ភ្នំពេញ៖ ថ្លែងនៅក្នុងពិធីចែកសញ្ញាបត្រ ដល់និស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នៅមជ្ឈមណ្ឌលសន្និបាត និងពិព័រណ៍កោះពេជ្រនៅថ្ងៃព្រហស្បតិ៍នេះ សម្តេច ហ៊ុន សែន មានប្រសាសន៍ថា ការចូលសភា ឬមិនចូលសភារបស់បក្សប្រឆាំង គ្មានអ្វីត្រូវរាំងស្ទះដំណើរការ ការងារ ប្រចាំថ្ងៃរបស់ប្រជាពលរដ្ឋនោះទេ ហើយគ្មានអ្វីត្រូវបារម្ភទេគឺ ចូលក៏ប៉ុណ្ណឹង មិនចូលក៏ប៉ុណ្ណឹង។ ប៉ុន្តែគណបក្សប្រឆាំងលើកឡើងថា ជារឿងចាំបាច់ ដែលគណបក្សមានអសនៈ ក្នុងសភា ត្រូវចូលរួម ដើម្បីពិភាក្សាពីបញ្ហាជាតិ។ លោក ធូ វិរៈ រាយការណ៍៖
ប្រសាសន៍ របស់សម្តេចនាយករដ្ឋមន្ត្រី ហ៊ុន សែន ធ្វើឡើងខណៈតំណាងរាស្ត្រគណបក្សសង្គ្រោះជាតិ ត្រៀមនឹងចូលប្រជុំសភា ពេញអង្គនៅថ្ងៃសុក្រស្អែកនេះ។
លោក យ៉ែម បុញ្ញឬទ្ធិ អ្នកនាំពាក្យគណបក្សសង្គ្រោះជាតិ មានប្រសាសន៍ថា ប្រសិនបើមានការចូលរួមពីគណបក្ស ដែលមានអសនៈក្នុងរដ្ឋសភា គឺជារឿងល្អ ដែលអាចជជែកពិភាក្សាគ្នាទៅលើបញ្ហាផ្សេងៗ ជាពិសេសពាក់ព័ន្ធនឹងច្បាប់។
លោក សូ ចន្ថា សាស្ត្រាចារ្យវិទ្យាសាស្ត្រនយោបាយ មានប្រសាសន៍ថា ការលើកឡើងរបស់សម្តេចនាយករដ្ឋមន្ត្រី ហ៊ុន សែន គ្រាន់តែរឿងមួយប៉ុណ្ណោះ ប៉ុន្តែនៅពេលដែលគណបក្សប្រឆាំងមិនចូលសភា គឺឆ្លុះបញ្ចាំងថារដ្ឋសភា ជាសភាឯកបក្ស ហើយភាពស្របច្បាប់របស់រដ្ឋសភា ដែលត្រូវទទួលស្គាល់ដោយប្រជាពលរដ្ឋ ក៏ដូចជាអន្តរជាតិ នៅមានកម្រិតទាបផងដែរ។
ថ្ងៃទី ០៧ ខែតុលា ឆ្នាំ២០១៦ ស្អែកនេះ ជាថ្ងៃដែលសភាបើកកិច្ចប្រជុំពេញអង្គ និងជាការបើក បវេសនកាល ថ្មីមួយទៀត របស់រដ្ឋសភា នីតិកាលទី៥។
គណបក្សសង្គ្រោះជាតិបានប្រកាសមិនចូលសភា ចាប់តាំងពីមានការវាយប្រហារលើអ្នកតំណាងរាស្ត្ររបស់ខ្លួន ២ រូប កាលពីចុងខែតុលាឆ្នាំ២០១៥៕
