អាថែន៖ មន្ត្រីប៉ូលីសបានឱ្យដឹងថា មានជនចំណាកស្រុករាប់ពាន់នាក់កាលពីរាត្រីថ្ងៃចន្ទ ទី១៩ កញ្ញា បានរត់គេចខ្លួនចេញពីជំរុំសំខាន់មួយរបស់ប្រទេសក្រិក នៅលើកោះ Lesbos បន្ទាប់ពីមានការដុតរោងចក្រដែលគេបានឃើញជាក់ស្តែងផ្ទាល់ភ្នែក។
ប្រភពពីមន្ត្រីប៉ូលិសបានប្រាប់ទីភ្នាក់ព័ត៌មាន AFP ថា គ្មានអ្នកស្លាប់ និងរបួសនោះទេក្នុងហេតុការណ៍ដុតរោងចក្រនេះ ហើយជំរុំតង់ Moria ទី១០ ដែលជាទីកន្លែងនៃជនភៀសខ្លូនជ្រកកោនក្នុងប្រទេសក្រិកត្រូវបានបំផ្លាញស្ទើរតែទាំងស្រុង។
បន្ទាប់ពីហេតុការណ៍នេះ ក្រុមអ្នកសង្គ្រោះបានផ្តល់កន្លែងស្នាក់នៅ និងផ្តល់សេវាកម្មសុខភាព ព្រមទាំងបានចុះស្រង់ទិន្នន័យនៃការខូចខាតក្នុងហេតុការណ៍នេះ។ប៉ូលីសនិយាយថា៖«មនុស្សចន្លោះពី ៣ ពាន់នាក់ ទៅ ៤ ពាន់នាក់នៃជនចំណាកស្រុកបានរត់គេចខ្លួនពីជំរុំ Moria »។
សេចក្តីរាយការណ៍មួយបានប្រាប់មកថា មានរថយន្តពន្លត់អគ្គីភ័យជាច្រើនត្រូវបានគេរារាំងក្នុងសកម្ម ភាពជួយពន្លត់អគ្គិភ័យនេះ និងមានការប៉ះទង្គិចគ្នាមួយបានផ្ទុះឡើងផងដែល ព្រោះបញ្ហាជនភៀសខ្លួននេះកំពុងក្លាយជាបញ្ហាដ៏ចម្រូងចម្រាសក្នុងចំណោមប្រទេសជាគូប្រជែងដែលត្រូវទទួលខុសត្រូវចំពោះជនចំណាកស្រុកទាំងនេះ។
ទីភ្នាក់ងារព័ត៌មានរដ្ឋ ANA បានរាយការណ៍កាលពីថ្ងៃចន្ទមុនថា មានភាពតានតឹងកើនឡើងជុំវិញបញ្ហាជំរុំជនភៀសខ្លួន Moria នេះ ដោយមានពាក្យចចាមអារ៉ាមមកថា ជនចំណាកស្រុកទាំងនេះប្រហែលនឹងត្រូវនិរទេសទៅប្រទេសតួកគីជាទ្រង់ទ្រាយធំមួយ។
បច្ចុប្បន្នមានជនភៀសខ្លួន និងជនចំណាកស្រុកជាង ៦ ម៉ឺននាក់កំពុងរស់នៅក្នុងប្រទេសក្រិក ដែលភាគច្រើននៃពួកគេគឺស្វែងរកការធ្វើដំណើរទៅកាន់ប្រទេសអាល្លឺម៉ង់ និងបណ្តាប្រទេសមួយចំនួននៅសហភាពអឺរ៉ុប៕ប្រភព៖CNA
