ជារឿយៗ គេតែងតែប្រទះឃើញស្រី្ត ទៅវត្តធ្វើបុណ្យច្រើនជាងបុរសគឺ ទាំងថ្ងៃសីលធម្មតា និងរដូវបុណ្យទានធំៗ ពិសេស រដូវបុណ្យកាន់បិណ្ឌ។
អ្នកជំនាញសាសនា និងអ្នកស្រាវជ្រាវពីបញ្ហាសង្គម ពិនិត្យឃើញថា ការដែលស្ត្រីទៅកាន់វត្តច្រើនជាងបុរស ទាំងថ្ងៃសីលធម្មតា ឬថ្ងៃបុណ្យធំៗក្ដី គឺកើតមានច្រើន នៅរយៈពេល ២ទសវត្សចុងក្រោយនេះ។ ពួកគាត់កត់សម្គាល់ថា ប្រការនេះ អាចមកពីកត្តាច្រើនយ៉ាង។កញ្ញា ជុំ ជោគជាតា ធ្វើសេចក្ដីរាយការណ៍លម្អិត៖
រយៈពេលកាន់បិណ្ឌ នារដូវបុណ្យភ្ជុំ ពីបិណ្ឌទីមួយ តរៀងមក នារដូវបុណ្យភ្ជុំបិណ្ឌឆ្នាំនេះ គេសង្កេតឃើញ ស្ដ្រី ជាពិសេសស្ដ្រីមេផ្ទះ និងស្ដ្រីវ័យជំទង់ បានទៅកាន់វត្តអារាម ដោយដៃយួរចានស្រាក់ មានម្ហូបអាហារ ចម្អាប ផ្លែឈើ ទេយ្យទាន បានប្រគេនព្រះសង្ឃ ដោយសុំមកវិញនូវកុសលផល បុណ្យសម្រាប់អនាគតជាតិ ឬជាតិក្រោយ។
ក្នុងរដូវនេះ ស្ដ្រី ត្រូវបានគេពិរព័ណ៌នាថា ជាមេគ្រួសារផង ជាអ្នកស្វែងរកកុសលផលបុណ្យ ត្រឡប់មកគ្រួសាវិញផង។
តាមរយៈសកម្មភាពរបស់ស្ដ្រី ដែលភាគច្រើនទៅកាន់វត្តអារាម ច្រើនជាងបុរសនោះ ត្រូវបានអ្នកវិភាគបញ្ហាសង្គម និងកិច្ចការសាសនា រកឃើញថា មានហេតុផលច្រើន ដែលបណ្ដាលនាំចិត្តស្ដ្រីព្យាយាមទៅកាន់វត្តអារាម ច្រើនជាងបុរស។
ករណីនេះ លោកបណ្ឌិត មាស នី អ្នកស្រាវជ្រាវពីបញ្ហាសង្គម យល់ថានេះ ដោយសារតែបុរស ជាមេគ្រួសារ មានការងារខាងក្រៅ ដែលទទួលខុសត្រូវច្រើនជាងការងារផ្ទះ ទើបពេលខ្លះបានជាឃើញថាស្ដ្រីមានពេលធ្វើបាយសម្លទៅវត្ត ច្រើនជាងបុរស ឬមួយទៀតអាចនិយាយបានថា បុរស រវល់និងការងារប្រកួតប្រជែង ខាងក្រៅច្រើនជាងមនុស្សស្រី។
លោក មាស នី ៖«រឿងបញ្ហាស្ដ្រីទៅវត្តនេះ គឺ ជាធម្មតា ពីដើម មកយើងឃើញថា ស្ដ្រី ហើយនិងបុរស កាលណាគេទៅវត្ត គេច្រើនទៅទាំងគ្រួសារ។ ប៉ុន្ដែដោយ សារឥលូវនេះ ហាក់ដូចជា មានទំនោរមួយពីធម្មជាតិ ដោយសារតែមនុស្ស ដូចថា ជីវិតមានការប្រណាំងប្រជែងគ្នា ចឹងយើងឃើញថា ប្រុសៗរវល់ធ្វើការជាប់រហូត»។
យ៉ាងណាក៏ដោយ លោកសង្កេតឃើញបុរសដែលមិនសូវទៅវត្តនារដូវកាន់បិណ្ឌច្រើន ដូចស្ត្រី គឺមានរយៈពេល២ទសវត្សមកនេះ។ តែលោកថានៅសង្គមចាស់ បុរសបានទៅវត្តច្រើនដូចស្ត្រីដែរ។
មិនខុសពីគ្នាប៉ុន្មានពីលោក បណ្ឌិត មាស នី លោកស្រី ជា វណ្ណាត ពន្យល់ថា បញ្ហានេះក៏មកពីពេលវេលា និងការទទួលខុសត្រូវរបស់ស្ដ្រី ដែលផ្សាភ្ជាប់ទៅនឹងការងារជាមេគ្រួសារ ជាអ្នកថែទាំកូនចៅ ។ លោកថា ស្ត្រីទៅវត្ត គឺមិនមានអ្វីក្រៅពីឧទិសកុសល ឱ្យគ្រួសារបានសេចក្ដីសុខ ចម្រើន ទៅមុខទៀត។
លោកស្រី ជា វណ្ណាត ៖ «មានមូលហេតុផ្សេៗច្រើន ដូចថា ស្ដ្រីជាអ្នកចង្ក្រាន ជើងឆ្នាំង សម្រាប់ធ្វើម្ហូប ធ្វើអាហារ ម្ល៉ោះហើយនៅក្នុងន័យហ្នឹង ក៏មានគំនិតច្រើន គិតគូរ បុណ្យទាន ហើយម្យ៉ាងទៀត បុរសច្រើនតែធ្វើការកន្លែងសុំច្បាប់ …»។
ការដែល ស្ត្រីទៅកាន់បិណ្ឌនៅវត្តច្រើនជាងបុរស នាពេល បច្ចុប្បន្ននេះ ក៏មកពីស្ត្រីជាមេផ្ទះ ប្រាថ្នាចង់ឱ្យប្ដី ដែលមានចិត្តកាចឱ្យស្លូតបូតវិញ ពោលគឺឱ្យប្ដី ជម្រះបាបកម្ម និងឱ្យប្ដី ទទួលផលបុណ្យល្អមកវិញ។
លោក ប៉ាន់ សារ៉ុម ជា អាចារ្យ ម្នាក់នៅវត្តមួយក្នុងរាជធានីភ្នំពេញ បានបកស្រាយថា ហេតុផលដែលឃើញមានមនុស្សស្រីទៅវត្តច្រើន ជាងមនុស្សប្រុស ដោយសារតែភាវៈ នៃចិត្តរបស់មនុស្សស្រី មានមេត្តាករុណា និងភាពទន់ភ្លន់ ច្រើនជាងមនុស្សប្រុស។
លោក ប៉ាន់ សារ៉ុម៖ «ប្រុសៗតែងតែមានទោសៈ មោហៈ ចឹងប្រពន្ធធ្វើកុសលផលបុណ្យឱ្យប្ដី បាត់ ទោសៈ មោហៈ …»។
តាម លោកអាចារ្យ ប៉ាន់ សារ៉ុម ជាទូទៅបុរសនៅជនបទ និងនៅទីក្រុង គឺ រវល់និងការរកទទួលទានខាងក្រៅ ចំណែកស្ដ្រីមានភារៈ មើលថែទាំកូន និងរៀបចំម្ហូបអាហារ ជូនដល់ស្វាមី និងក្រុមគ្រួសារ ដែលជាទំលាប់ ចងភ្ជាប់តាំងពីយូរលង់ណាស់មកហើយនោះ ។
តែបើតាមលោកបណ្ឌិត មាស នី មិនត្រឹមតែបុរស មានវត្តមាន នៅវត្តអារាមតិចជាងមនុស្សស្រីតែប៉ុណ្ណោះទេ ប៉ុន្ដែឆ្នាំនេះ លោកសង្កេតឃើញដែរថា អ្នកដែលទៅវត្តនៅក្នុងទីក្រុងភ្នំពេញ មានចំនួនតិចជាងឆ្នាំមុនៗ។
យ៉ាងណាក៏ដោយ គឺរៀងរាល់ឆ្នាំ គេសង្កេតឃើញថ្ងៃចុងក្រោយនៃថ្ងៃកាន់បិណ្ឌ ឬហៅថ្ងៃភ្ជុំបិណ្ឌ គឺទាំងបុរស និងស្ដ្រីតែងតែបានមូលមីរគ្នា ទៅកាន់វត្តអារាម ទោះនៅក្នុងភូមិរបស់ខ្លួនក្ដី ឬនៅទីឆ្ងាយក្ដី ដើម្បីជាការបង្ហាញនូវការគោរពស្រឡាញ់ ពិធីបុណ្យប្រពៃណី របស់ខ្លួន៕