ភ្នំពេញ៖ លោកមេធាវី សុខ សំអឿន មានប្រសាសន៍ថា តុលាការ អាចទទួលការឆ្លើយបំភ្លឺតាមរយៈប្រព័ន្ធបច្ចេកវិទ្យាបានដោយមិនចាំបាច់ឱ្យ អ្នកស្រី ប៊ូ រចនា ដែលជាដើមបណ្ដឹងរដ្ឋប្បវេណី និងជាភរិយា លោកបណ្ឌិត កែម ឡី ចូលបំភ្លឺផ្ទាល់នោះទេ។ តែនៅពេលជាមួយគ្នានេះលោកថា ករណីព្រហ្មទណ្ឌដូចនេះ ដើមបណ្ដឹងរដ្ឋប្បវេណី មិនសំខាន់ទេ។ តែសម្រាប់អ្នកវិភាគ គិតថា គេគួរកោះសាក្សី ដទៃទៀតចូលបំភ្លឺមុន អ្នកស្រី ប៊ូ រចនា។
ការពន្យល់របស់អ្នកច្បាប់រូបនេះ ធ្វើឡើង ស្របពេល តុលាការ ចេញដីការ កោះហៅ អ្នកស្រី ប៊ូ រចនា ឱ្យចូលខ្លួននៅតុលាការករណី ឃាតកម្មគិតទុកជាមុន លើឃាតកម្ម លោក កែម ឡី។ កញ្ញា ច្រឹក ស្រីអូន មានសេចក្តីរាយការណ៍៖
ដីកាកោះហៅជាលើកទី២ អញ្ជើញអ្នកស្រី ប៊ូ រចនា ដែលជាដើមបណ្ដឹងរដ្ឋប្បវេណីនិង ភរិយា លោកបណ្ឌិត កែម ឡី ចូលបំភ្លឺនៅរសៀលថ្ងៃទី១៧ ខែតុលាខាងមុខ ក្នុងករណី ឃាតកម្មគិតទុកជាមុន និងកាន់កាប់អាវុធដោយគ្មានការអនុញ្ញាត ធ្វើឡើង(ជនសង្ស័យគឺលោក ជួប សំលាប់)។
ដីការនេះធ្វើឡើងដោយលោក សេង លាង ចៅក្រមស៊ើបសួរ សាលាដំបូងរាជធានីភ្នំពេញ។ នេះបើយោងតាមដីកាកោះហៅរបស់តុលាការចុះថ្ងៃទី២៦ កញ្ញា ឆ្នាំ២០១៦ និងបានចេញផ្សាយនៅថ្ងៃទី៤តុលានេះ។
លោកបណ្ឌិត កែម ឡី ត្រូវបានខ្មាន់កាំភ្លើងបាញ់សម្លាប់កាលពី ថ្ងៃទី១០ខែកក្កដា ឆ្នាំ២០១៦ នៅ នៃស្ថានីយប្រេងឥន្ធនៈកាល់តិច បូកគោ។
ការកោះហៅលោកស្រី ប៊ូ រចនា នេះស្របពេលលោកស្រី ទើបតែសម្រាលកូនទី៥របស់លោកស្រី កាលពីថ្ងៃទី ២ តុលាឆ្នាំ២០១៦នេះ។
ជុំវិញបញ្ហានេះលោកមេធាវី សុខ សំអឿន មានប្រសាសន៍ថា តុលាការ អាចទទួលការឆ្លើយបំភ្លឺតាមរយៈប្រព័ន្ធបច្ចេកវិទ្យា បានដោយមិនចាំបាច់ អ្នកស្រី ប៊ូ រចនា ដែលជាដើមបណ្ដឹងរដ្ឋប្បវេណីនិង ភរិយា លោកបណ្ឌិត កែម ឡី ចូលបំភ្លឺនោះទេ។ លោក ពន្យល់ថា ករណីនេះជាករណីព្រហ្មទណ្ឌ ដែលតុលាការត្រូវតែដំណើរការនីតិវិធី។
លោក សុខ សំអឿន៖«ខ្ញុំថាដោយសារបច្ចេកវិទ្យាគេខ្ពស់ហើយ យើងធ្វើតាមប្ចេកវិទ្យាទៅ លើកលែងតែចង់ធ្វើបាបដូចលោក កឹម សុខា ទេ បើសិនជាតុលាការ ចង់បានព័ត៌មាន យើងអាចភ្ជាប់តាមអ៊ីនធ័រណែតទៅ យើងអាចធ្វើបាន»។
ចំណែកឯ សាស្ត្រាចារ្យវិទ្យាសាស្ត្រនយោបាយ លោក សូរ ចន្ថា បានបង្ហាញទស្សនៈ ជុំវិញបញ្ហាជុំវិញបញ្ហានេះថាភរិយាលោកបណ្ឌិត កែម ឡី គឺប្រហែលជាមិនចូលបំភ្លឺតាមតីការកោះហៅនោះទេ ព្រោះអ្នកស្រីភ័យខ្លាចពីសុវត្ថិភាពទើបអ្នកស្រី ចាកចេញពីប្រទេកម្ពុជាទៅរស់នៅក្រៅប្រទេស។
លោកបន្តថាករណីនេះតុលាការ ហាក់ដូចជាដំណើរការលឿនពេកចំពោះ នីតិវិធីកោះហៅដើមបណ្ដឹង ដោយមិនទាន់បានរកអ្នកពាក់ព័ន្ធ ឬសាក្សីដឹងរឿងក្នុងហេតុការណ៍នេះនៅឡើយ។
លោក សូរ ចន្ថា៖«ក្នុងកាលៈទេសៈនេះខ្ញុំគិតថា ការកោះហៅភរិយាលោកបណ្ឌិត កែម ឡី តុលាការ ហាក់ដូចជាតុលាការធ្វើការលឿនពេក ដោយសារតែមិនទាន់រកឃើញសាក្សី ឬក៏ភស្តុតាង មួយចំនួនឲ្យបានច្បាស់លាស់នៅឡើយ»។
យ៉ាងណា ក៏ដោយ លោក លី សុផាណា អ្នកនាំពាក្យសាលាដំបូងរាជធានីភ្នំពេញ បានផ្ដល់ ចម្លើយ តាមសារតេឡេក្រាមឱ្យវិទ្យុស្ត្រីដឹងថា ចៅក្រមស៊ើបសួរនឹងពិនិត្យនិងសម្រេច អំពីការស្ដាប់ចម្លើយរបស់ដើមបណ្ដឹង តាមកាលបរិច្ឆេទ ដោយអនុលោមតាមនីតិវិធីជាធរមាន។
ភរិយាលោកបណ្ឌិត កែម ឡី និង កូនៗ បានទៅក្រៅប្រទេសជាច្រើនសប្ដាហ៍មកហើយ ដោយនៅខណៈនេះទៀត អ្នកស្រី ប៊ូ រចនា ទើបតែសម្រាលកូនទី៥ របស់អ្នកស្រី កាលពីថ្ងៃទី ២ តុលាឆ្នាំ២០១៦នេះផងដែរ។
លោកបណ្ឌិត កែម ឡី ជាអ្នកវិភាគ ល្បីឈ្មោះ មួយរូប ដែលគេដាក់រសហ្សនាម ថា អ្នកវិភាគហ៊ាននិយាយការពិត ពីបញ្ហាសង្គម ត្រូវបាន ខ្មាន់កាំភ្លើង ម្នាក់ អះអាងថា ជាជនដៃដល់ គឺឈ្មោះ ជួប សំលាប់ បាញ់សម្លាប់លោក នៅថ្ងៃទី១០ កក្កដា ឆ្នាំ២០១៦ នៅពេលលោកកំពុងទទួលទានកាហ្វេ នៅ Star Mart នៃស្ថានីយ៍ចាក់ប្រេង Caltex នៅម្ដុំស្តុប បូកគោ រាជធានីភ្នំពេញ៕
