ភ្នំពេញ៖ ប្រធានស្តីទីគណបក្សសង្គ្រោះជាតិ លោក កឹម សុខា ដែលបានសម្ងំលាក់ខ្លួន នៅស្នាក់ការកណ្តាលគណបក្ស បានថ្លែង ថារយៈពេលជាង៤ខែ លោកស្នាក់ក្នុងស្នាក់ការគណបក្ស គឺក្នុងគោលបំណងដើម្បីទាមទាររកដំណោះស្រាយនយោបាយ ឱ្យវិលទៅភាពប្រក្រតីទ្បើងវិញ។
ការថ្លែងដូចនេះធ្វើទ្បើងនៅទីស្នាក់ការបក្សសង្គ្រោះជាតិចាក់អង្រែលើ បន្ទាប់ពីលោកត្រទ្បប់មកពីចុះឈ្មោះបោះឆ្នោតកាលពីព្រឹកថ្ងៃពុធទី០៥តុលា។ លោក ជួន សារ៉េត រាយការណ៍៖
ដូចការគ្រោងទុករបស់បក្សសង្គ្រោះជាតិ ដែលចេញសេចក្តីប្រកាសព័ត៌មានថា លោក កឹម សុខា នឹងទៅចុះឈ្មោះបោះឆ្នោតក្រោយពិធីបុណ្យភ្ជុំបិណ្ឌចប់ គឺនៅព្រឹកថ្ងៃទី០៥ខែតុលា នេះលោក កឹម សុខា បានទៅចុះឈ្មោះបោះឆ្នោត ហើយថែមទាំងបានអំពាវនាវឱ្យប្រជាពលរដ្ឋ ដែលគ្រប់អាយុបោះឆ្នោតទៅចុះឈ្មោះឱ្យបានគ្រប់ៗគ្នា។<
ប្រធានស្តីទីគណបក្សសង្គ្រោះជាតិ លោក កឹម សុខា បានថ្លែងថាដើម្បីឱ្យការបោះឆ្នោតប្រព្រឹត្តិទៅដោយសេរី ត្រឹមត្រូវ និងយុត្តិធម៌នោះ គឺត្រូវមានបរិយាកាសនយោបាយ ស្មើភាពគ្នា ដើម្បីឆ្លុះបញ្ចំងអំពីឆន្ទះពិតប្រាកដ របស់ប្រជាពលរដ្ឋខ្មែរ។
លោក កឹម សុខា បន្តថា ការបោះឆ្នោតដែលមានលក្ខណៈ សេរី ត្រឹមត្រូវ យុត្តិធម៌ នោះគឺមិនមែនអាស្រ័យនៅថ្ងៃបោះឆ្នោតនោះទេ គឺវាអាស្រ័យទៅលើបរិយាកាស ទូទៅតាំងពីមុន បោះឆ្នោត ថ្ងៃបោះឆ្នោត និងក្រោយបោះឆ្នោត។
បន្ថែមពីនេះទៀតនោះលោក កឹម សុខា ថាលោកចង់ឱ្យមានដំណោះស្រាយ ដោយសន្តិវិធី គឺមិនចង់ឱ្យមានអំពើហិង្សាណាមួយកើតទ្បើងឡើយ។
លោក កឹម សុខា បញ្ជាក់ថាមូលហេតុដែលលោកស្នាក់នៅបក្សសង្គ្រោះជាតិ រយៈពេលជាង ៤ ខែមកនេះ គឺដើម្បីតស៊ូមតិឱ្យស្ថានភាពនយោបាយ វិលត្រទ្បប់មកភាពប្រក្រតីទ្បើងវិញ ដោយលោកសង្ឃឹមថាពីថ្ងៃនេះតទៅស្ថានភាពនយោបាយ នឹងមានភាពប្រក្រតីទ្បើងវិញ។ លោក កឹម សុខា៖ «ខ្ញុំស្នាក់នៅទីនេះអស់រយៈពេលជាង ៤ ខែមកនេះគឺដើម្បីធ្វើការតស៊ូមតិ ដើម្បីទាមទាររក ដំណោះស្រាយនយោបាយ ដើម្បីវិលត្រទ្បប់ទៅរកភាពប្រក្រតីវិញ ដូច្នេះរាល់ច្រកណាក៏ដោយ ឱ្យតែអាចឈានទៅរកដំណោះស្រាយនយោបាយ វិលទៅរកភាពប្រក្រតីទ្បើងវិញ ដើម្បីឱ្យមានការបោះឆ្នោតដោយសេរីត្រឹមត្រូវ យុត្តិធម៌ ដើម្បីឆ្លុះបញ្ចំងឆន្ទះប្រជាពលរដ្ឋ គណបក្សសង្គ្រោះជាតិត្រូវតែធ្វើដំណើរ ទៅកន្លែងដោយសន្តិវិធី ខ្ញុំជឿថាពីថ្ងៃនេះទៅយើង សង្ឃឹមថានឹងអាចធ្វើដំណើរទៅរកភាពប្រក្រតីវិញ ហើយធ្វើដំណើរទៅរកការបោះឆ្នោតសេរី ត្រឹមត្រូវ យុត្តិធម៌ពិតប្រាកដ »។
ចំណែកសាស្ត្រាចារ្យផ្នែកវិទ្យាសាស្ត្រនយោបាយ លោក សូ ចន្ថា បានផ្តល់បទសម្ភាសន៍ឱ្យវិទ្យុស្ត្រីនៅថ្ងៃនេះថា ការស្នាក់នៅស្នាក់ការ CNRPជាង ៤ ខែ របស់លោក កឹម សុខា គឺទីមួយ ជាយុទ្ធសាស្ត្ររបស់គណបក្សសង្គ្រោះជាតិ ដើម្បីដឹកនាំបក្ស ដោយមិនព្រមចាកចេញទៅក្រៅប្រទេស។ ទីពីរ ជាការធ្វើពហិកាមួយដើម្បីទាមទារឱ្យមានដំណោះស្រាយនយោបាយ ដើម្បីឱ្យប្រជាពលរដ្ឋខ្មែរ មើលឃើញពីសេរីភាព នយោបាយនៅកម្ពុជាត្រូវបានរឹតត្បិត ហើយក៏ជារូបភាពមួយបង្ហាញទៅសហគមន៍អន្តរជាតិ ថាសេរីភាពនយោបាយ ក៏ដូចជាសេរីភាពមេដឹកនាំបក្សប្រឆាំងរួមតូច។
លោក សូ ចន្ថា បន្តថា ជាយុទ្ធសាស្ត្ររបស់អ្នកនយោបាយនៅកម្ពុជា គឺតែងតែប្រើប្រាស់ឥទ្ធិពលរបស់ខ្លួនដើម្បីកេងចំណេញនយោបាយទៅដល់គណបក្សរៀងៗខ្លួន ប៉ុន្តែលោកថាអ្នកនយោបាយមិនត្រូវយកល្បែងនយោបាយ ណាមួយដែលនាំឱ្យគ្រោះថ្នាក់ដល់ជាតិនោះទេ។ លោក សូ ចន្ថា យល់ឃើញថាការដែលលោក កឹម សុខា សម្រេចចិត្តទៅចុះឈ្មោះបោះឆ្នោតនាព្រឹកមិញនេះ អាចដោយសារតែកំដៅនយោបាយ បានធូស្បោយទៅវិញ។
លោក សូ ចន្ថា៖«គ្រាន់តែចង់ឃើញថាយុទ្ធសាស្ត្រ ឬក៏តាក់ទិចនយោបាយមួយចំនួន ដែលនាំឱ្យគ្រោះថ្នាក់ដល់ប្រជាពលរដ្ឋខ្មែរ ឬនាំឱ្យគ្រោះថ្នាក់ដល់ជាតិខ្មែរគួរតែអ្នកនយបាយកុំលែងអីប្រសើរជាង ហើយគួរតែអាចធ្វើការជាមួយគ្នា ហើយពិភាក្សាគ្នារកដំណោះស្រាយជូនជាតិមាតុភូមិ ជាជាងបង្កើតទៅជាបញ្ហា បង្កើតទៅជាចលាចល នៅក្នុងប្រទេសដែលនាំឱ្យខាតបង់ធ្ងន់ធ្ងរ ដល់ប្រទេស ខ្ញុំមើលទៅការដែលទៅចុះឈ្មោះបោះឆ្នោត របស់លោក កឹម សុខា នៅពេលនេះទី០១ វាបង្ហាញពីភាពក្លាហានរបស់លោក កឹម សុខា ដែលហ៊ានចេញទៅចុះឈ្មោះបោះឆ្នោត បើទោះបីជាមានសាលក្រម ហើយសាលក្រមមិនទាន់ជាស្ថាពរក្តី ទី០២ អាចដោយសារតែស្ថានភាពនយោបាយមានលក្ខណៈប្រសើរជាងមុន មិនមានកំដៅនយោបាយ»។
ជុំវិញការលើកទ្បើងនេះរបស់លោក កឹម សុខា វិទ្យុស្ត្រីមិនអាចសុំការឆ្លើយតបពីអ្នកនាំពាក្យគណបក្សប្រជាជនកម្ពុជាលោក សុខ ឥសាន្ត បានទេដោយពុំមានអ្នកលើកទូរស័ព្ទ។
លោក កឹមសុខា អះអាងដូចនេះ ក៏គាប់ជួន ស្ថានការណ៍នយោបាយ ថយកំដៅ បន្ទាប់ពីសមាជិកសភា របស់ CNRP សម្រេចថាចូលប្រជុំសភាវិញ ហើយស្របពេល មានការផ្ដល់ភ្លើងខៀវ ពីបក្សកាន់អំណាចថា អាចនឹងចរចាឡើងវិញ បើសមាជិកសភា CNRP បោះបង់ការធ្វើពហិការប្រជុំសភា។
តែយ៉ាងណាក៏ដោយលោក កឹម សុខា ត្រូវបានសាលាដំបូងរាជធានីភ្នំពេញ សម្រេចផ្តន្ទាទោសដាក់ពន្ធនាគារ ៥ ខែ និងពិន័យជាប្រាក់ ៨ សែនរៀល ពីបទបដិសេធមិនចូលខ្លួនទៅតាមដីការកោះហៅរបស់តុលាការ៕
