ភ្នំពេញ៖ ក្រសួងការបរទេស និងសហប្រតិបត្តិការអន្តរជាតិ សហការ ជាមួយស្ថានទូតនិងស្ថានកុងស៊ុលកម្ពុជា នៅក្រៅប្រទេសបានជួយពលករខ្មែរ ដែលទៅធ្វើការងារនៅក្រៅប្រទេសរងទុក្ខបុកម្នេញ បានចំនួន ៥៧៨នាក់ដោយឱ្យពួកគេបានត្រឡប់មក កម្ពុជាវិញ។
តាមសេចក្ដីប្រកាសព័ត៌មាន របស់ក្រសួងការបរទេស ដែលផ្សព្វផ្សាយ កាលពីថ្ងៃព្រហស្បតិ៍ទី៦តុលា ពលករខ្មែរទាំងនេះ ត្រូវបានសង្គ្រោះ ក្នុងរយៈពេល៩ខែកន្លងមកនេះ។
តាមប្រភពដដែលនេះ ពលករខ្មែរទាំងនោះមកពីប្រទេវៀតណាម ១៧៤នាក់ ម៉ាឡេស៊ី១៥០នាក់ ថៃ ១៣៣នាក់ ឥណ្ឌូនេស៊ី ៥៧នាក់ ចិន៤៧នាក់ ជប៉ុន ៩នាក់ សិង្ហបុរី ៣នាក់ រុស្សី ២នាក់ ឡាវ ១នាក់អារ៉ាប់ប៊ីសាអូឌីត ១នាក់អូស្ត្រាលីម្នាក់។
បើតាមសេចក្ដីប្រកាសនេះ ក្រសួងការបរទេសបានជួយ សម្រួលក្នុងការបញ្ជូនពលករ ពលការិនីកម្ពុជាបានចំនួន ៦៩៦៥នាក់គិតត្រឹមថ្ងៃទី០៥កញ្ញា ២០១៦បានទៅធ្វើការនៅសារធារណៈរដ្ឋកូរ៉េខាងត្បូង។
ពលករខ្មែរចាកចេញពីប្រទេសរបស់ខ្លួន ទៅធ្វើការនៅប្រទេសដទៃ មានដូចជា ថៃ ម៉ាឡេស៊ី កូរ៉េខាងត្បូង ឥណ្ឌូនេស៊ី ជប៉ុន វៀតណាម ចិន តៃវ៉ាន់ និងប្រទេស អារ៉ាប់ប៊ីសាវអូឌីត មានជិត១លាននាក់៕
