ភ្នំពេញ៖ សមត្ថកិច្ចខណ្ឌទួលគោក នៅព្រឹកថ្ងៃទី ១៦ ខែកញ្ញា ឆ្នាំ២០១៦នេះ បានយកលិខិតឱ្យដំណឹងពីសាលក្រមផ្តន្ទាទោស លោក កឹម សុខា ទៅបិទមុខផ្ទះរបស់លោក ដែលស្ថិតនៅផ្ទះលេខ ៩៧ ផ្លូវ៣១៣ សង្កាត់បឹងកក់២ ខណ្ឌទួលគោក រាជធានីភ្នំពេញ។
លិខិតឱ្យដំណឹងពីសាលក្រម ដែលមានលោក សៀង សុខ ជាតំណាងអយ្យការសាលាដំបូងរាជធានីភ្នំពេញ បានបញ្ជាក់ប្រាប់លោក កឹម សុខា ប្រធានស្តីទីគណបក្សសង្គ្រោះជាតិថា លោកត្រូវបានផ្តន្ទាទោសដាក់ពន្ធនាគារ កំណត់ ០៥ ខែ និងពិន័យប្រាក់ ៨០ម៉ឺនរៀល ពីបទបដិសេធ ក្នុងការចូលខ្លួន ប្រព្រឹត្តនៅរាជធានីភ្នំពេញ កាលពីថ្ងៃទី ២៦ ខែឧសភា ឆ្នាំ២០១៦។
លិខិតដដែលបញ្ជាក់ សាម៉ីខ្លួនមានសិទ្ធិចូលមកប្តឹងឧទ្ធរណ៍ ក្នុងរយៈពេលមួយខែ គិតពីថ្ងៃបានទទួលលិខិតជូនដំណឹងនេះ។
កាលពីថ្ងៃម្សិលមិញ លោក សំ សុគង់ មេធាវី លោក កឹម សុខា បាន ផ្ដល់បទសម្ភាសន៍ ឱ្យវិទ្យុស្ត្រីថា លោកនិងក្រុមមេធាវី លោក កឹម សុខា ៤រូបទៀត នឹងដាក់បណ្ដឹងឧទ្ធរណ៍ ករណីនេះ ទៅសាលាឧទ្ធរណ៍នៅពេល ឆាប់ៗនេះ។
ករណីនេះដែរ ប្រធានស្តីទីគណបក្សប្រឆាំងរូបនេះ បានឃុំខ្លួនឯង អស់រយៈពេល ជាងបីខែ។គណបក្សសង្គ្រោះជាតិ ព្រមាន ថានឹងធ្វើមហាបាតុកម្ម ប្រឆាំងនឹងសាលក្រមនេះ។
សូមជម្រាបថា លោក កឹម សុខា ប្រធានស្តីទីគណបក្សសង្គ្រោះជាតិ ត្រូវបានសាលាដំបូងរាជធានីភ្នំពេញ ចោទប្រកាន់ពីបទបដិសេធមិនចូលខ្លួន បន្ទាប់ពីតុលាការ បានកោះហៅលោកក្នុងនាមជាសាក្សី ករណីរឿងស្នេហាលួចលាក់ ដែលគេសង្ស័យលោកជាមួយនាង ខុម ចាន់តារាទី ហៅស្រីមុំ៕
