ភ្នំពេញ៖ កាលពីព្រឹកថ្ងៃសុក្រទី ២៣ កញ្ញានេះ សមត្ថកិច្ចបានបង្ហាញមុខជនសង្ស័យចំនួន ៨ នាក់ នៅក្នុងសន្និសីទសាព័ត៌មាន ពាក់ព័ន្ធករណីបោកគ្រាប់បែកស្ថិតនៅសង្កាត់ បឹងកេងកេង៣ ខណ្ឌចំការមន កាលពីយប់ថ្ងៃទី០៦ កញ្ញាកន្លងមក។ ក្នុងករណីនេះ យ៉ាងតិចមនុស្ស ៣នាក់ បានរងរបួសនិង រថយន្តជាច្រើនគ្រឿងរងការខូចខាត។
ស្នងការរាជធានីភ្នំពេញលោក ជួន សុវណ្ណ បានថ្លែង ថា អាជ្ញាធរមានសមត្ថកិច្ចបានចាប់ឃាត់ខ្លួនជនសង្ស័យចំនួន ៨ នាក់ ក្នុងករណីផ្ទុះគ្រាប់បែកនៅកណ្តាល រាជធានីភ្នំពេញ ក្នុងនោះមានស្រី ៣ នាក់ និងប្រុស ៥ នាក់។
លោក ជួន សុវណ្ណ បញ្ជាក់ថា ករណីបោកគ្រាប់បែកនេះគឺ ជារឿងគំនុំ។ លោក ជួន សុវណ្ណ ថា សមត្ថកិច្ច នឹងបញ្ជូនខ្លួនជនសង្ស័យទៅសាលាដំបូងរាជធានីភ្នំពេញ នៅព្រឹកនេះ ក្រោមបទ«ឃាតកម្មគិតទុកជាមុន»។
លោក ជួន សុវណ្ណ៖«ករណីប៉ុនប៉ងធ្វើឃាតនេះ ហើយការរៀបចំមនុស្សឃាតដោយមានការគ្រោងទុកមុននេះគឺ បង្កើតឡើងដោយសារគំនុំ»។
ជុំវិញករណីនេះដែរអ្នកសិក្សាស្រាវជ្រាវពីការអភិវឌ្ឍន៍សង្គម និងជាសមាជិកមូលនីធិ កែមឡី គឺលោកបណ្ឌិត មាស នី បានសាទរ ការខិតខំប្រឹងប្រែងរបស់អាជ្ញាធរ មានសមត្ថកិច្ច បានចាប់ជនសង្ស័យ ៨ នាក់បញ្ជូនទៅតុលាការ។ ទោះបីយ៉ាងណា លោក បណ្ឌិត មាស នី ទទូចឲ្យអាជ្ញាធរមានសមត្ថិកិច្ចពន្លឿន ការស៊ើបអង្កេត ក្នុងករណីឃាតកម្មបាញ់សម្លាប់ អ្នកវិភាគឯករាជ្យ លោកបណ្ឌិត កែម ឡី កាលពីថ្ងៃទី ១០ កក្កដាកន្លងមក ឲ្យដូចទៅនឹងករណីបោកគ្រាប់បែកលើកំណាត់ផ្លូវ ១៦៣។
លោកបណ្ឌិត មាស នី៖«ខ្ញុំគ្រាន់តែប្រតិកម្មភ្លាមៗថា បើសិនករណីសម្លាប់លោក កែម ឡី ធ្វើអញ្ចឹងខ្ញុំសរសើរមែនតែន រដ្ឋាភិបាល ហើយខ្ញុំគិតថាសមត្ថភាពរដ្ឋាភិបាលមិនអន់ប៉ុន្មានទេ ក្នុងការតាមស៊ើបអង្កេត ឬក៏ចាប់ខ្លួនអ្នកដែលប្រព្រឹត្តិអំពើអញ្ចឹង។ ប៉ុន្តែគ្រាន់ថា នៅកន្លែងដែលជាទិសដៅដែលរដ្ឋាភិបាលចង់រកទោះបី ទៅកៀនណាក៏រកឃើញដែរ ប៉ុន្តែប្រសិនជារដ្ឋាភិបាលមិនចង់រកទោះបីរឿងនិងនៅលើគោកក៏រដ្ឋាភិបាលរកមិនឃើញដែរ»។
ជុំវិញឃាតកម្មលោក បណ្ឌិត កែម ឡី វិទ្យុស្ត្រី មិនអាចសុំការឆ្លើយតប ពីអ្នកនំពាក្យក្រសួងមហាផ្ទៃ លោកឧត្តមសេនីយ៍ ខៀវ សុភ័គ បានទេ នៅរសៀលថ្ងៃទី ២២ កញ្ញានេះ ដោយទូរស័ព្ទមិនអាចទាក់ទងបាន។ ប៉ុន្តែ លោក បញ្ជាក់ប្រាប់វិទ្យុសំឡេងសហរដ្ឋអាមេរិក VOA ថា ឯកសារ និងភស្តុតាងនៃសំណុំរឿងឃាតកម្មរបស់លោក កែម ឡី កំពុងស្ថិតក្រោមសមត្ថកិច្ចរបស់តុលាការ។
បើតាមប្រភពរបស់វិទ្យុអន្តរជាតិផ្សាយជាខេមរៈភាសា ដែលស្រង់សម្ដីមន្ត្រីជាន់ខ្ពស់ក្រសួងមហាផ្ទៃបញ្ជាក់ថា មិនមានតម្រុយអ្វីថ្មីដែលសមត្ថកិច្ច រកឃើញឡើយ ក្រៅពីភស្តុតាងដាក់បន្ទុកថា បុរសអះអាងថាខ្លួនឈ្មោះ ជួប សម្លាប់ ជាឃាតករនោះ។
រហូតមកដល់ថ្ងៃទី ២៣ ខែកញ្ញានេះ លោក កែម ឡី ត្រូវបានខ្មាន់កាំភ្លើងបាញ់សម្លាប់អស់រយៈពេលជាង២ខែហើយ ដោយអាជ្ញាធរមានសមត្ថកិច្ច ចាប់បានជនសង្ស័យម្នាក់គត់គឺបុរសឈ្មោះ ជួប សម្លាប់នេះ៕
