ហ្វីលីពីន៖ កងទ័ពហ្វីលីពីន និងសហរដ្ឋអាមេរិក នៅថ្ងៃអង្គារទី០៤ តុលានេះ ចាប់ផ្ដើមធ្វើសមយុទ្ធរួមគ្នាប្រចាំឆ្នាំ ដើម្បីពង្រឹងសមត្ថភាពកងទ័ពសំដៅការពារសន្ដិសុខក្នុងតំបន់។
សេចក្ដីរាយការណ៍របស់បណ្ដាញផ្សាយព័ត៌មាន Channel News Asia បានបញ្ជាក់ថា សមយុទ្ធនេះចាប់ផ្ដើមរយៈពេល ៦ ថ្ងៃ គឺ ពីថ្ងៃទី ៤ ដល់ថ្ងៃទី ១០ តុលា ឆ្នាំ២០១៦ ។
ប្រធាននាធិបតីហ្វីលីពីន Rodrigo Duterte បានព្រមានថា សមយុទ្ធរវាងហ្វីលីពីន និង អាមេរិកលើកនេះ អាចជាលើកចុងក្រោយ ដែលលោកថា ក្នុងខណៈលោកកាន់អំណាចប្រទេសហ្វីលីពីនលោកនឹងមិនអនុញ្ញាតឲ្យមានសមយុទ្ធនេះបន្ដទៀតទេ។
ការថ្លែងរបស់លោក Rodrigo Duterte បាននាំអោយមានការចោទសួរអំពីទំនាក់ទំនងអាមេរិក និងហ្វីលីពីន ដែលស្ថិតនៅក្រោមការដឹកនាំរបស់ប្រធានាធិបតីថ្មី នៃប្រទេសអាស៊ីអាគ្នេយ៍មួយនេះ ដែលទើបចូលកាន់តំណែងកាលពីថ្ងៃទី ៣០ មិថុនា ។
កងទ័ពហ្វីលីពីន និងអាមេរិកតែងតែធ្វើសមយុទ្ធរួមគ្នាដូចនេះ ដោយសារតែតំបន់សមុទ្រចិនខាងត្បូងដែលក្រុងម៉ានីលចោទក្រុងប៉េកាំងថា ចូលលុកលុយតំបន់របស់ខ្លួន ហើយផ្ដើមឱ្យមានភាពតានតឹងមកដល់ពេលនេះ។
ទាក់ទិនករណីនេះ ទីក្រុងប៉េកាំង បានហៅសមយុទ្ធនេះថា ជាការផ្ដើមអោយមានភាពតានតឹងកាន់តែខ្លាំងឡើងៗ៕
ប្រភព៖CNA
