ភ្នំពេញ៖ ស្ថានទូតបារាំងប្រចាំនៅកម្ពុជាបានផ្ញើ សេចក្ដីប្រកាស់ព័ត៌មាន មួយមកកាន់មណ្ឌលព័ត៌មានស្ដ្រីកម្ពុជា ស្ដីអំពីការប្រារព្ធពីធីរំលឹកខួប៥០ឆ្នាំ នៃដំណើរទស្សនកិច្ចរបស់ឧត្ដមសេនីយ៍ ដឺហ្គោល នៅកម្ពុជា ដែលនឹងប្រព្រឹត្ដទៅនៅថ្ងៃទី ១០ ទី ១១ ខែតុលា ឆ្នាំ ២០១៦។
ក្នុងសេចក្ដីប្រកាសព័ត៌មាន ដែលមណ្ឌលព័ត៌មានស្ដ្រីកម្ពុជា បានទទួលនៅថ្ងៃអង្គារទី៤តុលានេះ បានឲ្យដឹងថា ទំនាក់ទំនងមិត្ដភាព ដ៏ជ្រាលជ្រៅ និងស្ថិតស្ថេរ វាងប្រទេសកម្ពុជា និងប្រទេសបារាំង ត្រូវបានកត់សម្គាល់ដោយព្រឹត្ដិការណ៍ប្រវត្ដិសាស្ដ្រជាច្រើន ក្នុងនោះមានដំណើរទស្សនកិច្ច ជាផ្លូវរដ្ឋរបស់លោកឧត្ដមសេនីយ៍ ដឺហ្គោល កាលពីថ្ងៃទី ៣០ ខែ សីហា ដល់ថ្ងៃទី ០២ ខែ កញ្ញា ឆ្នាម១៩៦៦ផងដែ។
បន្ថែមពីនេះសេចក្ដីប្រកាសព័ត៌មាន របស់ស្ថានទូតបារាំងបញ្ជាក់ថា ពិធីរម្លឹកខួបនេះនឹងប្រព្រឹត្ដទៅនៅថ្ងៃទី ១០ និងទី ១១ ខែតុលា ឆ្នាំ២០១៦ ដោយមានកម្មវិធីជាច្រើន ក្នុងនោះរួមមានសន្និសីទស្ដីពី ស្មារតីនៃសុន្ទរកថា «ក្រុងភ្នំពេញ នៃរាជាណាកម្ពុជា» ជាអាទិ៍។
សូមបញ្ជាក់ថា ក្នុងពិធីរំលឹកខួប៥០ឆ្នាំ នៃដំណើរទស្សនកិច្ចរបស់ឧត្ដមសេនីយ៍ ដឺហ្គោល នៅកម្ពុជា ក៏មានពិព័រណ៍និងទស្សនីយភាពពាក់ព័ន្ធផ្សេងទៀត ព្រមទាំងឥទ្ធិពល នៃដំណើរទស្សនកិច្ច របស់លោកឧត្ដមសេនីយ៍ ដែលធ្វើឡើងក្នុងលក្ខណៈទ្វេភាគី មិត្ដភាព និងសាមគ្គីភាព ទៅលើជោគវាសនានៃប្រទេសកម្ពុជា និងប្រទេសបារាំង ក្នុងរយៈពេលជាងកន្លះសតវត្សកន្លងទៅនេះ។
គួររម្លឹកថា ប្រទេសបារាំង បានមកធ្វើអាណាព្យាបាល និងអាណានិគម លើកម្ពុជារយៈពេល៩០ឆ្នាំ ហើយ នៅឆ្នាំ ១៩៥៣ ទើប ប្រទេសអឺរ៉ុបមួយនេះ ប្រគល់ឯករាជ្យ ឱ្យកម្ពុជា។ កម្ពុជាបានឯករាជ្យនៅថ្ងៃទី ៩វិច្ឆិកា១៩៥៣ គឺតាមរយៈការធ្វើពលិកម្មរបស់ អ្នកតស៊ូខ្មែរ យ៉ាងខ្លាំង ក្រោមការដឹកនាំរបស់អតីតព្រះមហាមក្សត្រ ព្រះបាទ នរោត្តម សីហនុ៕