ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) ដាក់លិខិតទៅគណបក្សសង្គ្រោះជាតិដោយស្នើឲ្យគណបក្សប្រឆាំងធំនេះ ផ្សព្វផ្សាយតែខ្លឹមសារការចុះឈ្មោះបោះឆ្នោតចេញ ដោយ គ.ជ.ប គឺមិនត្រូវបន្ថែមបន្ថយខ្លឹមសារក្នុងន័យ ឃោសនាផ្សព្វផ្សាយ បញ្ហានយោបាយ ដូចដំណាក់កាល ឃោសនាបោះឆ្នោតនោះឡើយ។
តែបែបនេះក្ដីមន្ត្រីអង្គការ សង្គមស៊ីវិល ឃ្លាំមើលកិច្ចការបោះឆ្នោតយល់ថា គ.ជ.ប គួរផ្សព្វផ្សាយលិខិតដូចនេះទៅគ្រប់គណបក្សនយោបាយ។ លោក ធូ វិរៈ រាយការណ៍៖
នៅក្នុងលិខិតផ្ញើជូន អ្នកនាំពាក្យគណបក្សសង្គ្រោះជាតិ លោក យឹម សុវណ្ណ កាលពីថ្ងៃទី ២៤ ខែ កញ្ញា ប្រធាន គ.ជ.ប. លោក ស៊ិក ប៊ុនហុក បានថ្លែងអំណរគុណ ដល់គណបក្សប្រឆាំង ដែលបានជួយផ្សព្វផ្សាយការចុះឈ្មោះបោះឆ្នោត តាមការអំពាវនាវរបស់ គ.ជ.ប.។ ប៉ុន្តែក្នុងលិខិតនោះ បានរម្លឹកឲ្យគណបក្សជំទាស់នេះ កុំបន្ថែម ឬបន្ថយខ្លឹមសារផ្សេងទៀត ក្នុងន័យឃោសនាផ្សព្វផ្សាយពាក់ព័ន្ធនឹងបញ្ហានយោបាយ។
លិខិតដដែល ក៏បានប្រាប់ទៅ លោក យឹម សុវណ្ណ ឲ្យសុំការអនុញ្ញាតពីអាជ្ញាធរមូលដ្ឋាន ដើម្បីធានានូវសុវត្ថិភាព និងសណ្ដាប់ធ្នាប់សាធារណៈផងដែរ។
ជុំវិញលិខិតនេះ អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានឲ្យដឹងនៅថ្ងៃទី ២៧ ខែ កញ្ញា នេះថា គណបក្សសង្គ្រោះជាតិ នឹងអនុវត្តឲ្យត្រឹមត្រូវទៅតាមលិខិតរបស់ គ.ជ.ប ។ លោកថា គណបក្សសង្គ្រោះជាតិ ក៏មិនឲ្យសកម្មជនរបស់ខ្លួនពាក់អាវ ស្លាកគណបក្សសង្គ្រោះជាតិដែរ។
លោក យឹម សុវណ្ណ៖«យើងមិនភ្ជាប់រឿងនយោបាយ នៅក្នុងការផ្សព្វផ្សាយនោះទេ យើងធ្វើដោយសុទ្ធចិត្ត។ ហើយទី២ យើងនឹងមិនឲ្យភ្នាក់ងារ ដែលអំពាវនាវពាក់មួក ពាក់អាវគណបក្សទេ ដើម្បីជៀសវាងគេចោទប្រកាន់ថា យើងចង់ចំណេញនយោបាយ»។
ចំណែក លោក សំ គន្ធាមី នាយកប្រតិបត្តិអង្គការអព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរីនៅកម្ពុជាហៅថា NICFEC យល់ថា ជារឿងល្អដែលគណៈកម្មាធិការជាតិរៀបចំការបោះឆ្នោត (គ.ជ.ប)ស្នើឲ្យ គណបក្សសង្គ្រោះជាតិធ្វើដូចនេះ។ ប៉ុន្តែលោកថា គ.ជ.ប គួរ អនុវត្តន៍ ដូចនេះទៅគ្រប់គណបក្សនយោបាយទាំងអស់។
លោក សំ គន្ធាមី៖«គ.ជ.ប គួរតែចេញគ្រប់គណបក្សនយោបាយ ដែលមានបញ្ជីឈ្មោះនៅក្រសួងមហាផ្ទៃឲ្យជួយគ្រប់គ្នាទៅ បានយុត្តិធម៌ ព្រោះគណបក្សមូលដ្ឋាន គណបក្សប្រជាជន»។
នៅក្នុ្ងរយៈពេល ២៥ ថ្ងៃដំបូងនៃដំណើរការចុះឈ្មោះបោះឆ្នោត នៅទូទាំងប្រទេស គ.ជ.ប បានប្រកាសថា ប្រជាពលរដ្ឋជាង ៣ លាន ៤១ ម៉ឺននាក់ ស្មើនឹងជាង ៣៥ ភាគរយនៃចំនួនពលរដ្ឋគ្រប់អាយុបោះឆ្នោតសរុបជាង ៩ លាន ៦៦ ម៉ឺននាក់បានទៅចុះបោះឆ្នោត។ ប្រទេសកម្ពុជា នឹងមានរៀបចំការបោះឆ្នោត សំខាន់ចំនួន ២ គឺការបោះឆ្នោតក្រុមប្រឹក្សាឃុំសង្កាត់ថ្ងៃទី៤មិថុនា ឆ្នាំ២០១៧ និងការបោះឆ្នោតសភា អាណត្តិទី៦ ខែកក្កដា ឆ្នាំ២០១៨ ៕
