ក្រុងម៉ានីល៖ ប្រធានាធិបតីហ្វីលីពីនលោក Rodrigo Duterte កាលពីថ្ងៃសុក្រទី៣០ កញ្ញា បានបង្ហាញមុខជាសាធារណ និងបានប្រដូចខ្លួន ឯងទៅនឹងមេដឹកនាំផ្ដាច់អាឡឺម៉ង់ ណាស៊ី ហ៊ីត្លែរ ដោយលោក Duterte និយាយថា លោកសប្បាយចិត្តដើម្បីបន្តយុទ្ធនាការលុបបំបាត់ចោលអ្នកប្រើប្រាស់ថ្នាំញៀន និងអ្នកចែកចាយគ្រឿងញៀន ឱ្យបានបីលាននាក់ក្នុងប្រទេសហ្វីលីពីន។
លោក Duterte បានថ្លែងសុន្ទរកថាដូចនេះ ធ្វើឡើងនៅក្នុងដំណើរកំសាន្តរបស់លោក ដែលមកដល់ក្រុង ដាវ៉ាវ បន្ទាប់ពីលោកបញ្ចាប់ដំណើរទស្សនកិច្ចទៅកាន់ប្រទេសវៀតណាម។ លោក Duterte បានប្រាប់អ្នកកាសែតថា លោកត្រូវបានគេរិះគន់ ដោយហៅលោកថា ជាបងប្អូនជីដូន មួយជាមួយ ហ៊ីត្លែរ។
ជាការកត់សម្គាល់ ហ៊ីត្លែរ បានសម្លាប់ពួកសាសន៍ជិហ្វរាប់លាននាក់។ លោក Duterte បានឱ្យដឹងថា៖ «នៅមានអ្នកញៀនថ្នាំចំនួនបីលាននាក់ (ក្នុងប្រទេសហ្វីលីពីន)បន្ថែមទៀត។ ខ្ញុំពិតជាសប្បាយរីករាយដើម្បីសម្លាប់ពួកគេ»។
លោក Duterte បានជាប់ឆ្នោតឡើងកាន់អំណាចកាលពីខែឧសភា។ លោកបានសច្ចាថា នឹងបញ្ចាប់បញ្ហាគ្រឿងញៀន និងអំពើពុករលួយនៅក្នុងប្រទេសដែលមានប្រជាជនប្រមាណ ១០០ លាននាក់នេះ។ លោកចូលកាន់តំណែងនៅថ្ងៃទី ៣០ ខែមិថុនា។ ចាប់តាំងពីពេលនោះមក ជនជាប់ពាក់ព័ន្ធនឹងបញ្ហាគ្រឿងញៀន ជិត ៣១០០ នាក់ត្រូវបានសម្លាប់ ហើយភាគច្រើនជាអ្នកប្រើប្រាស់ថ្នាំញៀន និង ជាអ្នកចែកចាយគ្រឿងញៀន ៕ប្រភព៖CNA
