើសច្បាប់មក ធ្វើជាថ្នូរដើម្បីចូលប្រជុំសភានោះ ទេ។
លោក សុខ ឥសាន្ដ៖«ត្រង់ប្រការហ្នឹងគឺបញ្ជាក់ឲ្យឃើញច្បាស់ថា គាត់ចង់ដោះដូរចូលប្រជុំសភា លុះត្រាតែដោះលែងអ្នកជាប់គុក យើងមិនអាចធ្វើការដោះដូរ ដូច្នេះបានទេ ព្រោះនីតិរដ្ឋ គឺ នីតិរដ្ឋ អ្នកណាប្រព្រឹត្ដល្មើសច្បាប់គឺត្រូវទទួលទោស»។
ជុំវិញរឿងនេះលោក គឹម សុខ អ្នកឃ្លាំមើលការអភិវឌ្ឍសង្គម និងនយោបាយ បង្ហាញការយល់ឃើញរបល់លោកថា គណបក្សសង្គ្រោះជាតិគួរ មានភាពក្លាហ៊ានជាងនេះ ដើម្បីដើរចូលប្រជុំសភា ក្នុងការនិយាយរឿងប្រទេសជាតិ។ លោកបន្ដថាការមិនចូលប្រជុំសភា របស់គណបក្សសង្គ្រោះជាតិ លើកនេះគឺជាការបាត់បង់ឱកាសក្នុងការចរចារឿងប្រទេសជាតិជាមួយបក្សកាន់អំណាច។
តែអ្នកឃ្លាំមើលការអភិវឌ្ឍសង្គមបញ្ជាក់ថា គណបក្សសង្គ្រោះជាតិ មិនចូលប្រជុំសភា នេះអាចមានបំណងចង់ទាមទារឲ្យមានសេរីភាព បញ្ចេញមតិសម្រាប់ពួកគាត់កាន់តែទូលាយជាងនេះប៉ុណ្ណោះ។
លោក គឹម សុខ៖«ខ្ញុំមានគំនិតថាគណបក្សសង្គ្រោះជាតិ គួរតែក្លាហ៊ានដើរចូលសភា ព្រោះសមរភូមិសភា មិនមែនជាសមរភូមិ ដែលពិបាកដើរចូលនោះទេ ពីព្រោះប្រជារាស្ដ្រផ្ដល់ការទុកចិត្ដឲ្យយើង ចូលរួមជជែកបញ្ហាប្រទេសជាតិ បើសិនយើងមិនចូលប្រជុំសភា គ្រាន់តែខ្លាចសុវត្ថិភាពតាមផ្លូវ គឺធ្វើឲ្យពលរដ្ឋលោកកាន់តែមានអារម្មណ៍មិនស្រួលក្នុងចិត្ដ»។
គួរជម្រាបថា កាលពីម្សិលមិញសម្ដេច ហ៊ុន សែន បានថ្លែងនៅក្នុងពិធីចែកសញ្ញាបត្រ ដល់និស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នៅមជ្ឈមណ្ឌលសន្និបាត និងពិព័រណ៍កោះពេជ្រថា ការចូលសភា ឬមិនចូលសភារបស់បក្សប្រឆាំង គ្មានអ្វីត្រូវរាំងស្ទះដល់ដំណើរការ នៃការងារ ប្រចាំថ្ងៃរបស់ប្រជាពលរដ្ឋនោះទេ ហើយក៏គ្មានអ្វីត្រូវបារម្ភទេគឺ ចូលក៏ប៉ុណ្ណឹង មិនចូលក៏ប៉ុណ្ណឹង។
តែយ៉ាងណាក៏ដោយ គណបក្សសង្គ្រោះជាតិ បានប្រកាសមិនចូលសភា ចាប់តាំងពីមានការវាយប្រហារលើអ្នកតំណាងរាស្ត្ររបស់ខ្លួន ២ រូប កាលពីចុងខែ តុលាឆ្នាំ២០១៥៕
