ភ្នំពេញ៖ សម្ដេច ហ៊ុន សែន នាយករដ្ឋមន្ដ្រីកម្ពុជាបានថ្លែងរិះគន់អាណាព្យាបាលសិស្សមួយចំនួន ដែលមិនបានអប់រំកូនចៅឲ្យខិតខំរៀនសូត្រឲ្យបានល្អប្រសើរ ហើយបែរជារិះគន់លើរដ្ឋាភិបាលទៅវិញ។ សម្ដេច នាយករដ្ឋមន្ដ្រី បានថ្លែងដូចនេះក្នុងពិធីជួបសំណេះសំណាលជាមួយសិស្សថ្នាក់ទី១២ ដែលបានប្រឡងជាប់និន្ទេស A នៅវិមានសន្ដិភាពនៅថ្ងៃ ពុធ ទី ២១ កញ្ញា នេះ។
សម្ដេចនាយករដ្ឋមន្ដ្រីបានបញ្ជាក់ថា រដ្ឋាភិបាលមិនអាចគ្រប់គ្រងអប់រំសិស្សានុសិស្សគ្រប់ចំនួនបានទេ ដោយករណីនេះសម្ដេចថាអាណាព្យាបាល ត្រូវមានកាតព្វកិច្ច ជួយអប់រំកូនចៅរបស់ខ្លួនផ្ទាល់ជាជាងពឹងតែ ទៅលើសាលារៀននឹងរដ្ឋាភិបាល។ នៅក្នុងពិធីនេះដែរ សម្ដេចនាយករដ្ឋមន្ដ្រី ក៏បានថ្លែងអំណរគុណដល់គ្រូបង្រៀនសិស្សទាំងអស់ ដែលបានខិតខំបង្រៀនសិស្សទាំងម៉ោងសិក្សានិងម៉ោងបំពាក់បំប៉ន។ យ៉ាងណាក៏ដោយសម្ដេចបានសរសើរផងដែរ ដល់ក្រុមការងារគណបក្សប្រជាជន ដែលបានជួយពង្រឹងវិស័យអប់រំ នៅកម្ពុជា។
សូមជម្រាបថាលទ្ធផលប្រឡងសញ្ញាបត្រមធ្យមសិក្សាទុតិយភូមិ ឬប្រឡងបាក់ឌុបឆ្នាំនេះ បេក្ខជនដែលប្រឡងជាប់និទ្ទេស A មានចំនួន ៤០៥នាក់ និទ្ទេស B ចំនួន ២ ៨០១នាក់ និទ្ទេស C ចំនួន ៥ ៥៩៥ នាក់ និទ្ទេស D ចំនួន ៨ ៨៣៥ នាក់និង និទ្ទេស E មានចំនួន ៣៨ ១១៧ នាក់ ដែលស្មើនិង ៦២.,១៨ ភាគរយនៃចំនួនសិស្សប្រឡងជាប់ សរុប ៨៩៦៦១នាក់ ៕
