ភ្នំពេញ៖ អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញាឬទ្ធិ បានឱ្យដឹងថា លោក កឹម សុខា ប្រធានស្តីទីគណបក្សប្រឆាំង ដែលកំពុងសំងំ នៅទីស្នាក់ការគណបក្ស អស់រយៈពេល៤ខែ នឹងទៅចុះឈ្មោះបោះឆ្នោត ឱ្យទាន់ពេល ក្នុងរយៈពេលបីខែ ដែល គ.ជ.ប បានកំណត់។
លោក យ៉ែម បុញ្ញាឬទ្ធិ ថ្លែងដូចនេះ បន្ទាប់ពីបញ្ចប់កិច្ចប្រជុំគណៈកម្មាធិការ អចិន្ត្រៃរដ្ឋសភា នៅព្រឹកថ្ងៃទី២៨ ខែកញ្ញា ឆ្នាំ ២០១៦។ អ្នកវិភាគថា ជំហររបស់លោកកឹមសុខាគឺត្រឹមត្រូវ។ កញ្ញា ឆេង ណាតា ជូនសេចក្តីរាយការណ៍៖
អ្នកនាំពាក្យគណបក្សសង្គ្រោះជាតិ ពន្យល់ថា តាមច្បាប់លោក កឹម សុខា នៅតែអាចមានសិទ្ធិទៅចុះឈ្មោះបោះឆ្នោត។ លោក ជឿថា នៅពេលលោក កឹម សុខា ទៅចុះឈ្មោះបោះឆ្នោត នឹងមិនមានការចាប់ខ្លួននោះទេ ព្រោះតាមនីតិវិធីនៃតុលាការ ករណីលោក កឹម សុខាសាលក្រម មិនទាន់ប្រកាសជាស្ថាពរនោះទេ។
លោក យ៉ែម បុញ្ញាឬទ្ធិ៖«យោងទៅលើផ្លូវច្បាប់ គឺគាត់មានសិទ្ធិពេញលេញ ក្នុងការទៅចុះឈ្មោះបោះឆ្នោត ហើយគ្មានករណីណាមួយ ដែលអាចប្រកែកមិនឱ្យគាត់ទៅចុះឈ្មោះបានទេ។ ..តាមនីតិវិធីនៃតុលាការ បានចែងថាសាលក្រមមិនទាន់ជាស្ថាពរនៅឡើយទេ យើងមានសិទ្ធិទៅសាលាឧទ្ធរណ៍ ទៅតុលាការកំពូល ដូច្នេះនៅពេលសាលាក្រមមិនទាន់ចូលជាស្ថាពរ គ្មានសិទ្ធិអំណាចណាមួយដែលអាចឃាត់ខ្លួនឬ ចាប់ខ្លួនបានទេ»។
បែបនេះក្តី លោក យ៉ែម បុញ្ញាឬទ្ធិ មិនបានបញ្ជាក់ ពេលវេលាជាក់លាក់ដែលលោក កឹម សុខានឹងទៅចុះឈ្មោះបោះឆ្នោត នៅឡើយទេ។
ការប្រកាសទៅចុះឈ្មោះបោះឆ្នោតរបស់លោក កឹម សុខា ក្រោយពីស្ថានការនយោបាយនៅកម្ពុជា មានភាពធូស្រាយឡើងវិញ ខណៈគេមើលឃើញថា គណបក្សជាប់ឆ្នោតទាំងពីរដើរដល់ផ្លូវទាល់ច្រកដូចគ្នា ហើយគណបក្សប្រឆាំង ក៏បានចូលប្រជុំសភាវិញ ចំណែកលោកនាយករដ្ឋមន្ត្រៅ ហ៊ុន សែន បានប្រកាសបទឈប់បាញ់គ្នា។
អ្នកវិភាគស្ថានការណ៍នយោបាយកម្ពុជា លោក បណ្ឌិត មាស នី យល់ថា ការលោក កឹម សុខាមានគំរោងទៅចុះឈ្មោះបោះឆ្នោត គឺជាការស្ទង់មើលប្រតិកម្មរបស់គណបក្សកាន់អំណាច ដើម្បីប្រាកដថា លោកកឹម សុខាចេញទៅចុះឈ្មោះដោយគ្មានការភ័យខ្លាច។
លោក បណ្ឌិត មាស នី ៖«ស្ទង់មើលប្រតិកម្មអំពីគណបក្សកាន់អំណាចទេ ប្រសិនជាលោកបង្ហើរពាក្យហ្នឹងទៅហើយ បើមិនមានប្រតិកម្មអីធំដុំ ឬមានប្រតិកម្មជាវិជ្ជមានណាមួយ ពីគណបក្សអំណាចមកវិញ ក្នុងពេលនោះខ្ញុំគិតថា លោក កឹម សុខា នឹងចេញទៅចុះឈ្មោះ ដោយមិនមានការភ័យខ្លាច ទៅនឹងការចាប់ខ្លួន។ អញ្ចឹងយើងចាំមើលពីរ បីថ្ងៃទៀតសិន ថាតើអ្នកនាំពាក្យរដ្ឋាភិបាលហ្នឹង មានប្រតិកម្មយ៉ាងមិចទៅលើរឿងហ្នឹង ហើយរឿងថាចេញទៅចុះឈ្មោះរបស់លោក កឹម សុខា គឺអាស្រ័យទៅលើប្រតិកម្ម ក្នុងរយៈពេលមួយថ្ងៃ ពីរ ទៀត បន្ទាប់ពីលោកថ្លែង»។
យ៉ាងណាមិញ លោកមើលឃើញថា គណបក្សទាំងពីរ ហាក់ដូចជាយល់ស្ថានការណ៍រៀងៗខ្លួនថា ខ្លួនឯងមិនមានច្រកចេញច្រើនក្នុងការជ្រើសរើសដូចមុន។
លោកបន្តថា ប្រសិនបើរដ្ឋាភិបាលចង់ចាប់ខ្លួនលោក កឹម សុខា គឺចាប់តាំងពី យូរណាស់មកហើយ ប៉ុន្តែដោយសារតែរដ្ឋាភិបាល មិនទាន់ទុកចិត្តបាន នៅពេលដែលមានការចាប់ខ្លួនលោក កឹម សុខា នឹងធ្វើឱ្យគណបក្សប្រជាជនកម្ពុជា ចំណេញ ឬខាត ហើយមានបញ្ហាសង្គមអ្វីកើតឡើង។
ចំណែក លោក សូ ចន្ថា សាស្ត្រាចារ្យវិទ្យាសាស្ត្រនយោបាយ យល់ថា ស្ថានការណ៍នយោបាយនៅខណៈនេះ គណបក្សទាំងពីរ អាចនឹងធ្វើការចរចាគ្នា ដើម្បីសម្របសម្រួលបញ្ហា។ លោកជឿថា នឹងមិនមានចាប់ខ្លួនលោក កឹម សុខា នោះទេ។
កាលពីព្រឹកមិញនេះ ករណីរបស់លោក កឹម សុខា មិនត្រូវបានគណៈកម្មាការអចិន្ត្រៃនៃរដ្ឋសភា លើកយកមកពិភាក្សានោះទេ ដោយលោក ឡេង ប៉េងឡុង បញ្ជាក់ថា រដ្ឋសភាមិនជ្រៀតជ្រែកចូលកិច្ចរបស់តុលាការ។
លោក ឡេង ប៉េងឡុង៖«នៅទីនេះអត់មានរឿងហ្នឹងទេ គឺថាយើងនិយាយពីកិច្ចការរបស់សភា រឿងតុលាការអត់មានពាក់ព័ន្ធ លុះត្រាតែមានសំបុត្របញ្ជូនមក..»។
កាលពីថ្ងៃទី០៩ ខែកញ្ញា ឆ្នាំ២០១៦ តុលាការរាជធានីភ្នំពេញ បានសម្រេចផ្តន្ទាទោស លោក កឹម សុខា រយៈពេល៥ខែ និងពិន័យជាប្រាក់៨សែនរៀល តាមក្រមព្រហ្មទណ្ឌ មាត្រា៥៣៨ ករណីបទបដិសេធ ការ ចូលខ្លួន ក្នុងសំណុំរឿងនាង ខុម ចាន់តារ៉ាទី ហៅស្រីមុំ ដែលគេសង្ស័យថា មានស្នេហា លួចលាក់ជាមួយ លោក ៕
