ភ្នំពេញ៖ អ្នកនាំពាក្យគណៈកម្មាធិការជាតិរៀបចំការបោះឆ្នោត ថាគ.ជ.ប បានទទួលពាក្យបណ្ដឹង ចំនួនជាង២០ពាក្យបណ្ដឹង ដោយបណ្ដឹងមួយគឺករណីកងទ័ពត្រូវគេដឹកទៅចុះឈ្មោះបោះឆ្នោតស្ថិតក្នុងបណ្ដឹងមួយដ៏សំខាន់។
លោក ហង្ស ពុទ្ធា អ្នកនាំពាក្យរបស់ស្ថាប័នេះ បានឱ្យដឹងនៅថ្ងៃទី ២២ កញ្ញា នេះថា ចាប់ពីដាក់ឱ្យដំណើរការនៃការចុះឈ្មោះបោះឆ្នោតថ្មី ឆ្នាំ២០១៦ ពីថ្ងៃទី ០១ កញ្ញា រហូតមកត្រឹមថ្ងៃទី ២២ កញ្ញា នេះ គឺ គ.ជ.ប បានទទួលពាក្យបណ្ដឹង ជាង២០ពាក្យបណ្ដឹង និងមានអ្នកចូលរួមចុះឈ្មោះបោះឆ្នោតជិត ៣ លាននាក់។
លោកបញ្ជាក់ថា ពាក្យបណ្ដឹងមួយចំនួន ត្រូវបានដោះស្រាយនៅនឹងកន្លែង។
លោក ហង្ស ពុទ្ធា៖«ពាក្យបណ្ដឹង គ.ជ.ប បានទទួលហើយ ហើយជាទូទៅពាក្យបណ្ដឹងដោះស្រាយនៅថ្នាក់ឃុំមួយចំនួនរួចរាល់ហើយ ហើយមិនមានការស្រុះស្រួល មក គ.ជ.ប ហើយសម្រាប់ គ.ជ.ប ក៏បានដោះស្រាយដែរ »។
អ្នកនាំពាក្យរូបនេះ បានបញ្ជាក់បបន្ថែមថា ក្នុងចំណោមពាក្យបណ្ដឹងជាង២០ មានពាក្យបណ្ដឹងខ្លះដែល គ.ជ.ប កំពុងបញ្ជូនមន្ដ្រីទៅធ្វើការស្រាវជ្រាវដូចជា ករណីការដឹកនាំទ័ពទៅចុះឈ្មោះជាដើម។
លោក ហង្ស ពុទ្ធា ៖«ជាបណ្ដឹងពាក់ព័ន្ធនឹងថា មានទាហានត្រូវគេដឹកយកទៅចុះឈ្មោះបោះឆ្នោត ហើយនិងមានការរំខាន ដល់ការចុះឈ្មោះបោះឆ្នោតជាដើម»។
បើតាមលោក ហង្ស ពុទ្ធា ចាប់តាំងពីថ្ងៃចុះឈ្មោះបោះឆ្នោតថ្ងៃទី ០១កញ្ញា មកដល់ថ្ងៃទី ២១កញ្ញា ចំនួនអ្នកចុះឈ្មោះបោះឆ្នោត មាន២លាន៩សែន៣ម៉ឺន៧ពាន់៧រយ៦១នាក់ ដែលជិតនឹង៣លាននាក់។
ការចុះឈ្មោះបោះឆ្នោតឆ្នាំនេះទៀត ធ្វើឡើងដោយមានអ្នកជំនាញបច្ចេកទេស កុំព្យូទ័រ អ្នកជំនាញមកពីប្រទេសជប៉ុន និងសហភាពអឺរ៉ុប។ អ្នកសង្កេតការណ៍មួយចំនួនគិតថា ការចុះឈ្មោះបោះឆ្នោត តាមប្រព័ន្ធកុំព្យូទ័រ ដោយមានផ្ដិតស្នាមមេដៃ និងថតមុខអ្នកចុះឈ្មោះបោះឆ្នោត គឺជា ប្រព័ន្ធចុះឈ្មោះបោះឆ្នោតមានប្រសិទ្ធិភាព ដោយមិនអាចមានឈ្មោះស្ទួន ឈ្មោះខ្មោច និងអ្នកបោះឆ្នោតបន្លំទៀតឡើយ៕
