ថ្លែងនៅទីស្នាក់ការកណ្តាលគណបក្ស លោក ស្រីមូរ សុខហួរ តំណាងរាស្ត្រខេត្តបាត់ដំបងបានអំពាវពាវឱ្យតុលាការធ្វើការដោះលែងប្រជា ពលរដ្ឋ ជាពិសេសស្ត្រីដែលតស៊ូដើម្បីការពារដីធ្លី និងលំនៅដ្ឋានរបស់ខ្លួន។
លោកស្រី មូរ សុខហួរ ថ្លែងបែបនេះ នៅក្នុងទិវាប្រកាសប្រើរដ្ឋធម្មនុញ្ញលើកទី ២៣ ដែលប្រារព្ធធ្វើទីស្នាក់ការគណបក្សសង្គ្រោះជាតិ នៅចាក់អង្រែលើ នៅថ្ងៃទី ២៤ ខែកញ្ញានេះ។ លោកស្រីបន្តថា៖«ពេលណាស្ត្រីយើង ចូលទៅក្នុងពន្ធនាគារ ពេលនោះគ្រួសារស្ត្រីយើងមានការបាក់បែក ពេលនោះអនាគតកុមារយើងអត់មានពន្លឺទេ។ ដូច្នេះនៅរាល់ពេលមានការចាប់ចងប្រជាពលខ្មែរដោយអយុត្តិធម៌ ពេលនោះរដ្ឋបានរំលោភនូវស្មារតី និងរដ្ឋធម្មនុញ្ញយើងហើយ»។
ទន្ទឹមនឹងនេះដែរ តំណាងរាស្ត្ររូបនេះបន្ថែមថា រាជរដ្ឋាភិបាលគួរតែធានានូវការពារស្ត្រី និងផ្តល់សេវាសាធារណៈដោយឥតគិតថ្លៃស្ត្រី ជាពិសេសស្ត្រីដែលគ្មានទីពឹង និងស្ត្រីមានកូនច្រើននៅក្នុងបន្ទុកគ្រួសារ។
លោកស្រីបន្តថា ស្ត្រីគឺជាអ្នកផ្តល់កំណើតឱ្យមនុស្សប្រសិនបើជីវិតស្ត្រីគ្មានលំនឹងទេ នោះនឹងធ្វើឱ្យប៉ះពាល់ជីវិតរាប់លាននាក់ផ្សេងទៀត។
កាលពីពេលថ្មីៗនេះ សាលាដំបូងរាជធានីភ្នំពេញបានសម្រេចកាត់ទោសស្ត្រីបឹងកក់ ៤ នាក់ឲ្យជាប់គុក ៦ខែ ពីបទប្រមាថអ្នករាជការសាធារណៈ និងបទចោទប្រឆាំងនឹងអ្នករាជការសាធារណៈ។ នៅក្នុងចំណោមនោះ អ្នកស្រី ទេព វន្នី តំណាងសហគមន៍បឹងកក់កំពុងឃុំខ្លួននៅក្នុងពន្ធធាគារព្រៃស៕
